По шестой песни:
И поется кондак и икос (или мученичен, аще несть).Стихи́:
Иоаки́ме, красу́йся с супру́гою,
Роди́вши ку́пно душе́вную красоту́ тва́ри,
В девя́тый, роди́тель Богома́тере собо́р обре́те.
Его́же Рождества́ ра́ди пра́зднуем Пресвяты́я Влады́чицы на́шея Богоро́дицы, я́ко хода́таи еси́ (суть) всеми́рному Спасе́нию, святы́я ра́ди своея́ Дще́ре, Богоро́дице бы́вши. Сих же успе́ние, в два́десятый ию́лия пове́дует.
В то́йже день свята́го му́ченика Севириа́на
Стихи́:
Севириа́н поне́же ка́мением те́кшим боле́зноваше,
Ра́дуется пове́шен, я́ко оттерза́ющимся ему́ ногам к земли́.
Сей бя́ше при Ликини́и царе́, в Севасти́и, чи́на сый сена́торскаго. Той ят бысть Лиси́ем ду́ком, я́ко христиа́н, за е́же четы́редесять святы́х му́ченик подви́гнув на по́двиг. И низ со стены́ гра́да пове́шен быв, и ка́мень вели́к на но́зе ему́ привя́зан. И от таковы́я тя́жести, Бо́гу дух свой предаде́.
В то́йже день сло́во е́же не осужда́ти, но ми́ловати согреша́ющая
Никто́же ненави́дит та́ко греха́ я́коже святи́и. Но оба́че не возненави́дят согреша́ющих, ни осужда́ют, ни отго́нят их. Но и постра́ждут с ними, нака́жут и утеша́ют. Я́коже уд боля́щь, все творя́т да спасе́т (спасу́т) его́. Я́коже лове́ц вервь ве́ржет в ре́ку и и́мет вели́ку ры́бу, и чу́ет я́ко смуща́ет и погружа́ется, не напра́сно ни ну́ждею влече́т ю́ да не урве́тся вервь, и отъину́дь погуби́т ю́. Но попуща́я хи́тро вервь, доне́леже хо́дит а́може хо́щет. И егда́ разуме́ет я́ко утомис́я и преста́ от стремле́ния, тогда́ на́чнет па́ки влещи́ ю́ пома́лу. Та́ко и святи́и долготе́рпением и любо́вию влеку́т бра́та. И не отска́чут ни скаре́дуют ни гнуша́ются, но покрыва́ют и заступа́ют. Я́ко да согреша́ющаго по вре́мени испра́вят. Ни ине́м же дадя́т обличи́ти его́, я́ко да и ти́и бо́ле успе́ют в любо́вь Христо́ву.
Что створи́ святы́й Аммо́н, егда́ приидо́ша к нему́ бра́тия глаго́люще: «Игу́мене, иди́ и виждь в ке́лию о́ного бра́та. Я́ко и́мать внутрь блудни́цу и скверни́т ме́сто сие́». И ка́ко милосе́рдие показа́ свята́я та душа́. Разуме́в бо я́ко сохрани́л брат жену́ под спу́дом, прише́д же и се́де верху́ и повеле́ иска́ти им во всей ке́лии. И я́ко не обрето́ша, глаго́ла им: «Бог да прости́т вы». И се рек, посрами́ я́ и отпусти́ я́ рек: «Не удо́бь ве́ры е́млете на бли́жняго си». Да и о́ного уцелому́дрит, покры́ его́ согреше́ния. И и́м за ру́ку бра́та, по излезе́нии всех и рече́ ему́: «Печи́ся о свое́й души́ бра́те». И умили́вся брат, вни́де в страх Бо́жий. И створи́ покая́ние о души́ свое́й.
Да и мы бра́тие стяжи́м милосе́рдие и любо́вь ко согреша́ющим. И соблюде́мся от осужде́ния, да нас Бог соблюде́т от всего́ зла и лю́таго греха́.
В то́йже день поуче́ние свято́го Стефа́на
Не име́й дру́жбы с жено́ю, да не сгори́ши огне́м ея́. Не име́й дру́жбы с ма́лым де́тищем, да не впаде́ши в сеть с ним. Не име́й дру́жбы со старе́йшим свои́м, то́кмо слу́шай слове́с его́, а по де́лом его́ не твори́. Не возлюби́ ити́ во град, ни рцы: я́ко чи́сто ми есть о́ко, сотвори́ши бо е́ неприя́зни. Не пий вина́, да не сотвори́т ти се́рдца оскверне́на в сласте́х по́хотных. Не яждь два́жды днем, да не утолсте́ет ти плоть, и укореня́тся мы́сли. Не затвори́ двере́й от стра́ннаго, да не затвори́т Госпо́дь двере́й Свои́х от тебе́. В ню́же бо, рече́, ме́ру ме́рите, возме́рится вам. Посети́ боля́щаго, да Бог посети́т тебе́. Не мно́го спи, но моли́ Бо́га на по́мощь си приле́жно, да избе́гнеши я́ко пти́ца от се́ти. Пребыва́й при́сно в хра́ме Бо́жии. Глаго́лет бо: Прославля́ющаго Мя просла́влю. Сие бо творя́, сам спасе́шися, и су́щии с тобо́ю. Пребыва́й же в покоре́нии, и в молча́нии, и его́же а́ще про́сиши, бу́деши ты я́ко нищий ду́хом. Не собира́й тре́бования, па́че живи́ смире́нием. Тружда́йся свои́ма рука́ма, да и́маши пода́ти тре́бующым. Си́це а́ще твори́ши, жив бу́деши о Бо́зе: Емуже сла́ва, ны́не и при́сно, и во ве́ки веко́в. Ами́нь.