Стихи́:

Внима́ху Минодо́ра и Митродо́ра и Нимфодо́ра дар томле́ния пло́тска:

Растяже́ни три дароимени́тныя, умро́ша в деся́тый.

Си́и бя́ху при́сныя сестры́ живу́щии от двои́х зна́мений (по́прищь) исходя́щих томи́щь (исто́чнику) во Пи́фиих. И оклеве́тани бы́ша Фронти́ну кня́зю страны́ тоя́. И го́рько му́чени бы́ша и преда́ша душа́ Го́сподеви.

--- Си́и святи́и му́ченицы бе́ша при Максимиа́не царе́, зако́ном су́ще сестре́ницы. И живу́ще за два по́прища от исходя́щих те́плых вод в Пи́фиях. Я́ты быша Про́том страны́ тоя́ кня́зем, и вопроше́ни бы́ша о и́менех их, и ка́ко ве́руют. Они́ же испове́даша и́мя Го́спода на́шего Иису́са Христа́ со дерзнове́нием. И посе́м бие́на бысть пе́рвая их сестра́ Минодо́ра, па́лицами го́лени ея́ сокруши́ша. И та́ко моля́щися Бо́гу, у́мре. И повеле́ князь предложи́ти мо́щи ея́ на устраше́ние сестр ея́. И призва́в, ну́дяше ею отврещи́ся Христа́. И я́ко не послу́шавше, повеле́ слуга́м и тою уби́ти. И а́бие взе́мше слуги́ сосу́ды желе́зны, сокруши́ша вся у́ды их. И та́ко сконча́вшеся и те, и преда́вше святе́и свои́ ду́шы в ру́це Бо́жии. И погребены́ бы́ша близ те́плых вод, и мно́га исцеле́ния подаю́т и до сего́ дне.

Стихи́:

Варипса́ва боже́ственныя ра́ди Влады́чныя кро́ви

Свою́ кровь излия́в и дре́вом сокруше́н.

Сей от не́коего пусты́нника, прие́м исте́кшую кровь от пречи́стаго ре́бра Го́спода на́шего Иису́са Христа́, мно́га исцеле́ния ея́ ра́ди творя́ше. Тем от неве́рных но́щию убие́н бысть. Таково́е же сокро́вище бысть, у ученика́ его́ сохранено́.

Стихи́:

Вои́стину предста́ псало́мски Пульхе́рии

Одесну́ю Тебе́ цари́ца, Христе́ мой.

Та бе́яше сестра́ Феодо́сия Ма́лаго, жена́ же наречена́ бы́вши Маркиа́на благочести́ваго царя́, я́же и до ста́рости де́вство сохра́ньши. И мно́гая исправле́ния о це́рквах и о граде́х сотвори́: и е́же в Халкидо́не свята́го собо́ра бы́ти угото́вльши, с ми́ром почи́ о Го́споде.

Па́вел, сын Лео́нов, сказа́ о святы́х сих. По́слан бых, рече́, на восто́к и́мать уро́к царе́в. И вшед в не́который монасты́рь и́мать уро́к, изы́де игу́мен с чернецы́ в сре́тение ми, и целова́вше друг дру́га, седо́хом на дворе́. Бя́ху же ту древа́ иму́ще плод, и прилета́юще пти́це ломя́ху ве́тви со ово́щем, и отхожда́ху бо́рзо летя́ще. И вопроша́х игу́мена, глаго́ля: «Ка́ко не ядя́т пти́цы си, но отно́сят с ве́твием плоды́?». И той рече́: «Се 11 лет есть, та́ко по вся ле́та творя́т пти́цы». Аз же я́ко от Бо́га попуща́емь, рех: «Не́где в гора́х святи́и му́жи суть или́ жены́, да по Бо́жию веле́нию пти́цы си но́сят им ово́ща». И еще́ ми глаго́лющу, и се вран прише́д, отломи́ ветвь с пло́дом. И рех игу́мену: «По́йдем по нем». Те́мже иду́щим со мно́ю, летя́ше вран пред на́ми с пло́дом. И вшед на холм се́де, и положи́ ветвь. Нам же восходя́щим к нему́, и а́бие взя вран ветвь, и лете́ в про́пасть, и та́мо оста́вив плод, изъи́де ничто́же у себе́ имы́й. И прише́дшим нам над про́пасть, верго́хом ка́мень до́лу. И возопи́ша та́мо не́котории, глаго́люще: «А́ще есте́ христиа́не, не побива́йте нас». Мы же ре́хом: «Вы кото́рии есте́?» «А́ще хо́щете ны ви́дети, ве́рзете ны три ри́зы, я́ко на́зи есмы́. И ше́дше по́дле горы́, обря́щете те́сну стези́цу, и по той и́мате приити́ к нам». И се слы́шавше, а́бие три чернецы́ совле́кше ри́зы своя́ и ка́мением увива́вше, верго́ша до́лу к ним. Мы же, я́ко пове́даша ны, сле́зше с горы́, обрето́хом те́сен путь. И егда́ по нему́ ше́дше, узре́хом, и се три жены́ ви́девше ны, поклони́шася до земли́. И сотво́рше моли́тву, седо́хом. Еди́на же от них се́де, а две предстоя́ста. Тогда́ игу́мен к седя́щей рече́: «Отку́ду, госпоже́ и ма́ти, и ка́ко се́мо вни́де?» И отвеща́, глаго́лющи: «Аз, о́тче, от Константи́ня гра́да есмь, име́х му́жа сано́вника царе́ва. И тому́ ю́ну преста́вльшуся, аз же бех 28 лет, дво́его пла́чущи бех, вдовства́ и безча́дия. По не́колицех же днех не́кий вельмо́жа слы́шав о мне, и присла́ своя́ ра́бы, хотя́ восхи́тити мя ну́ждею. И ти́и не послабля́ху ми, хотя́ще мя вести́ к своему́ господи́ну. И помоли́хся ко Го́споду моему́ Иису́су Христу́, да мя изба́вит от него́, хотя́щаго ду́шу и те́ло истле́ти ми. И рех слуга́м его́: «Госпо́дие мои́! Чи не ра́дуюся аз приити́ к господи́ну ва́шему, сла́вну су́щу. Но есть ми неду́г зол и безпреста́ни и́дет от мене́ гной, да уврачу́ся ны́не, и потерпи́те ми доне́леже исцели́ю, и тогда́ пойду́ к нему́ с ра́достию». И то слы́шавше, отъидо́ша от мене́, ре́кше: «А́ще та́ко есть, до 40 дний по́ждет тебе́ господи́н нашь». По оше́ствии же тех, вся рабы́ моя́ свободи́х, да́вши им зла́то, и остави́х си две, я́же ви́дете ны́не. И все име́ние мое́ разда́ях ни́щим. И призва́вши христолюби́ва челове́ка от ро́ду моего́, и кля́твами стра́шными закля́х его́ распрода́ти се́ла моя́ и дом мой, и разда́яти ни́щим. И без печа́ли бы́вши о всем име́нии мое́м, и пои́мши но́щию мои́ се́стре си, внидо́хом с ни́ма в кора́бль, и я́ко от Бо́га наставля́еми, приидо́хом на ме́сто се. И се 11 ле́то есть, челове́ка не ви́дехом, то́кмо вас днесь. Ри́зы же на́ша по ле́тех раздра́вшеся, отпадо́ша». И рече́ к ней игу́мен: «Отку́ду, госпоже́ моя́, име́ете пи́щу себе́?» Она́ же рече́: «Благи́й Человеколю́бец Бог наш, прекорми́вый лю́ди в пусты́ни 40 лет, То́йже и нам пи́щу посыла́ет, недосто́йным рабо́м Свои́м: и́бо на ле́то, Того́ про́мыслом, пти́цы прино́сят нам всяк ово́щь, не то́кмо же на потре́бу на́шу, но и преизоби́лует. И на́ги су́ща покрыва́ет ны и гре́ет Свое́ю благода́тию, да ни в зи́му бои́мся земы́ (хла́да), ни в ле́те зно́я. Но есмы́ я́ко в раи́ пи́ща водворя́емы, безпреста́ни сла́вяще Святу́ю Тро́ицу». Си слы́шавшим нам и чудя́щимся, рече́ к ней игу́мен: «А́ще вели́ши, госпоже́ моя́, да послю́ бра́та в монасты́рь, да принесе́т бра́шно, да я́мы с ва́ми». И та отвеща́: «А́ще хо́щеши сотвори́ти се, повели́ да презви́тер прии́дет и пре́жде сверши́т святу́ю слу́жбу, я́ко да прича́стницы бу́дем святы́х Та́ин Христо́вь: отне́ле бо отлучи́хомся гра́да, не сподо́бихомся тех прия́ти святы́нь». Се слы́шав игу́мен, посла́ чернеца́ в монасты́рь привести́ презви́тера и бра́шно. Прише́дшу же презви́теру, и сверши́ святу́ю Литурги́ю. И причасти́ся пре́жде сама́, та́же рабы́ни ея́ пречи́стых Та́ин. Обе́даша же ту с на́ми. Рече́ же ко игу́мену: «Молю́ святы́ню твою́, о́тче, пребы́ти зде три дни». Тому́ же обеща́вшуся пребы́ти. Воста́вши же блаже́нная та, приле́жно помоли́вшеся ко Го́споду, преста́вися. И со сле́зами нагро́бныя пе́сни пе́вше, погребо́хом ю́. Нау́трия же втора́я сотво́рши моли́тву, преста́вися. Та́кожде и тре́тия в тре́тий день. Тех мы погре́бше, возврати́хомся, сла́вяще Христа́ Бо́га на́шего, творя́щаго ди́вна и пресла́вная чудеса́.