Стихи́:

Евста́фия вол ме́дян всеро́дна опали́:

От всеро́дна Ты спаса́еши, Сло́во Бо́жие:

В двадеся́тый Евста́фия с роже́нием его́ вол ку́пно сожже́.

Святы́й му́ченик Евста́фий бе стратила́т, в Ри́мстем гра́де при Троя́не цари́, нарица́шеся сам Плаки́да. А жена́ его́ Татиа́на, бе же бога́т зело́ и творя́ше ми́лостыню к ни́щим. И еще́ е́ллин сый, творя́щу же ему́ ло́вы, яви́ся ему́ еле́нь, и нача́ гони́ти да и́ улови́т. И хотя́щу пости́гнути ви́де на рогу́ его́ честны́й Крест Христо́в сия́ющь па́че со́лнца, посреде́ же его́ о́браз Христо́в. И прии́де глас от еле́ня глаго́лющь: «Плаки́до что Мя го́ниши? Аз есмь Христо́с». Посе́м крести́ся и раздая́ име́ние свое́ ни́щим. И толма́ с ним бра́ся диа́вол, я́ко все е́же име́ погуби́. И жену́ его́ плене́ну ви́дети, и де́тища его́ зверьми́ восхище́на, и самого́ ни́ща сотвори́. Но ми́лости Бо́жия не мо́же ему́ отъя́ти, ю́же дае́т Бог упова́ющим Нань. И па́ки ему́ обрести́ жену́ свою́ и ча́ди свои́. И взыска́ну бы́ти царе́м и пе́рвый сан прия́ти. И пото́м истя́зан бысть пожре́ти и́долом, и не поко́рься. Вве́ржен бысть в сосу́д ме́дян ражже́н. С жено́ю и с ча́дома. И ту сконча́шася за Христа́ в Него́же ве́роваша.

Стихи́:

Ипа́тие пречи́стых ра́ди ико́н,

Со Андре́ем зкала́ются от мужь кро́вий.

Сия́ от Лиди́йския страны́ су́ща. Еще́ и́ма в де́тстве су́щема, и в не́которей оби́тели учи́вшемася кни́гам, и тогда́ ко благоче́стию прилежа́ста. Посе́м Ипа́тий и́ноческое житие́ на ся восприи́м. Андре́й же священнопропове́дник церко́вный упра́влься учи́тель бы́ти. И не то́чию посты́, и бде́ния, и моли́твы, со ине́ми держа́ста, но вся́ко смиреному́дрие и любо́вь име́яста. Уве́дев я́же о нею́ епи́скоп Ефе́сский, и призва́в я́ к себе́: И Ипа́тия епи́скопа поста́вив, Андре́я же презви́тера учини́. Уве́дев же о сею́ Лев святоненави́стник, и приведе́ я́ к себе́, и в темни́цу затвори́в. Пото́м влачи́ти и би́ти сих повеле́. И по таковы́х му́ках ко́жу со главу́ ею́ одра. И святы́я ико́ны многоце́нныя, на глава́х их запали́, смоло́ю брады их пом́азав, и посреде́ града влачи́ша ею́. По сих во страна́х го́лаго верха́ закла́ни бы́ша, и пове́ржени псом в снедь.

Пове́даше Фило́н Христо́в раб я́ко дре́вле в гоне́ние христиа́н епи́скоп не́кий отлучи́ попа́ от слу́жбы, не́коея ра́ди вины́. Отъи́де поп той на и́ну страну́ не́кия потре́бы де́ля, и та́мо ят бысть от е́ллин, и мно́го му́чен не отве́ржеся Христа́, и усе́кнуша главу́ его́, и бысть му́ченик Христо́в. И пома́ле преста́вшу гоне́нию, князь гра́да того́ ви́дя чудеса́ свята́го му́ченика, созда́ ему́ це́рковь. И взе́мше мо́щи его́ вложи́ша в ра́ку, и положи́ша и внутрь во святи́лищи церко́внем. Созва́ же лю́ди вся и епи́скопа, хотя́ створи́ти свяще́ние це́ркви. Ти я́ко поп хотя́ поча́ти вече́рнюю, дви́жеся ра́ка и изы́де вон из це́ркве. Страх же и тре́пет прия́ вся су́ща в це́ркви. И прине́сше у́жа вовлеко́ша ра́ку в це́рковь на ме́сто свое́. И второ́е епи́скопу да́вшу мир, та́коже ра́ка изы́де из це́ркве. И нача́ же испове́даяся князь пла́катися зело́ к Бо́гу. Мня я́ко грех ра́ди мои́х не хо́щет святы́й всели́тися в це́ркви. Та́коже и вси лю́дие пла́кахуся рыда́нием. Приспе́вши же но́щи, явися мученик епи́скопу глаго́ля: "Почто́ вы скорбите́ о себе́ и́мже не пребу́ду с ва́ми в це́ркви. Но створи́ любо́вь и потруди́ся в град к епи́скопу моему́. И пону́ди его́ разреши́ти мя от запреще́ния, я́ко отлучил́ мя есть от слу́жбы. И не могу́ с ва́ми служи́ти ны́не в це́ркви, и того́ ра́ди исхожу́ вон. И вене́ц у́бо муче́ния прия́х, лица́ же Христо́ва не ви́дех, зане́ в отлуче́нии есмь. Не помышля́й же ты разреши́ти мене́, ни служи́ти бо с ва́ми могу́, ни лица́ Христо́ва ви́дети. Той бо рече́ святи́телем, ели́ко свя́жете на земли́, бу́дут свя́зани на небесе́х". И то рек неви́дим бысть. У́тро же епи́скоп испове́дав си кня́зю. Уте́ши вся и не́колико прие́м приче́тник и и́де ко епи́скопу того́. И испове́да ему́ все я́же о святе́м му́ченице. И той ско́ро воста́в и́де со прише́дшими. И прише́д поклони́ся свято́му му́ченику и рече́: "Христо́с связа́вый тя смире́нием мои́м, разреши́т тя ны́не проли́тием кро́ве твоея́ за и́мя Его́. Вни́ди и сни́ди с на́ми.", - и вне́сше раку в це́рковь сконча́ша слу́жбу. И ктому́ не дви́жеся ра́ка от ме́ста своего́, и чудеса́ мно́га быва́ху. Да и вы мно́го уве́сте, я́ко вели́к сан святи́телеск, ели́ко бо свя́жут на земли́, бу́дут свя́зани на небеси́. Ели́ко разреша́т на земли́, бу́дут разреше́ни и на небесе́х.