По шестой песни:
И поется кондак и икос (или мученичен, аще несть).Стихи́:
И Кондра́та, многохудо́жнаго страда́льца пишу́,
Прии́мша во уче́нии учи́телеву кро́тость:
В два́десять пе́рвый, многохи́траго Кондра́та уму́чиша окая́ннии.
Сей дре́вний многохудо́жав муж сый, во Афи́нех и в Магниси́и сл́ово Госпо́дне пропове́дав. И мно́гих уче́нии просвети́в, и к све́ту богоразу́мия приве́д. Тем от Афи́н своея́ па́ствы, гони́тели гони́мь быв. Ка́мением и гла́дом дручи́мь. Последи́ же при Андреа́не и Улиа́не, вене́ц муче́ния прия́т.
Страсть свята́го му́ченика Фео́дора, и́же в Пе́ргии му́ченнаго благослови, владыко, прочести.
Фео́дор святы́й, му́ченик бе при Антони́не цари́, и при Феодо́те иге́моне. Пре́жде быв свята́го Фео́дора, и́же во Амасе́и му́ченика, седми́десяти и шести́ лет. Во́инствова же в ти́ронстем са́ну. Бя́ше же юн, во́зрастом вели́к, лице́м красе́н. И преоби́дев во́инство земно́е. И рече́ пред иге́моном, аз хощу́ бы́ти во́ин небе́сному Царю́ Иису́с Христу́. И препоя́сан святы́м креще́нием. А земно́му царю́ рабо́тати не хощу́. Сего́ ра́ди пону́жден бысть иге́моном поклони́тися и́долом, и не покори́вся. Во мн́оги вложе́н бысть му́ки и в пещь горя́щу вве́ржен. И изы́де здрав. Того́ ра́ди ве́роваста во́ина, и́же мучиста и. Сокра́т и Диони́сий. Прии́де же и ма́ти свята́го Фео́дора Фили́я. И усе́чена бысть с во́инома. Фео́дор же ра́спят бысть на кресте́.
В то́йже день преподо́бнаго отца́ на́шего Ио́ны Саваи́тскаго
Стихи́:
Оста́вль Ио́на непостоя́ннаго жития́ ме́сто,
Бу́дущее изве́стное обре́те ме́сто себе́.
Сей преподо́бный Ио́на презви́тер, бе оте́ц Фео́дора преподо́бнаго, и блаже́ннаго Феофа́на испове́дника и творца́ кано́ном, и́мже ли́ца написа́ Фео́фил иконобо́рец. Той прише́д во оби́тель свята́го Са́ввы, и постриже́ся. Верхо́вное благогове́инство стяжа́в: и мно́гия испра́вль доброде́тели, ко Го́споду отъи́де.
В то́йже день свята́го му́ченика Евсе́вия испове́дника
Стихи́:
Евсе́вия уби́ша злочести́вии мечи́,
И́же в благоче́стии живу́щаго Христо́ва дру́га.
Святы́й Евсе́вий самохо́тне до́йде ко кня́зю Фини́ческому, и рече́: Что безу́мствуеши богобо́рче, гоня́й па́ству Христо́ву? Он же разгне́вався, повеле́ пове́сив свята́го строга́ти. На мно́зе же стро́гану, и власяни́цею со́лию со о́цтом сме́шеною истира́ху ра́ны его́. Святы́й же ра́довашеся, я́ко чужди́м телесе́м стражда́. И князь в забве́нии быв, мече́м главу́ его́ отсещи́ повеле́. И взы́де на небеса́ ра́достен.
В то́йже день сло́во, ка́ко подоба́ет жи́ти христиа́ном
Христиани́н вся́кий кроме́ неве́рных да пребыва́ет, без де́лания грехо́в а́ки друг Бо́жий, а враг диа́воль. Прича́стник Христо́в Та́ин. Отмета́яся сатани́нских дел, и пре́лестий бесо́вских. Чист, преподо́бен, боголюби́в, ча́сто моля́ся Го́сподеви глаго́ля: О́тче наш И́же еси́ на небесе́х, да не недосто́йне Бо́га Отца́ себе́ нарица́я укоре́н бу́дет от Него́. Но а́ки сын сла́вя отца́ и а́ки раб господи́на своего́ боя́ся. Глаго́лет бо Госпо́дь, а́ще Оте́ц есмь вам, то где Ми от вас честь и сла́ва? А́ще ли Господи́н, то где страх Мой у вас? Тем бра́тия пребу́дем в повеле́нии Бо́жии: чтим а́ки Отца́ и бои́мся а́ки Господи́на. Помина́им же грехи́ своя́, да очи́стивше своя́ душа́ та́мо ко Христо́ви прии́дем.