Стихи́:

Воспева́ет Тебе́ ра́достию,

И Тебе́ ра́ди умира́яй, Сло́ве:

Фо́ка му́ченик и́же к ме́чней кончи́не:

В два́десять вторы́й Фо́це мече́м главу́ отсече́.

Сей бе́яше от гра́да Сино́па, наме́стник ста́рый зна́емь. Учини́в себе́ вертогра́д, и разли́чная зе́лия насади́в, и продая́ пита́шеся, и ни́щыя подая́. Друго́е же полага́ше при пути́ на взима́ние мимоходя́щих. Но оба́че о души́ добролю́бие бо́льшее име́яше, сего́ ра́ди не утае́н быв: но я́ко при́сный раб Христо́в опове́дан быв тогда́ держа́щему. И прише́дше слуги́, и того́ вопроси́ша, ре́кше: «Где вита́ет зде Фока?». Он же тех прие́м, учреди́ их. И вопроси́: «Кто есте́ вы? И кого тре́буете?». Они же сказа́ша ему́ та́йну, я́ко Фо́ку я́ти на муче́ние и́щем. Слы́шав же господи́н уго́дник, и угото́ви гроб, и вся я́же на погребе́ние тому́ упра́вив, яви́ себе́ и́щущым. И сие́ уве́девше они́, ужасо́шася душе́ю. Он же умоли́ их к дерзнове́нию изги́бели. И та́ко мече́м главу́ его́ отсеко́ша. И приведе́ся к Бо́гу же́ртва благоприя́тна.

Стихи́:

Лица́ Бо́жия дре́вле бе́гаше,

Ны́не же Ио́на в лице́ Того́ зри́ши.

Сей бя́ше сын Амафи́ин, от Агиа́фа шестерочи́сленаго, близ Азо́та гра́да е́ллинскаго, в Примо́рии. Изблева́н бысть ки́том, взы́де в Ниневи́ю пропове́дав, и возврати́вся не пребы́сть в земли́ свое́й: Но пои́м ма́терь свою́ прише́льствова в земли́ Ассири́йстей, в стране́ иноплеме́нник. Глаго́лаше бо: «Я́ко отъиму́ си́це поноше́ние мое́, я́ко солга́х проро́чествовав на Ниневи́йский град вели́кий». Сей есть сын вдови́чь, его́же воздви́же Илия́ проро́к. Бя́ше бо тогда́ Илия́ облича́я Аха́ва, и призва́в глад на зе́млю бежа́. И прише́д в Саре́ффу Сидо́нскую, обре́те вдови́цу с сы́ном ея́, и пребы́сть у нея́, и́бо не можа́ше с необре́заными пребыва́ти, и благослови́ ю́ странноприи́мства ра́ди ея́. Бя́ше зна́я ю́ исперва, ея́же уме́ршаго сы́на воскреси́. И воста́в Ио́на по гла́де, и хожда́ше в земли́ Иу́дове: И уме́ршую ма́терь свою́ погребе́ у Лива́на Дево́рина. И всели́ся в земли́ Ассири́йстей, и у́мре та́мо. И погребе́н бысть в верте́пе Кенезе́ове, судии́ бы́вшаго еди́наго пле́мене во дни неча́яния. И даде́ чу́до во Иерусали́ме и по всей земли́ той, яко внегда́ ви́дят ка́мень вопию́щь то́нцем гла́сом, и жа́лостным, и вещи не́которей от дре́ва к Бо́гу веща́ющи, тогда́ прибли́житися спасе́нию. И тогда́ у́зрят Иеросали́ма раско́пана до основа́ния, и в нем вси язы́цы по́йдут на поклоне́ние Госпо́дне. И приложа́т ка́мения его́ к за́паду со́лнечному, и та́мо бу́дет поклоне́ние Пома́заннаго: зане́же Иеросали́му омерзе́ти в запусте́ние звере́й. И тогда́ прии́дет кончи́на вся́кому дыха́нию.

Той бя́ше сын отца́ Памфи́л, и ма́тере Мари́и, в ве́си Синопи́йстей. А́бие же из млады́х ногте́й, благода́тию Свята́го Ду́ха, чудеса́ творя́ше пресла́вная. И не преста́яше чудоде́йствуя, да́же и до после́дняго издыха́ния. Тем хотя́щему тому́ сбы́тися муче́нию, коне́ц изве́стен быв: го́лубю на главу́ его се́дшу, и вене́ц на главе́ его́ поло́жшу, и челове́ческим гла́сом веща́вшу: «Уже́ ча́ша твоя́ напо́лнися, и подоба́ет тебе́ ту́ испи́ти»: е́же и сподо́бися. При Трая́не царе́ огне́м и ме́чем сконча́н быв. Мно́га же и по е́же ко Го́споду отше́ствии бы́ша чудоде́йствия.

В Африки́и Фриги́йстей сей бе Петр мыта́рь неми́лостив зело́, николи́же не поми́лова ни́щаго. Ни па́мяти име́ к це́рквам Бо́жиим, укланя́ше бо у́ши от прося́щих ми́лостыни. Благи́й же Человеколю́бец Бог, не хотя́й сме́рти гре́шником, но пеки́йся всех спасе́нием, и́миже ве́дый судба́ми кого́ждо спасти́, сию́ вещь сотвори́. Во еди́но вре́мя маломо́щем седя́щем на у́лицы, нача́ша хвали́ти до́мы ми́лостивых и за них Бога молити. Та́коже и неми́лостивыя укаря́ху. До́йдеже сло́во сего́ Петра́ я́ко не ми́лостив есть отъину́дь. Еди́н же от них глаго́лаше: аз днесь возму́ от него́ ми́лостыню. И сотво́рше между́ собо́ю зало́г хотя́ще испыта́ти. И прише́дше ста́ша у врат до́му его́. Иду́щу же Петру́ и нося́щу на осле́ бре́мя хлеб кня́зю на обе́д. Поклони́ся ни́щий сотвори́вый зало́г и нача́ проси́ти приле́жно крича́. Он же не обре́т ка́мене восхи́щь хлеб и порази́ в лице́ его́. Он же похвати́в хлеб прии́де к дружи́не глаго́ля, я́ко от самою́ руку́ его взях его. По двою́ же дни́ю впаде́ мыта́рь в неду́г зол, до́ндеже не оста́ в нем дух. И нача́ша а́нгели ве́сити дела́ его́, и не обрета́ху до́брых дел что вложа́т проти́ву злым. То́кмо еди́ного хле́ба того́ его́же дасть н́ищему, и то же нево́лею. И ре́ста ему́ а́нгела: «Иди́ убо́гий Пе́тре и приложи́ к хле́бу се́му. Да не по́ймут тебе́ темнообра́знии бе́си и веду́т тя в му́ку ве́чную». Тогда́ вни́де па́ки душа́ его́ в те́ло, и отто́ле бысть ми́лостив, и раздая́ все име́ние свое́ ни́щим и рабы́ своя́ свободи́. Еди́ному же рабу́ рече́: «Послу́шая бу́ди мене́. А́ще ли не послу́шаеши то самого́ тя прода́м. Но по́йдеве во Иерусали́м да поклони́веся животворя́щему гро́бу. И святы́м страсте́м Го́спода на́шего Иису́с Христа́. И та́мо мя прода́си, и разда́ждь це́ну мою́ ни́щим и сам свобо́ден бу́деши». Ше́дшема же и́ма во Иерусали́м, и покло́ньшемася святым местом. Прода́сть раб господи́на своего не́коему богобоя́зниву му́жу глаго́лемому Зои́лу. И це́ну его́ раздая́ ни́щим. И нача́ рабо́тати овогда́ в пова́рни службу творя́. Овогда́ виногра́д копа́я, и ине́ми стра́дами му́ча те́ло свое́. До́ндеже Госпо́дь Бог прояви́ о нем. Прише́дшем бо не́ким го́стем от Африки́е. И седя́щим го́стем на обе́де у господи́на его. Петр же бе внося́ блю́да и износя́. Они́ же познава́юще его́ нача́ша глаѓолати, вои́стину Петр есть. И пове́даша господи́ну его́ я́ко властели́н вели́к есть был во Африки́и, и мно́ги рабы́ свободи́л. Петр же пред две́рьми слы́шав я́же глаго́лют о нем, поста́вль блю́до и изы́де. Бя́ше же врата́рь до́му того́ глух и нем и́же помава́нием то́кмо отворя́ше и затворя́ше. Тогда́ рече́ ему́ Петр, во и́мя Го́спода Бо́га на́шего, отве́рзи. Он же рече́: се аз го́споди, и отве́рзе ему́ врата́. И изы́де Петр, бежа́ сла́вы челове́ческия. Бы́вый же глух и нем, тече́ ско́ро, глаго́ля: господи́не, господи́не, я́ко вели́к раб Бо́жий изы́де от нас. Егда́ бо ми рече́ во и́мя Го́спода Иису́с Христа́, отве́рзи врата́. Ви́дех пла́мень изше́дшь изоу́ст его́. И косну́ся уши́ма и язы́це мое́м. Тогда́ услы́шах и проглаго́лах. Они́же изше́дше по нем ско́ро иска́вше, и не обрето́ша его́. И просла́виша Бо́га, прославля́ющаго святы́я Своя́.