Стихи́:

Му́жу проро́ку прорица́ние от арха́нгела

Роди́ти проро́ка и от проро́к что бо́льшее:

В два́десять тре́тий утро́ба прия́т Предоте́чу внутрь.

Тако́е боже́ственое зача́тие, благосвести́ проро́ку и святи́телю Заха́рии, внутрь це́ркви кадя́щу. И боже́ственый архистрати́г Гаврии́л рече́: услы́шана бысть моли́тва твоя́, я́ко сим произве́ствовати е́же пресла́внаго ра́ди, ста́рости же и непло́днаго рожде́ния Елисаве́тина, боже́ственаго и деви́ческаго, Пречи́стыя Богоро́дичнаго рождества́.

Васи́лию гре́ческое нача́лие пра́вящу. Африки́ю же всю держа́щу суро́вому ага́рянину Аврахи́му. И тому́ пору́шившу Сираку́сы, я́же есть митропо́лия Сикили́йская. Отту́ду приве́д Иоа́нна, ку́пно с детьми́ его́, Петра́ и Антони́на, де́ти еще́ безприли́чны вре́менем. И́хже предаде́ ага́рянским учи́тися кни́гам. Да внегда́ нача́ша достиза́ти му́жескому во́зрасту и му́дрости, и доброде́тели мно́зей, и пора́довася о них велича́вый: сро́дника Антони́на нарече́, Петра́ же сакела́рия поста́ви. Си́и же тай христиа́нство держа́ху, я́ве же срацы́нская творя́ху: но не утаи́шася. Уведев же сие́ Аврахи́м, и разгне́вася, но́зе их в кла́де заби́, и древесы́ ди́виими бия́ше. Четы́ри ста ударе́ния прии́м блаже́нный Антони́н. Та́же на осля́ти всаже́н, и самари́йским у́жем свя́зан, и посреде́ гра́да води́мь бя́ше: и та́ко сокруше́н и пору́ган, благодаря́ Бо́га. Петр же обнаже́н, же́злием по жи́лам, и по чре́ву томи́мь, и в темни́це затворе́н: извед же их из темни́цы, мы́шцы им от ра́му, и ру́це, древесы́ тя́жкими согнете́. Та́же бе́дре и го́лени та́коже сотре́, толи́ко я́ко и всем косте́м разы́тися. Те́лу же и кро́ви их во еди́но слия́тися. По сих же мно́го у́глия собра́в, и ко́вача призва́в, желе́зными клеща́ми разже́ными, та́йныя их у́ды извлече́, и во уста́ им вложи́. И сим всем сбы́вшымся. Отца́ же их Иоа́нна привле́к, и шу́ею руко́ю ши́ю его́ вспяти́в, и свой ножь потче́ в горта́нь ему́, и та́ко пад верх свои́х чад испусти́ дух. Посе́м же Аврахи́м огнь вели́к вжег, сожже́ ку́пно телеса́ святы́х. Блаже́ннаго же Андре́я ста́ра су́ща всем ви́дом, и ле́ты мно́гими дручи́ма, и гл́адом, и жа́ждею, и нагото́ю изнемо́гша, и непокаря́ющася о́ному псу: смотри́ что сотвори́ злый зверь, на конь всед, и копие́ взем, и осо́бно пра́во стоя́ща свята́го обре́т, зате́кся уда́ри его́ в пе́рси. Святы́й же благодари́в, ры́кну гласу вели́ким к Богу. Па́ки же уби́йца зате́кся вспять, и па́ки пронзи́ свята́го посреде́ плещу́. И та́ко от обои́х ударе́ний, изте́кши кро́ви из вну́тренних ему́, и паде́ блаже́нный на зе́млю. И повеле́ ноже́м отре́зати главу́ его́, и та́ко сконча́ся.

Бе не́кий ю́ноша хитр сый, кова́ти зла́том вся́кой у́твари. Сему́ повеле́ патри́кий крест скова́ти, с драги́м ка́мением да поста́вити и́ в це́ркви. И дав ему́ зла́то и отпусти́ и́. И помы́сли ю́ноша глаго́ля, вели́ко у́бо спасе́ние патри́кию от Б́ога, поне́же сели́ко истощи́ зла́то Бо́гови. И рече́, почто́ у́бо и аз не вмешу́ мзды себе́ в крест сий, да и мне вмени́т Христо́с я́ко две ме́дницы вдови́цы о́ноя. И си помы́слив приложи́ своего́ зла́та де́сять зла́тник. И доспе́в крест принесе́ к патри́кию, хотя́ кл́асти вонь драго́е ка́мение. Нача́ патри́кий в́есити крест, и ви́дев бо́ле своего́ зла́та в кресте́. И рече́ к ю́ноши, что есть лесть си, я́ко не́что примеси́л еси́, хотя́ моего́ зла́та утаи́ти себе́. Тогда́ глаго́ла ему́ ю́ноша всю и́стину и рече́: Еди́н Сердцеве́дец свесть яко несмь уя́л твоего́, но своего́ приложи́л, си́це бо рех, о́ коли́ко добра́ души́ свое́й твори́т патри́кий, принося́ име́ние то к Христу́ Бо́гу. И рех приложу́ и аз своего́ зла́та, да прииму́ с тобо́ю мзду. И прии́мем Христо́с я́ко и две ца́ти вдови́цы о́ноя. Подиви́вжеся вельми́ патри́кий рече́: о́ ча́до, та́ко ли еси́ помы́слил створи́ти до́брую сию́ вещь. Глаго́ла ему́ ю́ноша: ей влады́ко, я́коже реко́х ти. Патри́кий же па́ки рече́ ему́: поне́же та́ко помы́сли, и все до́брое свое́ изволе́ние дал еси́ Бо́гови, хотя́ со мно́ю име́ти часть, се от дне́шняго дне сы́на тя творю́ себе́. И всему́ име́нию моему́ насле́дника. О сем же и мы просла́вим Бога, даю́щаго возда́ние зде ны́не и в бу́дущем ве́цы, принося́щим с ве́рою да́ры. И та́ко пожи́ста с любо́вию в ми́ре, и спасе́ние получи́ста.