Понедельник пятой седмицы по Пасце

В после́дний день вели́кий пра́зника стоя́ше Иису́с, и возва́ глаго́ля: А́ще кто жа́ждет, да гряде́ть ко Мне и пие́т. Ве́руяй в Мя, я́коже рече́ Писа́ние, ре́ки от чре́ва его́ потеку́т во́ды жи́вы.

Приходя́щим к про́поведи и ве́рою внима́ющым, жела́ние жа́ждущых показова́ти подоба́ет и толи́ко воспаля́ти вожделе́ние себе́. Та́ко бо возмо́гут и глаго́лемая, со мно́гим удержа́ти хране́нием. И́бо жа́ждущии, егда́ у́бо ча́шу во́змут, со мно́гим ю́ привлача́ют усе́рдием, и тогда́ упокая́ются. Си́це у́бо, и и́же боже́ственых послу́шающе слове́с, а́ще жа́ждуще прии́мут, никогда́ же тружда́ются, до́ндеже испию́т. Я́ко бо при́сно подоба́ет жада́ти и алка́ти, «Блаже́нии, рече́, а́лчущии и жа́жущии пра́вды». И зде рече́ Христо́с: «А́ще кто жа́ждет, гряде́т ко Мне и пие́т». А е́же глаго́лет, таково́ есть: ни еди́наго ну́ждею и си́лою привлача́ю, но а́ще кто име́ет усе́рдие мно́го, а́ще кто распаля́ется жела́нием, сего́ Аз призыва́ю. Что же ра́ди назна́мена евангели́ст, я́ко «в после́дний день вели́кий»? И́бо и пе́рвый и коне́чный вели́к бе, су́щия бо посреди́ наипа́че в наслажде́ние изнури́ша. Что у́бо ра́ди «в после́дний» глаго́лет? Зане́ в нем вси бе́ша со́брани. В пе́рвый бо не прии́де , и вину́ рек к бра́тиям. Но ниже́ во вторы́й и в тре́тий таково́ не́что глаго́лет, я́ко бы не разруши́тися глаго́лемым, хотя́щим им на пи́щу приходи́ти. В после́дний, егда́ отъидо́ша в дом, напу́тия им дае́т ко спасе́нию и взыва́ет: о́во у́бо дерзнове́ние Свое́ я́вляя, о́во же мно́гаго ра́ди наро́да. И явля́я я́ко о мы́сленом бесе́доваше питии́, наво́дит: «Ве́руяй в Мя, я́коже рече́ Писа́ние, ре́ки от чре́ва его́ потеку́т во́ды жи́вы». Чре́во зде се́рдце рече́, я́коже и и́нде рече́: «и зако́н Твой посреде́ чре́ва моего́». И где рече́ Писа́ние «я́ко от чре́ва его́ ре́ки потеку́т воды́ жи́вы»? Нигде́же. Что у́бо есть «ве́руяй в Мя, рече́, я́коже рече́ Писа́ние»? Зде то́чку положи́ти подоба́ет, да бу́дет е́же «ре́ки от чре́ва его́ потеку́т» - Его́ изрече́ния. Поне́же бо глаго́лаху мнози: «Сей есть Христо́с», «Христо́с егда́ прии́дет, еда́ мно́жайша зна́мения сотвори́т», показу́я я́ко испра́влен подоба́ет ра́зум име́ти и не от зна́мений си́це, я́коже от Писа́ний уверя́тися. Мно́зи у́бо Его́ и чудоде́йствующа ви́дяще, не я́ко Христа́ прия́ша, хотя́ху же глаго́лати «я́ко не Писа́ния ли глаго́лют, я́ко Христо́с от се́мени Дави́дова прихо́дит»? И сия́ горе́ и до́лу обраща́ше показа́ти хотя́, я́ко не убега́ет е́же си́ми указа́ния. И па́ки их в Писа́ния посыла́ет. И́бо вы́ше глаго́лаше: «Испыта́йте писа́ния», и па́ки: «Есть пи́сано во проро́цех: и бу́дут вси учи́ми Бо́гом», и: «Моисе́й вас усуди́т». И зде: «Я́коже рече́ Писа́ние, ре́ки из чре́ва его́ потеку́т», изоби́льное и незави́стное благода́ти гада́тельствуя, е́же и и́нде рече́: «Исто́чник воды́, ска́чущия в живо́т ве́чный», си́речь, мно́гу прии́мет благода́ть. И́нде у́бо живо́т ве́чный глаго́лет, де́йствующь при́сно. Я́же бо Духа благода́ть, егда́ у́бо в мысль вни́дет и водрузи́тся, вся́кого исто́чника па́че востека́ет, и не оскудева́ет, ниже́ истоща́ется, ниже́ стои́т. Вку́пе у́бо и неоску́дное подая́ния явля́я и неизрече́нное де́йства, исто́чник и ре́ки нарече́: не еди́ну ре́ку, но неизрече́ных. И та́мо же наводне́ние за е́же скака́ти предста́ви. И увиди́т у́бо кто глаго́лемое я́вствене, а́ще прему́дрость Стефа́нову, а́ще Петро́в язы́к, а́ще Па́влово устремле́ние помы́слит - ка́ко ничто́же их пренесе́, ничто́же преложи́: ни наро́дов я́рость, ни мучи́телей воста́ния, ни де́монския наве́ты, ни сме́рти повседне́внии, но я́коже ре́ки мно́ги шуме́нием носи́ми, си́це и вся привле́кше отъидо́ша.

«Сия́ же глаго́лаше о Ду́се, рече́, Его́же хотя́ху приима́ти ве́рующии… Не у́бо бе Дух Святы́й». Ка́ко у́бо проро́цы проро́чествоваша и безчи́слена соде́лаша чудеса́? Апо́столи у́бо не Ду́хом изгоня́ху, но я́же от Него́ о́бластию, я́коже Сам рече́: «А́ще Аз о веельзеву́ле изгоня́ю бе́сы, сы́нове ва́ши о ком изго́нят?». Сие́ же глаго́лаше, я́вляя я́ко не вси Ду́хом изгоня́ху пре́жде Креста́, но я́же от Него́ о́бластию. Егда́ у́бо их хотя́ше посыла́ти, тогда́ глаго́лаше: «приимите Дух Святый», и паки: «прииде на них Дух Святы́й» - и тогда́ зна́мения творя́ху. Егда́ же посла́ их, не рече́ «даде́ им Дух Святы́й», но «даде́ им о́бласть», глаго́ля: «Прокаже́нныя очища́йте, бе́сы изгоня́йте, ме́ртвых воздвиза́йте, ту́не прия́сте ту́не дади́те». О проро́цех же у всех испове́дуется, я́ко Ду́ха Свята́го дая́ние бе: но бе сия́ благода́ть спря́тана и оста́влена, и от земли́ оскуде́вша от дни о́ного, от него́же рече́но бысть: «Оставля́ется дом ваш пуст». И пре́жде о́ногоже нача́ло приима́ше сия́ ре́дкость : не ктому́ бо проро́к у них бе, ниже́ назира́ше их боже́ственая благода́ть.

Егда́ же настава́ше у́бо Дух Святы́й, хотя́ше же про́чее излия́тися изооби́льне, сего́ же разделе́ния нача́ло по кресте́ бысть: не то́кмо изооби́лия, но и бо́льших дарова́ний;

И́бо чудне́йше бе дарова́ние, я́коже егда́ глаго́лет: «Не ве́сте ко́его ду́ха есте». И па́ки: «Не прия́сте бо дух рабо́ты, но прия́сте Дух сыноположе́ния». И́бо дре́внии, и ти́и у́бо Дух име́яху, ины́м же не подая́ху. Апо́столи же, тмы испо́лниша Ду́ха Свята́го.

Поне́же у́бо сию́ хотя́ху приима́ти благода́ть, не уже́ бе дана́, сего́ ра́ди рече́: «Не у́ бо бе Дух Святы́й». Поне́же бо и Госпо́дь о сей глаго́ля благода́ти, евангели́ст глаго́лаше: «Не у́ бо бе Дух Святы́й», си́речь, дан, «поне́же Иису́с не у́ просла́вися», сла́ву нарица́я Крест. Поне́же бо врази́ бы́хом и согреши́вше, и лиша́еми да́ра Бо́жия и богоме́рзцы: благода́ть же примире́ния бе указа́ние, дар же не враго́м, ниже́ ненави́димым, но друго́м дае́тся и благоугоди́вшим. Подоба́ше пе́рвее принести́ ю́же о нас же́ртву, и вражду́ во пло́ти разруши́ти, и бы́ти Бо́гу дру́гом: и тогда́ прия́ти дарова́ние.

А́ще бо при обеща́нии сие́ бысть су́щим ко Авраа́му, мно́го па́че во благода́ти. И сие́ явля́я Па́вел глаго́лаше: «А́ще бо от зако́на насле́дницы, истощи́ся ве́ра: зако́н бо гнев соде́ловает». А е́же глаго́лет, таково́ есть: Обеща́ Бог Авраа́му и се́мени его́ да́ти зе́млю, но недосто́йни бе́ша обеща́ния отро́ди, и от свои́х не возмого́ша благоугоди́ти трудо́в. Сего́ ра́ди вни́де ве́ра, вещь удо́бна, да благода́ть привлече́т и не отпа́дут обе́ты. И глаго́лет сего́ ра́ди: «От ве́ры, да по благода́ти во е́же бы́ти изве́стну обеща́нию». Сего́ ра́ди по благода́ти, поне́же от пото́в не возмого́ша.

Что же ра́ди рек по Писа́ниих, не наво́дит и сведе́тельство? Зане́ растле́нен их разуме́ бе. О́ви бо глаго́лаху, «Сей есть проро́к». Ини́и же, «льстит наро́да». Ини́и глаго́лаху, «не от Галиле́и Христо́с прихо́дит, но от Вифлее́мския ве́си». Ини́и же глаго́лаху, «Христо́с егда́ прихо́дит, никто́же весть отку́ду есть». И разли́чен бе ра́зум, а́ки во мно́жестве смуще́нне: ниже́ бо опа́сне внима́ху глаго́лемым, ниже́ ра́ди е́же навы́кнути. Сего́ ра́ди сим у́бо ничто́же отвещава́ет, а́ще и глаго́лют: «Егда́ Христо́с от Галиле́и прихо́дит?». Нафана́ила же зе́льнейше ре́кша и уязви́тельнейше: «От Назаре́та мо́жет ли что бла́го бы́ти?» похвали́л есть, я́ко вои́стинну изра́ильтянина. Си́и бо и к Никоди́му ре́кше: «Испыта́й и виждь, я́ко от Галиле́и проро́к не воста́», не уве́дети и́щуще глаго́лаху, но про́сте преврати́ти ю́же о Христе́ сла́ву. Он же и́стинны сый рачи́тель и дре́вняя вся опа́сне све́дый, сия́ глаго́лаше. Си́и же ко еди́ному то́кмо зря́ху, е́же преврати́ти я́ко не Христо́с есть: те́мже их ниже́ откры́. И́же бо и себе́ сопроти́вная глаго́люще: и овогда́ у́бо «никто́же весть отку́ду прихо́дит», овогда́же «от Вифлее́ма» - благоявле́нно, я́ко и уве́девше, сопроти́вни бе́ша. Бу́ди бо ме́ста не ве́дяху, воспита́ния ра́ди е́же от Назаре́та, [а́ще и ниже́ сие́ проще́ние имя́ше, не та́мо бо роди́ся,] еда́ и ро́да не ве́дяху, я́ко от до́му и оте́чества Дави́дова? Ка́ко у́бо глаго́лаху, «не от се́мени [ли] Дави́дова прихо́дит Христо́с»? Но и сие́ о́ному спокры́ти хотя́ху, злоде́йственне вся веща́юще.

Что ра́ди не приступи́вше ре́ша: поне́же ины́м у́бо всем чуди́мся, повелева́еши же Тебе́ покаря́тися по Писа́ниих, рцы ка́ко Писа́ния у́бо глаго́лет, я́ко от Вифлее́ма подоба́ет приити́ Христу́, Ты же от Галиле́и прише́л еси? Но ничто́же сих ре́ша, но вся лука́вая веща́ют.

Я́ко бо не и́щуще, ниже́ уве́дети хотя́ще, а́бие наведе́ евангели́ст, «я́ко не́цыи хотя́ху я́ти Его́, и никто́же возложи́ Нань ру́ку свою́». А́ще бо и ничто́же и́но, сие́ у́бо само́е дово́льно бе во умиле́ние их возвести́. Но не умили́шася, я́коже рече́ проро́к: «Раздели́шася и не умили́шася». Таково́ бо есть зло́ба! И не еди́ному же хо́щет уступа́ти, к еди́ному зрит то́кмо, я́ко бы наве́туемаго уби́ти. Но что рече́ Писа́ние? «Ископа́вый ров бли́жнему, впаде́т в него́». Е́же и тогда́ бысть. Они́ бо хотя́ху Его́ уби́ти, я́ко у́бо погаша́юще про́поведь. Бысть же сопроти́вно: про́поведь бо цвете́т Христо́вою благода́тию, а я́же о́нех вся погасо́ша и погибо́ша: и оте́чества, и свобо́ды, и осла́бы, и слу́жбы испадо́ша, и вся́кого лиши́шася благоде́нствия, и бы́ша раби́ и пле́нницы.

Нравоуче́ние, пятьдеся́ть пе́рвое: о е́же не зле сопроти́в твори́ти:

Сия́ у́бо ве́дяще, никогда́ же да наве́туем ины́м, уве́девше, я́ко са́ми на себе́ изощря́ем мечь и глубоча́йшую себе́ дае́м я́зву. Но опеча́лил есть кто и хо́щещи ему́ отмсти́ти? Не отмща́й. Си́це бо отмсти́ти возмо́жеши, а́ще же отмсти́ши не отмщу́я. И да не вознепщу́еши гада́ние бы́ти рече́нное, но и́стинно сло́во. Ка́ко ли и кои́м о́бразом? Я́ко не отмща́я, Бо́га ему́ надста́ви вра́га. Отмща́я же - не ктому́. «Мне бо отмще́ние, Аз возда́м», глаго́лет Госпо́дь.

А́ще бо рабо́в име́ем, и а́ще межи́ собо́ю сорази́вшеся, ни ка́зни, ни му́ки нам попу́стят, но себе́ повелева́ют, - а́ще и тма́ми присту́пят, не то́кмо не отмща́ем, но и негоду́ем, бегле́че глаго́люще и кну́тниче. Все нам попусти́ти подоба́ше: но поне́же себе́ предвари́в отмсти́л еси́, ничто́же стужа́й про́чее. Мно́го па́че Бог, запове́давый Ему́ попуща́ти всех, сие́ рече́т. Ка́ко бо не безме́стно, егда́ от отроко́в на́шых толи́ко истязу́ем любому́дрие и послуша́ние, Влады́це же не попуща́ем, е́же хо́щем рабо́м нам попуща́ти?

Сия́ же глаго́лю, за усе́рдное на́ше о ине́х му́це: поне́же у́бо вои́стинну любому́дрствующему, ниже́ сие́ подоба́ет твори́ти, но проща́ти и оставля́ти согреше́ния, а́ще и не о́но бы́ло бы вели́кое натрижне́ние, оставле́ние вме́сто сих приима́ти.

А́ще бо, рцы ми, зазира́еши согреши́вшему, и что ра́ди и сам согрешаіеши и в та́яже впа́даеши? Досади́л есть? Не сопроти́в досади́ши, поне́же себе́ досади́л еси́. Уязви́л? Не сопроти́в уязви́ши, поне́же разли́чное нигде́же. Опеча́лил? Не сопроти́в опеча́лиши, поне́же приобре́тение ни еди́ноже, но был еси́ о́ному па́ки ра́вен. Си́це его́ обрати́ти возмо́жеши, а́ще с ти́хостию и кро́тце претерпи́ши. Си́це его́ усрами́ши, си́це его́ отсече́ши гне́ва.

Никто́же злым зло́е исцеля́ет, но благи́м зло́е. Сия́ от е́ллин не́цыи любому́дрствуют. Да усрами́мся у́бо, а́ще у́ е́ллин несмы́сленных толи́ку су́щу любому́дрию, мы ху́ждши яви́мся. Мно́зи оби́дени бы́ша, и претерпе́ша. Мно́зи оклеве́тани бы́ша, и не отмсти́ша. Наве́товани бы́ша, и благоде́тельствоваша. Страх же не мал, да не бо́льши нас у них по житию́ обря́щутся, и зе́льнейшу нам му́ку соде́лают.

Егда́ бо, и́же Ду́ха причасти́вшеся, Ца́рствие ча́юще, о небесе́х любому́дрствующии, не боя́щиися гее́нны, повелева́емии а́нгели бы́ти, та́инств наслади́вшеися, - ниже́ в ту же оне́м дости́гнем доброде́тель, кою́ наде́жду прии́мем? А́ще бо иуде́ев превосходи́ти подоба́ет, «а́ще бо не преизбу́дет ва́ша пра́вда, рече́, па́че кни́жник и фарисе́й, не вни́дете в Ца́рствие небе́сное», мно́го па́че е́ллин. А́ще фарисе́ов, мно́го па́че неве́рных. А́ще бо не превосходя́щым нам оне́х жи́тельство, затворе́на суть Ца́рствия врата́.

Егда́ е́ллин яви́мся го́рше, ка́ко сподо́бимся сего́ получи́ти? Вся́ку у́бо го́ресть и гнев и я́рость да отри́нем, та́яже бо глаго́лати мне у́бо неле́ностно, вам же изве́стно. И́бо и врачи́ те́мже мно́жицею де́йствуют чарова́нием. И мы не преста́нем та́яже воглаша́юще, воспомина́юще, уча́ще, моля́ще: и́бо мно́га жите́йских веще́й мгла, и забы́тие нам вотворя́юща, и уче́ния тре́ба есть ча́стаго. Да́же у́бо не всу́е, ниже́ ту́не зде собира́емся, е́же де́лы указа́ние да подади́м, да и бу́дущых получи́м благи́х благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва, со Святы́м Ду́хом, ны́не и при́сно и во ве́ки веко́в. Ами́нь.

Приидо́ша у́бо слуги́ ко архиере́ом и фарисе́ом и ре́ша им они́: Что ра́ди не приведо́сте Его́? Отвеща́ша у́бо слуги́, никогда́же си́це глаго́ла челове́к.

Ничто́же и́стинны я́вственнейше, ничто́же просте́йше, а́ще не злоде́йствуемым; я́коже у́бо злоде́йствующых, ничто́же неудо́бнейше. Се бо фарисе́и у́бо и кни́жницы, и́же не́гли мня́щеся бы́ти прему́дрейши, сопребыва́юще при́сно Христу́ [наве́та ра́ди], и чудеса́ зря́ще, и Писа́ния прочита́юще - ничто́же по́льзовашася, но и вреди́шася. Служи́телие же, ничто́же о сих име́юще рещи́, от еди́ного и то́кмо наро́ду уче́ния я́ти бы́ша, и отше́дше я́ко бы Его́ связа́ти, возврати́шася связа́вшеся чудесе́м. Не ра́зуму их чуди́тися то́кмо есть, я́ко зна́мений не востре́боваша, но от уче́ния еди́ного я́ти бы́ша: не бо у́бо ре́ша, я́ко «никогда́ глаго́ла си́це челове́к»: не у́бо ра́зуму их есть чуди́тися то́кмо, но и дерзнове́нию я́ко к посла́вшым сия́ глаго́лаху к фарисе́ом, к ра́тующым, и вся о сем де́йствующым.

Ева́нгелие: Приидо́ша бо, рече́, слуги́, и глаго́лаху им фарисе́и: «Что ра́ди не приведо́сте Его́?»

Толкова́ние: А е́же приити́, мно́го бо́льше бе е́же пребы́ти: тогда́ бо свободи́лися бы сих ско́рби. Ны́не пропове́дницы быва́ют Христо́вы прему́дрости, и бо́льше показу́ют дерзнове́ние, и не глаго́лют: «Не возмого́хом наро́да ра́ди, зане́ я́ко проро́ку внима́ху», но что: «Никогда́ же глаго́ла си́це челове́к». А́ще и можа́ху о́но рещи́ отвеща́ние, но изъявля́ют свое́ пра́вое изволе́ние. Сие́ бо не чудя́щыхся оне́х то́кмо бе, но и сих оклеве́тающих, я́ко посла́ша вя́жущых Его́ их, Его́же послу́шати подоба́ше. А́ще и ниже́ до́лгаго слы́шаша народоуче́ния, но кро́ткаго. Егда́ бо мысль нелицеприя́тна бу́дет, ниже́ до́лгих слове́с тре́ба есть: таково́ бо и́стина! Что у́бо фарисе́и? Потре́бно умили́тися - сопроти́вное творя́т, сопроти́в порица́ют им: «Еда́ и вы заблуди́ли есте́ глаго́люще?». Еще́ их ласка́ют, и не тя́жестне де́йствуют сло́вом, боя́щеся, да не коне́чне одеру́тся: но я́рость явля́ют. И со щаде́нием веща́ют. Потре́бно вопроси́ти: «что глаго́лав?» и подиви́тися рече́нным. Сие́ у́бо не творя́т: ве́дяху бо я́ко я́тися имя́ху - от зна́мения зело́ несмы́сленаго их смышля́ют. «Что бо ра́ди никто́же от князе́й ве́рова, рече́, в Него́?». Сие́ у́бо Христо́ви ли порица́еши, рцы ми, а [не] неве́ровавшим? «Но наро́д, рече́, не ве́дый зако́на: про́кляти суть». Сие́ бо вам бо́льше осужде́ние, я́ко наро́д у́бо ве́рова, вы же не ве́ровасте. И у́бо я́же ве́дящых зако́на творя́ху они́: ка́ко у́бо про́кляти суть? Вы бо трекля́ти не блюду́щии зако́на, а не они́, зако́ну покаря́ющиися. Подоба́ше же не от неве́рующых осужда́ти Неве́руемаго, непра́в бо о́браз сей. Поне́же и вы не ве́ровасте Бо́гу, я́коже Па́вел рече́: «Что бо, а́ще не ве́роваша не́цыи, еда́ неве́рие их ве́ру Бо́жию упраздни́т? Не бу́ди». И́бо и проро́цы им при́сно порица́ху, глаго́люще: «Слы́шите, кня́зи содо́мстии», и: «Нача́льницы твои́ не покаря́ются», и па́ки: «Не ва́ше есть разуме́ти суд?». И везде́ зе́льнейше напа́дают на них. Что у́бо? И Бо́гу ли кто порече́т сего́ ра́ди? Не бу́ди: оне́х бо сие́ согреше́ние. Ко́е ли у́бо и́но кто́ сотвори́т зна́мение е́же не ве́дети вам зако́на или́ е́же не покоря́тися? Поне́же у́бо ре́ша: «Еда́ от князь кто ве́рова в Него́?». И я́ко не ве́дящии зако́на, после́довательне их каса́ется Никоди́м, си́це глаго́ля: «Еда́ зако́н наш су́дит челове́ка, а́ще не услы́шит от него́?». Показу́ет бо их ниже́ ве́дящых зако́на, ниже́ творя́щых зако́на. А́ще бо он ни еди́ного же повелева́ет уби́ти челове́ка не пе́рвее услы́шавшим, си́и же пре́жде [не́же] услы́шати на сие́ устреми́шася: престу́пницы суть зако́на. И поне́же у́бо ре́ша «никто́же от князь ве́рова Вонь», сего́ ра́ди назна́менует евангели́ст, я́ко «еди́н бе от них», показу́я я́ко и княз́и ве́роваша в Него́. Дерзнове́ние же не у́ подоба́ющее подоба́ющее показова́ху, оба́че присвоя́хуся Христу́.

Зри́ши ли, ка́ко и со щаде́нием обличе́ние наво́дит? Не рече́ бо: «Вы же хо́щете Его́ уби́ти, и про́сте осужда́ете челове́ка я́ко лестьца́». Но не си́це рече́, но кротча́йше неизрече́нное их устремле́ние отсеца́я, и неудержи́мое и уби́йственое: сего́ ра́ди на зако́н обраща́ет сло́во, глаго́ля: «а́ще не услы́шит» опа́сне, «и позна́ет что твори́т», якобы́ ниж́е послуша́ния тре́ба про́стаго, но и опа́снаго. Сие́ бо есть е́же «позна́ет, что твори́т»: что хо́щет, и что ра́ди, и о ком. Еда́ о развраще́нии гражда́нства и я́ко враг ли? Недоуме́вшеся у́бо, поне́же ре́ша «никто́же от князь ве́рова в Него́», ниже́ зе́льне, ниже́ со щаде́нием ему́ принесо́ша. Кое́ после́дование имя́ше, рцы ми, ре́кшу о́ному я́ко «зако́н наш не су́дит ни еди́наго же», рещи́: «Еда́ и ты от Галиле́и еси́?». Потре́бно бо показа́ти, я́ко не неразсу́дне посла́ша его́ призыва́юще, не́жели я́ко не подоба́ет пода́ти сло́ва: они́ свере́пейше и я́ростнейше де́йствуют сопротиворе́чием: «Вопроси́ и виждь, я́ко от Галиле́и проро́ка не воста́».

Что бо рече́ челове́к? «Я́ко проро́к есть», рече́. Я́ко несужде́на уби́ти не подоба́ше. Они́же досади́тельне, я́ко неве́дящу о писа́ниих, ничто́же сия́ наведо́ша. А́ки бы а́ще кто рекл, «иди́ уве́ждь». Сие́ бо есть: «Вопроси́ и виждь». Что у́бо Христо́с? Поне́же горе́ и до́лу Галиле́ю обраща́ху и проро́ка, свобожда́я всех сего́ чужда́го непщева́ния и показу́я я́ко не еди́н от проро́к есть, но ми́ру Влады́ка, рече́: «Аз есмь свет ми́ру» - не Галиле́и, ни Палести́не, ниже́ Иуде́и. Что ли у́бо иуде́и? «Ты ли о Себе́ сведе́тельствуеши? Сведе́тельство Твое́ несть и́стинно». О́ безу́мия! К писа́ниям посла́ше горе́ и до́лу, и глаго́лют: «Ты ли о Себе́ сведе́тельствуеши?». Что же ли сведе́тельствова? «Аз есмь свет ми́ру». Ве́лие рече́нное, и вои́стинну ве́лие. Но не зело́ их уязви́, поне́же у́бо ниже́ сравня́ет ны́не Себе́ Отцу́, ниже́ Сын О́ного рече́ бы́ти, ниже́ Бог, но Свет еще́. Хотя́ху у́бо преврати́ти и сие́, и́бо мно́го сие́ бо́льше е́же рещи́: «После́дуяй Мне, не и́мать ходи́ти во тме». Свет и тму зде мы́сленне глаго́ля, е́же есть, «не пребу́дет в заблужде́нии». Зде и Никоди́ма привлача́ет и возво́дит, я́ко зело́ дерза́вшаго, и слуг похваля́ет сие́ сотвори́вшых. Е́же бо воззва́ти, сие́ есть состро́ити хотя́щаго, я́ко да и о́нех услы́шит. Вку́пе же их гада́тельствует, о́тай лесть плету́щых, и во тме и в заблужде́нии, но Све́та не преодоле́ют. И Никоди́ма воспомина́ет глаго́л о́нех, я́же глаго́лаше пре́жде: «Всяк зла́я творя́й, ненави́дит свет, и не прихо́дит к све́ту, да не явя́тся дела́ его́». Поне́же бо глаго́лаху, я́»ко никто́же от князь ве́рова в Него́», сего́ ра́ди рече́: «Зла́я творя́й не прихо́дит к све́ту», показу́я я́ко не све́та не́мощи е́же не приити́, но оне́х развраще́ннаго ра́зума. Отвеща́ша и ре́ша ему́: «Ты ли о Себе́ сведе́тельствуеши?». Что у́бо той? «А́ще и Аз сведе́тельствую о Себе́, сведе́тельство Мое́ и́стинно есть: я́ко вем, отку́ду гряду́ и где иду́». Е́же предвари́в сие́ рех, сие́ си́и предлага́ют я́ко нача́льне рече́нно. Что у́бо Христо́с? Превраща́я сие́ и показу́я, я́ко о́на, я́ко к ним и непщева́нию их бесе́доваше, челове́ка Его́ непщу́ющых про́ста. Рече́: «И а́ще Аз сведе́тельствую о Мне, и́стинно есть сведе́тельство Мое́: я́ко вем, отку́ду гряду́». Что есть сие́? От Бо́га есмь Бог, и Сын Бо́жий. Бог же, Сам Себе́ достове́рен сведе́тель. «Вы же не ве́сте»: злохо́тни же рече́, и ве́дяще притворя́етеся не ве́дети, но от челове́ческия мы́сли вся веща́ете, ничто́же вя́щше хотя́ще явля́емаго разуме́ти. «Вы по пло́ти су́дите». Я́коже е́же по пло́ти жи́ти, сие́ есть е́же зле жити. Си́це е́же по пло́ти суди́ти, непра́ведне суди́ти есть. «Аз не сужу́ ни еди́ного же. И а́ще сужу́, суд Мой пра́веден есть». А е́же глаго́лет, таково́ есть. Непра́ведне су́дите. И а́ще «непра́ведне суди́м» рече́, что ра́ди не порица́еши, что ра́ди не му́чиши, что ра́ди не осужда́еши? «Я́ко не на сие́ приидо́х» рече́. Сие́ бо есть, е́же «Аз не сужу́ ни еди́наго же. И а́ще сужу́ Аз, суд Мой и́стинен есть». Поне́же а́ще восхоте́л бых суди́ти, вы у́бо от осужде́нных бы́ли бы. И сия́ не судя́ глаго́лю, я́ко не дерза́я: я́ко а́ще бы суди́л, уби́л бых у́бо вас, и́бо а́ще суди́л бых пра́ведне, у́бо вас осуди́л бых. Но ны́не вре́мя суда́ несть. О бу́дущем же у́бо Суде́ назна́мена, я́ко еди́н несмь, но Аз и посла́вый Мя Оте́ц. Зде назна́мена, я́ко не Той еди́н их осу́дит, но и Оте́ц. Та́же сие́ спокры́л есть, во Свое́ сведе́тельство возводя́: «И в зако́не же на́шем пи́шется, я́ко двои́х челове́к сведе́тельство и́стинно есть». Что у́бо реку́т зде еретицы́? Что вя́щше име́ет челове́ков, а́ще про́сте си́це отъи́мем рече́нное? О челове́цех бо сего́ ра́ди уста́вися сие́, поне́же бо по себе́ несть достове́рен. О Бо́зе же, ка́ко у́бо име́ет сие́ сло́во? Ка́ко у́бо рече́ся дво́е? Еда́ поне́же два, или́ поне́же челове́цы, сего́ ра́ди два?

А́ще бо поне́же два суть, что ра́ди не прибеже́ ко Иоа́нну, ниже́ рече́ «сведе́тельствую Аз о Себе́, и сведе́тельствует о Мне Иоа́нн»? Что ра́ди ко а́нгелу, что ра́ди ко проро́ком? И́бо и безчи́сленыя у́бо ины́ обре́л бы сведе́тельства. Но не сие́ хо́щет показа́ти то́кмо, я́ко два, но я́ко и того́же существа́. «Глаго́лаху ему́: кто есть Оте́ц Твой?». Та́же рече́: «Ниже́ Мене́ ве́сте, ниже́ Отца́ Моего́». Поне́же у́бо ве́дяще, я́ко не ве́дяще глаго́лаху, и я́ко искуша́юще Его́: ниже́ отве́та их сподобля́ет. Сего́ ра́ди глаго́лет про́чее ясне́йше вся, и с мно́жайшым дерзнове́нием от зна́мений и уче́ния после́дующых сведе́тельство взем, и е́же близ бы́ти Кресту́. «Вем бо, рече́, отку́ду гряду́». Сие́ не зело́ их косну́ся. А е́же «не ве́сти, иде́же Аз иду́», наипа́че их устраши́ло у́бо, я́ко не имя́щу Ему́ пребы́ти в сме́рти.

Что же ра́ди не рече́: «вем, я́ко Бог есмь», но: «вем, отку́ду гряду́»? При́сно смире́нная смеша́ет высо́ким, и сама́я же сия́ спря́тает. Рек бо «я́ко Аз сведе́тельствую о Мне», и показа́в, прии́де на смире́нное: а́ки бы глаго́лал: «Вем от Кого́ по́слан есмь, и к Кому́ отхожу́». Си́це бо ничто́же име́ли бы сопроти́в рещи́, слы́шавше я́ко от О́ного по́слан есть, и ко О́ному отхо́дит. Не рех бо, рече́, что ло́жно: отню́дуже приидо́х, и та́мо отходя́, ко И́стинному Бо́гу. Вы же не ве́сте Бо́га, сего ра́ди по пло́ти су́дите. И́же бо толи́ких слы́шавше зна́мений же и обличе́ний, еще́ глаго́лют: «Несть и́стинен». И Моисе́я непщу́ете достове́рна, и о ни́хже и о ины́х, и о и́хже о Себе́ глаго́лаше: Христа́ же не ктому́, по пло́ти суди́ти есть. «Аз же не сужу́ ни еди́наго». И у́бо рече́, я́ко «Оте́ц не су́дит ни еди́наго же», ка́ко у́бо зде рече́: «И а́ще сужу́ же Аз, суд Мой пра́веден есть, зане́ несмь еди́н»? Па́ки к непщева́нию оне́х веща́ет, си́речь, суд Мой Оте́чь есть. Не у́бо и́нако суди́л бы Оте́ц судя́, ра́зве я́коже Аз. И не у́бо и́нако Аз, ра́зве я́коже Оте́ць Что же ра́ди, и зако́на воспомяну́? Не бо́ непщева́ху достове́рна бы́ти Сы́на, а́ще не О́тче сведе́тельство прия́л бы. И́накоже, ниже́ ста́ло бы рече́нное: о челове́цех бо егда́ два чу́ждей ве́щи сведе́тельствуют, тогда́ сведе́тельство есть и́стинно. Сие́ бо есть сведе́тельствовати двема́. А́ще хо́щет кто себе́ сведе́тельствовати, не ктому́ два суть. Зри́ши ли, я́ко ни за что́же и́но сие́ рече́, ра́зве да пока́жет Единосу́щна Себе́, и Собо́ю па́ки пока́жет ничто́же ме́ньше име́юще Отца́? Зри у́бо госпо́дьство: «Аз есмь сведе́тельствуя о Себе́, и сведе́тельтсвует о Мне посла́вый Мя Оте́ц». Не у́бо же, а́ще ме́ньшаго существа́ был, сие́ положи́л бы. Ны́не же, да не вознепщу́еши я́ко числа́ ра́ди прия́то есть, зри о́бласть, ничто́же име́ющу премене́но.

Сведе́тельствует челове́к, егда́ о себе́ достове́рен бу́дет, и не егда́ сведе́тельства тре́бует: и сие́ в чу́ждей ве́щи. В свое́й же егда́ сведе́тельтсва тре́бует е́же от ина́го, не ктому́ есть достове́рен. Зде же все сопроти́вное. И́бо во Свое́й ве́щи сведе́тельствуя, и от ина́го глаго́ля сведете́льстоватися, достове́рну бы́ти рече́ отвсю́ду, показу́я Свое́ сведе́тельство о госпо́дьстве.

Что у́бо ра́ди рек: «Несмь еди́н, но Аз и посла́вый Мя Оте́ц», и е́же «дву челове́к сведе́тельство есть и́стинно» - неумолча́но наведе́: «Аз есмь сведе́тельствуя о Себе́»?. Я́вствено, я́ко госпо́дьство явля́я. И пе́рвее у́бо Себе́ положи́л есть: «Аз есмь сведе́тельствуя о Мне» - показу́ет зде и единоче́стие, и я́ко ничто́же по́льзуются Бо́га глаго́люще ве́дети Отца́, Его́ не ве́дяще. И сие́ вино́вно бы́ти рече́, е́же Его́ не хоте́ти ви́дети. Глаго́лет, я́ко не мо́щно ви́дети Отца́, Его́ кроме́, да поне́ си́це их привлече́т в Свое́ позна́ние. Поне́же бо оста́вльше Его́, при́сно Отца́ иска́ху уве́дети, глаго́ла: «Не мо́жете ве́дети Отца́ без Мене́». Я́коже и́же Сы́на ху́ляща, не Его́ ху́ля то́кмо, но и Ро́ждшаго.

Нравоуче́ние пятьдеся́ть второ́е: о е́же подоба́ет христиани́ну и житие́ име́ти доброде́тельно:

Сия́ да бежи́м мы и да сла́вим Сы́на. И́бо а́ще не естества́ был бы того́же, не бы у́бо си́це рекл. А́ще бо научи́л бы то́кмо, иносу́щен же был бы, мо́щно и Его́ не ве́дящу ве́дети Отца́, и па́ки не бе Его́ не ве́дящу, вся́чески ве́де[ти] Отца́. Ниже́ бо челове́ка ве́дый весть а́нгела. Ей, рече́: и́бо тварь ве́дый, весть Бо́га. Ника́коже. Мно́зи бо суть тварь зря́щии, па́чеже вси челове́цы: зрят бо ю́, и Бо́га не ве́дят. Да прославля́ем у́бо Сы́на Бо́жия, не сла́вою сею́ то́кмо, но и е́же де́лы: сия́ бо, о́ноя кроме́ ничто́же есть.

«А́ще же ты, рече́, иуде́й имену́ешися, и почива́еши на Зако́не и хва́лишися о Бо́зе, науча́яй у́бо ина́го, себе́ ли не учи́ши? В зако́не хваля́йся, преступле́нием зако́на Бо́га безче́стиши». Зри, да не ка́ко и мы о пра́вости ве́ры хва́лящеся, за е́же не соглаша́юще ве́ре житие́ пока́зовати, Бо́га безче́стим, творя́ще Его́ ху́лима бы́ти. И́бо учи́теля вселе́нныя, и ква́са, и све́та, и соль бы́ти хо́щет христиани́на. Что же ли есть свет? Житие́ светя́ще ,ничто́же име́юще потемне́но. Свет не себе́ потре́бен, ниже́ соль, ниже́ квас, но во ины́х показу́ют по́льзу. Си́це не о свое́й по́льзе истя́зани бу́дем то́кмо, но и о ины́х. Соль бо, а́ще не со́лит, несть соль. И и́но же не́что сие́ показу́ет, я́ко а́ще са́ми испра́вим, бу́дет вся́ческий . Ни, до́ндеже са́ми не испра́вим, ниже́ ины́х по́льзовати мо́жем. Ничто́же бу́е, ничто́же сла́бо от нас. Таковы́ бо мирски́я ве́щы, такова́ жите́йская попече́ния. Сего́ ра́ди де́вы бу́яя отве́ржени бы́ша, зане́ о бу́их мирски́х ве́щех упражня́хуся, зде у́бо собира́юще, а иде́же подоба́ше не полага́юще. Страх у́бо есть, да не и мы то́жде постра́жем. Страх у́бо, да не и мы во скве́рныя облече́ни ри́зы отъи́дем, иде́же вси име́ют све́тлы и объявле́ны. Ничто́же бо греха́ скверне́йше, ничто́же нечи́стейше. Те́мже естество́ его́ проро́к сказу́я, вопия́ше: «Восмерде́ша и согни́шася ра́ны моя́». И а́ще хо́щеши уве́дети греха́ злови́дное, помы́сли его́ во е́же бы́ти, егда́ вожделе́ния свободи́шися, егда́ ни ктому́ стужа́ет огнь: и тогда́ у́зриши, како́в есть грех. Пом́ысли я́рость, егда́ в тишине́ бу́деши. Помы́сли лихоима́ние, егда́ вне бу́деши стра́сти. Ничто́же студне́йше, ничто́же скверне́йше, хище́ния и лихоима́ния.

Сия́ ча́сте глаго́лем, не стужа́ти вам хотя́ще, но приобрести́ не́что ве́лие и чу́дно. И́же бо от е́же еди́ною не испра́вив, не́гли от е́же второ́е услы́шати, сотвори́т сие́. И и́же второ́е прете́к, от тре́тияго испра́вит. Бу́ди же всем нам свободи́вшымся лука́вых всех благоуха́ние Христо́во име́ти, я́ко Тому́ сла́ва со Отце́м и со Святы́м Ду́хом, ны́не и при́сно и во ве́ки веко́в. Ами́нь.

Су́щее: Сни́деже Ия́ков во Еги́пет, и сконча́ся сам и отцы́ на́ши. И пренесе́ни бы́ша в Сихе́м, и положе́ни бы́ша во гро́бе, е́же купи́ Авраа́м цено́ю сребра́, от сыно́в Еммо́реов, Сихе́ма. И я́коже прибли́жашеся вре́мя обетова́ния, и́же кля́тся Бог Авраа́му, возрасто́ша лю́дие и умно́жишася во Еги́пте, до́ндеже наста́ царь ин во Еги́пте, и́же не зна́ша Ио́сифа.

Толкова́ние Златоу́стаго: В Сихе́м по уме́ртвии погребены́ бы́ша и́же со Авраа́мом и вси патриа́рси, е́же нарица́шеся Сики́ма. То у́бо ме́сто купи́ Авраа́м от Емо́ра, и погребе́ ту Са́рру. Зри, я́ко в толи́це четы́риста лет не умно́жи Бог изра́ильтяны в Еги́пте, но егда́ прии́де вре́мя е́же избы́ти, тогда́ возрасто́ша рече́ и умно́жишася.

Су́щее: Сей зле умы́слив о ро́де на́шем, и озло́би отца́ на́ша умори́ти младе́нца их и не оживи́ти, в не́же вре́мя роди́ся Моисе́й. И бе уго́ден Бо́гови, и́же воспита́н бысть ме́сяца три в до́му отца́ своего́. Отве́ржену же ему́, взят его́ дщи фарао́нова и воспита́ его́ себе́ в сы́на. И нака́зан бысть Моисе́й всей прему́дрости еги́петстей, бе же си́лен в де́лех и словесе́х.

Толкова́ние Златоу́стаго: Лука́выми у́бо ко́зньми победи́ти их фарао́н совеща́, си́речь лю́тыми тя́жкими бре́мены искуси́ти их. Се у́бо ди́вно есть, я́ко и́же хотя́ше бы́ти предста́тель лю́дем, ни посе́м, ни пре́жде сего́, но посреде́ само́й я́рости ражда́ется. «И воспита́н бысть ме́сяца три в дому́ отца́ своего́» рече́. Но егда́ челове́ческая наде́жда упраздни́ся, и ме́тнуша его́, тогда́ Бо́жие благодея́ние светя́щеся пока́зовашеся. А́ще о́но ди́вно бе, я́ко от бра́тий свои́х про́дан быв, зде па́ки чу́днейшее, я́ко царь того́ пита́ше: хотя́щаго ему́ нача́льство низложи́ти, той сам хоте́ его́ погуби́ти. Ви́диши ли повсю́ду ме́ртвым я́коже рещи́ прообразу́ющим воскресе́ние? «И спасе́н бысть Моисе́й» - о́браз се бысть Це́ркве, о́бщаго спасе́ния на́шего: ковче́г у́бо от дре́ва бе, и дре́во от воды́, и спасе́ние бысть отрече́нному. И взят его́ жена́ не иуде́аныня, но от язы́к еги́птяныни: и вси сия́ бы́ша, да не я́же от Моисе́я ничто́же мни́тся челове́ческо бы́ти. Роди́телие роди́ша, но ме́тнуша. Еги́птяне воспита́ша, но не роди́ша. Ма́ти воскорми́, но и́на дасть мзду. Те́мже поне́же про́мыслом Бо́жиим, а от челове́к обрета́ется - челове́к есть Бо́жий. Си́це роди́вся и спасе́н бысть Моисе́й, наказу́ется прему́дрости еги́петстей. И́мже о́бразом хотя́ща на брань поити́, пре́жде исхо́дники посыла́ются, да сопроти́вных помышле́ния уве́дят: и та́ко на́чнут бра́ни. Си́це бысть Моисе́й: поне́же у́бо хотя́ше на еги́птяны бра́тися, благоче́стно еги́птяном приложе́н бысть, да я́же во Еги́пте смо́трит, и Бо́га па́че челове́ка почте́т.

Су́щее: И я́коже наполня́шеся ему́ четы́редесят лет вре́мя, взы́де на се́рдце ему́ посети́ти бра́тию свою́, сы́ны Изра́илевы. И ви́дев не́коего оби́дима, посо́бствова. И сотвори́ отмще́ние оби́димому, уби́в еги́птянина. Мня́шеже разуме́ти бра́тиям свои́м, я́ко Бог руко́ю его́ даст им спасе́ние, они́же не разуме́ша.

Толкова́ние Евсе́вия епи́скопа Маси́йска: А е́же бра́тию их нари́чет, не пло́ти ра́ди толи́ко, ели́ко по своему́ прилежа́нию. Уби́ Моисе́й еги́птянина, не гне́вом, ни я́ростию подвиза́ем, но ре́вностию Бо́жиею. Все же е́же а́ще сотвори́тся в сло́во Бо́жие, Бо́жие благоче́стие есть . А́ще и уби́йство Бо́га ра́ди бу́дет, несть уби́йство. И́бо Финее́с два еди́ною руко́ю уби́в, слы́ша: «Ста Финее́с, и угоди́, и преста́ сечь». Разли́чно бо есть прилежа́ние уби́йцы благочести́вому. И вещь бы́вшая Финее́сом, свяще́нство па́че бе́яше, а не уби́йство. Толи́ко возмо́же сугу́бое се уби́йство, я́ко сме́рти простре́вшися на Изра́иля, он уста́ви. И ели́ко возмо́же кади́ло отца́ Ааро́на, толи́ко возмо́же уби́йство, па́че же благоче́стие, е́же бо бысть о́браз бе неви́димых веще́й : я́ко хотя́ше Бог Моисе́ом еги́птяны погуби́ти, глаго́лемыя же изра́ильтяны спасти́. Глаго́лет же и се: я́ко сло́вом то́чию уби́ Моисе́й еги́птянина, я́коже и верхо́вный Петр укра́дших це́ну села́ и солга́вшим сло́вом погуби́.

Су́щее: Во у́трий же день яви́ся им тя́жущимся , и привлача́ше их во смире́ние рек: «Му́жие, бра́тия есте́ вы: вску́ю оби́дите себе́?». Оби́дяй же бли́жняго, отри́ну и́, рек: «Кто тя поста́ви кня́зя или́ судию́ над на́ми? Еда́ уби́ти мя ты хо́щеши, и́мже о́бразом уби́л еси́ вчера́ еги́птянина?». Бежа́ же Моисе́й о словеси́ сем, и бысть пришле́ц в земли́ мадиа́мстей, иде́же роди́ сы́на два.

Толкова́ние Златоу́стаго: Па́ки благода́тель благоразу́мно показу́ется: я́коже бо тогда́ злострада́вшие Ио́сифом спасо́шася, та́ко и ны́не злопострада́вшии Моисе́ом спаса́ются. Что у́бо а́ще несть уби́л его́ де́лом? Моисе́я глаго́лю сло́вом уби́ти. «Кто тя поста́ви рече́ кня́зя» и про́чая. «И бежа́ Моисе́й о словеси́ сем». Они́ у́бо от земли́ своея́ в чу́жду отъидо́ша, си́и же от чу́ждей в чу́жду отгоня́ют бегу́щаго. Зри наве́тники наве́тующим: пови́нны спасе́ния бы́вше, губи́тельством не погуби́ е, и не то́чию се, но и тех ра́ди спасе́ния бы́ша су́ща непщева́ху, спаси́теля своего́ восхоте́вша уби́ти: и ниже́ та́ко его́ уби́ти возмого́ша. Ви́диши ли, я́ко и́миже дия́вол покуша́шеся разори́ти обетова́ние Бо́жие, те́миже возвраща́шеся. Ты́яже глаго́лы и к Христу́ глаго́лаху: «Кто Тя поста́ви Кня́зя и Судию́ над на́ми?». Си́це обы́чаи иуде́ом благода́теля ху́лити. Но не бе́гство Моисе́ово угаси́ я́рость их, но смотре́ние Бо́жие, я́коже и Христо́ва смерть: о́во бо дре́вным спасе́ние бысть, о́важе всему́ ми́ру. Отхо́дит Моисе́й от Еги́пта в Мадиа́м, и Христо́с от иуде́й - в Галиле́ю.

Су́щее: И испо́лньшемся ле́том четы́редесять, яви́ся ему́ в пусты́ни горы́ Сина́йския а́нгел Госпо́день в пла́мени о́гнене в купине́. Моисе́й же ви́дев, дивля́шеся виде́нию. Приступа́ющу же ему́ разуме́ти, бысть глас Госпо́день к нему́: «Аз Бог оте́ц твои́х, Бог Авраа́мов, и Бог Исаа́ков, и Бог Ия́ковль».

Толкова́ние Златоу́стаго: Ви́диши, я́ко не отсеца́ет вре́мя смотре́ние Бо́жие. Егда́ у́бо бегле́ц бе, егда́ стра́нен, егда́ мно́го вре́мя в земли́ чужде́й сотвори́, егда́ и ча́да роди́, и ника́коже ктому́ не ча́я - тогда́ а́нгел ему́ явля́ется, и глас Сы́на Бо́жия слы́шит, я́коже челове́к, в пусты́ни, а не во хра́ме. Зри коли́ка чудеса́ быва́ют, и ника́коже же́ртва: и ни в само́й той пусты́ни, но в купине́: и се како́в глас ему́ показу́ется: «Аз есмь Бог Авраа́мов, и Бог Исаа́ков, и Бог Ия́ковль, И́же вели́каго сове́та а́нгел». Сие́ глаго́ля Стефа́н, показу́ет неизрече́нное человеколю́бие Бо́жие: явля́ет бо Себе́ вся́ческим Бог, и явле́ну бы́вшу, отвраща́ет лице́ Моисе́й. Зна́мение явле́нно бы́вшее, е́же не мощи́ сыно́м Изра́илевым благоле́пную Сы́на Бо́жия ви́дети сла́ву, себе́ теле́сне явля́юща.

Су́щее: Тре́петен же быв Моисе́й, не сме́яше смотре́ти. Рече́ же ему́ Госпо́дь: «Разреши́ сапо́г ногу́ твое́ю, ме́сто бо на немже стои́ши, земля́ свята́ есть. Ви́дя ви́дех озлобле́ние люде́й Мои́х, и́же во Еги́пте, и стона́ние их услы́шах, и снидо́х изъя́ти их. И ны́не гряди́, и послю́ тя во Еги́пет».

Толкова́ние Диди́мово: Си́це стра́шно бе ви́димое. «Тре́петен же быв Моисе́й, не сме́яше смотри́ти» рече́, разреше́ние же сапого́м - ме́ртвости и тли зна́мение есть, поне́же всяк сапо́г от мо́щи ме́ртвому живо́тну есть, и растле́вшему. Непристу́пен бо сый Христо́с, су́щих в зако́не предочища́ти скве́рну грехо́вную тре́бовавшу: подоба́ет у́бо вои́стинну вся́кого ме́ртвенного и плотско́го мечта́ния я́ко не́ких сапо́г отреша́ти, к боже́ственных ве́дений взы́ти показу́ющагося ума́.

Толкова́ние Златоу́стаго: «Ме́сто бо на не́мже стои́ши земля́ свя́та есть» рече́. Ника́коже храм и ме́сто, но явле́нием и де́йством Христо́вым. Мно́жае же ди́внейшее се: ме́ста хра́му свята́я святы́х, та́може ника́коже яви́ся си́це Бог, ника́коже та́ко тре́петен быв Моисе́й. «Ви́дя ви́дех озло́бленыя лю́ди моя́». Зри, ка́ко показу́ет я́ко и благодая́ньми и муче́ньми и чудесы́ воспомина́ше им, они́же вы́ну ты́и же бы́ша. «И воздыха́ния их слы́шах» рече́. Сия́ слы́шаще, в ско́рбех су́ще к Нему́ прибега́ем. А́ще ли кто глаго́лет: «Почто́ оста́ви их озло́битися?» - Та́мо бо па́че озлобле́ния вся́кому пра́ведному вины́ и мзды быва́ют. Та́же: «Чесо́ ра́ди их озло́би?» - Да пока́жет си́лу Свою́, я́коже мо́жет не то́чию се, но да и тех нака́жет. Зри у́бо, егда́ в пусты́ни, тогда́ ути́ша, одебеле́ша, и ушире́ша, и повсю́ду поко́й - зло им есть. Сего́ ра́ди изнача́ла Ада́му глаго́лаше: «Проклята́ земля́ в де́лех твои́х, в печа́лех сне́си ту вся дни живота́ твоего́». И да от мно́га озлобле́ния прише́дше в поко́й, благодаре́ния Бо́гови воздадя́т. Вели́ко бо есть благоско́рбь, слы́ши у́бо проро́ка глаго́люща: «Бла́го мне, я́ко смири́л мя еси́». А́ще вели́ким чу́дным му́жем бла́го есть скорбь, кольми́ па́че нам.

Су́щее: Сего́ Моисе́я его́же отри́нуша ре́кше: «Кто тя поста́ви кня́зя над на́ми и судию́?», сего́ Бог кня́зя и изба́вителя посла руко́ю а́нгела я́вльшагося ему́ в купине́. Сей изведе́ их, сотво́рь чудеса́ и зна́мения в земли́ еги́петстей, и в Чермно́м мо́ри, и в пусты́ни лет четы́редесять. Се есть Моисе́й реки́й сыно́м Изра́илевым: «Проро́ка вам воздви́гнет Госпо́дь Бог ваш от бра́тии ва́шея, я́ко мене́ Того́ послу́шайте».

Толкова́ние Златоу́стаго: Его́же отреко́шася рече́ и уничижи́ша, сего́ Бог воздви́гнув, посла́. Я́коже и са́ми глаго́лаху «не и́мамы царя́ то́кмо ке́саря». Показу́ет, я́ко и зде быва́емая Ду́хом быва́ют. «Воздви́гнет Госпо́дь Бог от бра́тий ва́ших проро́ка я́ко мене́». Не диви́ся, а́ще уничиже́нным от челове́к, Ца́рствие Свое́ Христо́с да́рует, е́же и на Моисе́и бысть: и́же Бо́гови бесе́довав, и́же от пресла́вных спасе́н быв. Показу́ет, я́ко вся́ко испо́лнитися подоба́ет проро́честву, и не проти́витися ему.

Толкова́ние Кири́ллово: Провозглаша́ет бо дре́вле своего́ рожде́ния вочелове́чение, Бог и Оте́ц, и я́ко Вторы́й на нас законоположи́тель пока́жется. Глаго́лав бо дре́вним а́нгелы Зако́н, в после́дниих же ве́ка време́н, Сам Соде́тель в нас показа́ся, и но́ваго быв заве́та А́нгел.

Су́щее: Сей есть, бы́вый в це́ркви в пусты́ни со а́нгелом, глаго́лавшем ему́ в горе́ Сина́йстей, и отце́м на́шим, и́же прия́т словеса́ жи́ва да́ти нам. Его́же не восхоте́ша послу́шати отцы́ на́ши, но отри́нуша и́, и обрати́шася се́рдцем свои́м во Еги́пет. Ре́кше Ааро́ну: «Сотвори́ нам бо́ги и́же предъи́дут пред на́ми. Моисе́й бо сей, и́же изведе́ нас от земли́ еги́петския, не ве́мы что бысть ему́». И сотвори́ша теле́ц во дни о́ны, и принесо́ша же́ртву и́долу, и веселя́хуся в де́лех руку́ свое́ю.

Толкова́ние Златоу́стаго: Показу́ет, я́ко не зна́мения то́кмо сотвори́, но и зако́н дасть. Я́коже и Христо́с, си́це и сей пре́жде зна́мения твори́т, и тогда́ зако́н полага́ет: но иуде́и не послу́шаша его́. Ви́диши ли, я́ко нача́ло и ко́рень спасе́ния от иуде́й бысть? «Со а́нгелом рече́ глаго́лющим ему́, и́же с ним бе в це́ркви в пусты́ни». И зде чудесы́ воспомина́ет, вели́ку бы́вшему в пусты́ни. Что же суть словеса́ жи́ва, си́речь проро́чества? И́мже коне́ц де́лы показова́шеся. О безу́мию! «Сотвори́ нам рече́ бо́ги и́же по́йдут пред на́ми». Ка́мо? В Еги́пет. Зри, ка́ко не хотя́ху раздели́тися от язы́к еги́петских. Что глаго́леши, о́ иуде́ю, не ча́еши изводя́щаго, но бежи́ши благодея́ния и благода́теля отверга́ешися? И зри, ка́ко досажда́ют: Моисе́й бо се рече́: «Изведи́ ны от земли́ еги́петски» - ника́коже Бо́жие и́мя, но все на Моисе́я глаго́лаху. Иде́же бо не благодари́ти хотя́ху, Моисе́я приво́дят посреде́, а иде́же зако́ну ве́ровати хотя́ху - не ктому́ Моисе́я имену́ют, но что глаго́лют? «Сотвори́ нам бо́ги» рече́. Не реко́ша Бо́га, но бо́ги. А́ще Моисе́я его́же ве́дяху и Бо́га толи́кими зна́меньми я́вльшагося не то́чию не послу́шаша, но и и́нако досади́ша е́же сотвори́ти и́долы, кольми́ па́че Христа́? Теле́ц Изра́иль сотвори́ и Бо́га отве́ржеся, не уви́де Благода́теля. И глаго́ла Ааро́нови: «Сотвори́ нам бо́ги». И а́ще сотвори́т, ка́ко бо забыва́ема бу́дут? Си́це зло́ба сего́ помрача́ет. Отсю́ду про́чая обы́чаи си́и, отсю́ду пе́рвый сотвори́ша и́долом же́ртвы. Сего́ ра́ди назна́менает проро́к: «И сотвори́ша теле́ц в Хори́ве, и принесо́ша же́ртвы и́долу». Не бе у́бо ника́коже в них и́мя же́ртвеное, но повеле́ния жи́ва и сло́ва жи́ва.

Су́щее: Отврати́жеся Бог и предаде́ их служи́ти во́ем небе́сным. Я́коже пи́шет в кни́зе проро́к: «Еда́ заколе́ние и же́ртвы принесо́сте ми, лет четы́редесяте в пусты́ни, до́ме Изра́илев?».

Толкова́ние Златоу́стаго: А е́же «преда́сть их во́ем небе́сным служи́ти» - ме́сто их оста́ви. Пи́сано бо есть, я́коже апо́стол Па́вел глаго́лет: «Преда́сть их Бог в неиску́сен ум», си́речь е́же преда́тися, оста́ви их. Глаго́лет бо, поне́же таково́е име́яху иуде́и жела́ние е́же служи́ти тва́ри па́че Творца́, возбрани́в мно́гажды проро́ками таково́е непщева́ние, о́нем же на се пребыва́ющим - оста́ви их на во́ли свое́й. А е́же «от бра́тии», и́ну явля́ет бы́ти во́лю Бо́жию, и и́ну бы́ти попуще́нию. Бе бо Ему́ во́ля е́же и зако́н положи́: «Го́споду Бо́гу своему́ поклони́шися, и Тому́ еди́ному послу́жиши». Пребыва́ющым же в нече́стии, оста́ви их: не по ну́жди у́бо привлачи́т служи́ти Ему́, да не уничижи́т самовла́стное их. Но наказу́ет е́же не согреша́ти, согреша́юще же не зло́бствует, показу́я человеколю́бие, вку́пе же ча́я обраще́ния самовла́стию и вре́мя покая́ния. Пребы́вши бо, та́мо му́чит го́рько. «Во́ем же небе́сным» не а́нгелом глаго́лет, но звезда́м, и́мже и ве́ру приноша́ху: тельца́ у́бо я́ко денни́цу, луну́ же я́ко небе́сную цари́цу. Си́це бо и во Иереми́и проро́це пи́шет: «Егда́ заколе́ния и же́ртвы принесо́сте Ми» рече́, си́речь не и́мате рещи́ я́ко от е́же Мне же́ртвы твори́ти: и о́нем творя́сте, и се в пусты́ни, иде́же па́че им предстоя́ше.

Су́щее: И восприя́сте кровь Моло́хов и звезду́ бо́га ва́шего Ремфа́ма, о́бразы я́же сотвори́сте поклоня́тися им. И преселю́ вы да́лее Вавило́на.

Толкова́ние Кири́ллово: Да яви́тся Бог человеколю́бием спаса́я, а не возме́здием жертвам вещь творя́, глаго́лет. Еда́ заколе́ния и же́ртвы? Но и сим быва́емым рече́, восприя́сте и тогда́ кровь Моло́хов и звезду́ бо́га ва́шего Ремфа́на . Вше́дшу у́бо на го́ру Моисе́ю, и сотвори́ша теле́ц, и звезда́м приклони́шася служи́ти. И кровь сотво́рше, поста́виша и́дола и нареко́ша его́ Моло́х. Се и́дол моави́тский бе, име́я ка́мень све́тел изря́ден на челе́ во о́бразе денни́цы. Сказу́ет бо ся Моло́х царь их, Ремфа́н же помраче́ние. «Восприя́сте бо рече́ кровь Моло́хов», си́речь царя́ ва́шего. Кто же сей бе царь? Звезда́ бо́га ва́шего Ремфа́на. «Но бысть вам рече́ во ослепле́ние», помрачи́ша бо ся се́рдца их. Поклоня́хуся денни́це, я́ко предваря́ющей лучи́ со́лнечная, и нача́ло дню принося́щей су́щым на земли́. Но поклоня́ющимся ей, бысть Ремфа́н, си́речь помраче́ние: я́ко не содева́ющей в них звезде́ помраче́ние, но я́ко слепоты́ вина́ бысть им, я́же на се ве́ра и служе́ние. «Преселю́ ми́мо Вавило́на» рече́, поне́же моави́тския неи́стовства испо́лнисте, приближа́ющихся Дама́ску: Вавило́н у́бо коне́ц Дама́ску Си́рския страны́ есть.