Вторник пятой седмицы по Пасце

Сия́ глаго́лы я́же глаго́ла Иису́с в Газофилаки́и, уча́ во святи́лищи, и никто́же ят Его́: не у́ бо прии́де час Его́.

О́ безу́мия иуде́йскаго! Пре́жде Па́схи и́щуще Его́, та́же посреде́ прие́мше, и мно́жицею наче́нше удержа́ти, и собо́ю и ины́ми, и не возмо́гше. Ниже́ Его́ си́ле почуди́шася, но нападо́ху зло́бою, и не отступа́ху. Я́ко бо начина́ху при́сно, рече́: «Сия́ глаго́лы в Газофилаки́и уча́ во святи́лищи, и никто́же ят Его́». Во святи́лищы глаго́лаше и в чи́ну учи́теля, е́же па́че дово́льно бе их воздви́гнути, и сия́ глаго́лаше о ни́хже ухапля́хуся и порица́ху, я́ко ра́вна Себе́ твори́т Отцу́: и́бо «двою́ челове́к сведе́тельство и́стинно есть» сие́ явля́ет. Но оба́че сие́ рече́ глаго́лаше во святи́лищи и в чи́ну учи́теля, и «никто́же ят Его́, я́ко не у́ прии́де час Его́», си́речь, я́ко не у́ вре́мя бе прили́чно, в не́же хотя́ше распя́тися. Те́мже и тогда́ не их си́лы бысть де́ло, но смотре́ния Его́. Они́ бо и дре́вле хотя́ху, не можа́ху же: не у́бо ниже́ тогда́ возмогли́ бы, а́ще не бы Сам попусти́л. «Рече́ у́бо им па́ки Иису́с: Аз иду́, и взы́щете Мене́». Что у́бо глаго́лет сие́? Ча́сте потряса́я их душа́ и устраша́я. Зри у́бо, ели́к сие́ вотворя́ше страх: и́бо уби́ти Его́ хотя́ще да свободя́тся, и́щут, иде́же и́дет - си́це вели́кая от ве́щи мечта́ху. И и́ноже научи́ти их хотя́ше, я́ко не оне́х ну́жди вещь есть, но испе́рва сию́ предвообрази́; и Воскресе́ние у́же си́ми прописа́ словесы́. «Глаго́лаху у́бо: еда́ убие́т Себе́?». Что у́бо Христо́с? Отъе́мля их непщева́ние и показу́я, я́ко вещь грех есть, рече́: «Вы от ни́жних есте́». А е́же глаго́лет, таково́ есть: ничто́же чу́дно вам такова́я помышля́ти челове́ком плотяны́м и ничто́же помышля́ющим духо́вно. Но Аз не соде́ю что таково́: «Свы́ше бо есмь, вы же от ми́ра сего́ есте́». И па́ки мирска́я помышле́ния и плотска́я рече́. Отню́дуже я́вствено, я́ко и е́же «Аз несмь от ми́ра сего́», не е́же пло́ти не прия́ти есть, но е́же дале́че бы́ти зло́бы оне́х. И́бо ученико́в рече́ не бы́ти от ми́ра, но оба́че плоть имя́ху они́. Я́коже у́бо Па́вел глаго́ля: «Не́сте в пло́ти», не безтеле́сных бы́ти рече́ их, си́це глаго́ля ученико́в не бы́ти от ми́ра: ничто́же и́но ра́зве любому́дрие им сведе́тельствует. «Рех у́бо вам, я́ко а́ще не ве́руете, я́ко Аз есмь, во гресе́х ва́ших у́мрете». А́ще бо сего́ ра́ди прии́де да во́змет грех ми́ра, и и́нако его́ совлещи́ся несть ра́зве ба́нею: ну́жда неве́рующему име́ющему ве́тхаго челове́к отъити́: не хотя́й бо себ́е умертви́ти ве́рою и погрести́, у́мрет ему́ и отъи́дет та́мо, дая́ испыта́ния пре́жних согреше́нных.

Сего́ ра́ди глаго́лаше: «Не ве́руяй же, уже́ осужде́н есть», не е́же не ве́ровати то́кмо, но я́ко и пре́жняя грехи́ име́я отъи́дет. Глаго́лаху у́бо: «Ты кто еси́?». О́ безу́мия! По вре́мени толи́ком и зна́мении и уче́нии, вопроша́ют: «Ты кто еси́?». Что у́бо Христо́с? «Нача́ток, я́коже и глаго́лю вам». А е́же глаго́лет, таково́ есть: е́же отню́д слы́шати слове́с су́щых от Мене́ не досто́йни есте́, а не то́кмо и уве́дети, И́же кто Аз есмь, вы бо вся искуша́юще глаго́лете и ни еди́ному же су́щых от Мене́ внима́юще. И сия́ вся мого́х обличи́ти ны́не [сие́ бо есть «мно́га име́ю и глаго́лати и суди́ти»], не обличи́ти же то́кмо, но и му́чити, но «Посла́вый Мя ре́кше Оте́ц» не хо́щет сие́. «Не приидо́х бо суди́ти ми́ра, но спасти́ ми́ра». «Не посла́ бо Бог Сы́на Своего́, да су́дит ми́ру, рече́, но да спасе́т ми́ра». А́ще у́бо на сие́ Мя посла́, «И́стинен есть» в ле́поту. Ни еди́ного же Аз сужду́ ны́не, но сия́ глаго́лю я́же ко спасе́нию, а не я́же ко обличе́нию. Глаго́ла же сия́, да не вознепщу́ют, я́ко толи́ко слы́ша от не́мощи не истязу́ет или́ я́ко не весть их мы́слей и наруга́ния. «Не разуме́ша, я́ко Отца́ им глаго́лет». О́ безу́мия! Не преста́ им о Себе́ бесе́дуя, и не познава́ху. Та́же, егда́ у́бо мно́га зна́мения сотвори́в и научи́в не привлече́, о кресте́ про́чее бесе́дует, глаго́люще: «Егда́ вознесе́те Чы́на Челове́ча, тогда́ разуме́ете я́ко Аз есмь, и о Себе́ не глаго́лю, и я́ко со Мно́ю есть Посла́вый Мя, и не оста́ви Мене́ еди́наго Оте́ц». Показу́ет, я́ко пра́ведне глаго́лаше: «Нача́ток, я́ко и глаго́лю вам». Си́це не внима́ху глаго́лемым! «Егда́ вознесе́те Сы́на Челове́ча». Не вы ли тогда́ наипа́че ча́ете свободи́тися Мене́ и уби́ти? Аз же глаго́лю, я́ко тогда́ наипа́че уве́сте, «я́ко Аз есмь»: и зна́мений ра́ди, и воскресе́ния, и пленения: вся бо сия́ дово́льна бе́ша изъяви́ти Его́ кре́пость. И не рече́ «Тогда́ позна́ете, кто есмь», егда́ бо уви́дите рече́, я́ко ничто́же от сме́рти постра́жу, тогда́ «позна́ете, я́ко Аз есмь», си́речь, Христо́с и Сын Бо́жий, и И́же вся нося́ и водя́, и несопроти́вен О́ному. Сего́ у́бо ра́ди приведе́: «И от Себе́ ничто́же глаго́лю». Обоя́ бо позна́ете: и кре́пость Мою́, и единомышле́ние е́же ко Отцу́. Е́же бо «от Себе́ ничто́же глаго́лю» - непреме́нное существа́ явля́ет и я́ко ничто́же кроме́ Оте́ческих разуме́ний веща́ет. Егда́ бо отпаде́те слу́жбы, егда́ не попусти́т вам ниже́ Ему́ служи́ти я́коже пре́жде сего́, тогда́ уве́сте, я́ко отмща́я Мене́ сие́ твори́т и раздража́яся о непослу́шавшых Мене́. А́ки бы глаго́лал: не у́бо а́ще богопроти́вен не́кий был бых и чуждь, толи́ко у́бо гнев на вы подви́гнул бы. Сие́ и Иса́ия рече́: «Даст лука́вых вме́сто погребе́ния Его́», и Дави́д: «Тогда́ возглаго́лет к ним гне́вом Свои́м», и Сам: «Се оставля́ется вашь дом пуст». И при́тчи то́же явля́ют, егда́ глаго́лют: «Что сотвори́т де́лателем господи́н виногра́да о́ного? Злых зле погуби́т их». Зри́ши ли, я́ко везде́ за е́же никогда́ же ве́роватися си́це веща́ет? Поне́же а́ще Той их погуби́т, [я́коже у́бо и погуби́т, «принеси́те бо рече́ их зде, не хотя́щых мя ца́рствовати и заколи́те»], что ра́ди не Свое́ рече́ де́ло, но О́тче бы́вшее? К оне́х не́мощи бесе́дуя, вку́пе же и почита́я Роди́теля. Сего́ ра́ди не рече́ «оставляю́ дом ваш пуст», но оставля́ется: сие́ у́бо без лица́ положи́л есть. Те́мже е́же рещи́ «коли́жды восхоте́х собра́ти ча́да твоя́ и не восхоте́л еси́», та́же навести́ я́ко оставля́ется, показу́ет, я́ко Той запусте́ние соде́ла. Поне́же бо рече́, благоде́тельствуеми и исцеля́еми, не восхоте́сте позна́ти – му́чими, уве́сте, кто Аз. «И со Мно́ю есть Оте́ц». Да́же бо не вознепщу́ют, е́же «Посла́вый Мя» умале́ния бы́ти, глаго́ла: «со Мно́ю есть». О́во бо смотре́ния, о́во же Божества́. «И не оста́ви Мене́ еди́наго, я́ко Аз уго́дная Ему́ творю́ всегда́». Па́ки на смире́ннейшее сло́во низведе́, ко о́ному ча́сте стоя́ е́же глаго́лах, я́ко несть от Него́ и я́ко суббо́ты не храни́т. К сему́ рече́: «Уго́дная Ему́ творю́ всегда́», показу́я я́ко и е́же разреша́тися суббо́те - уго́дно есть Ему́. Си́це у́бо и при Кресте́ рече́: «Мни́те ли, я́ко не могу́ умоли́ти Отца́?», а́ще и рек то́кмо «Кого́ и́щете», пове́рже взна́к их. Что у́бо не глаго́леши: «я́ко мни́те, я́ко не могу́ вас погуби́ти, де́лом сие́ показа́в»? К не́мощи их схо́дит, мно́го творя́ше тща́ние, я́ко бы показа́ти я́ко ничто́же сопроти́вно твори́т Отцу́. Си́це у́бо и зде челове́чнейше веща́ет. Я́коже у́бо е́же «не оста́ви Мене́ еди́ного» рече́ся, си́це и е́же «я́ко Аз уго́дная Ему́ творю́ всегда́. Сия́ Ему́ ре́кшу, мно́зи ве́роваша в Него́». Егда́ во смире́нное сло́во низведе́, тогда́ мно́зи ве́роваша.

Еще́ ли у́бо вопроша́еши, что ра́ди смире́нне веща́ет? И́бо я́вствене евангели́ст назна́мена сие́, рек: «Я́ко сия́ Ему́ глаго́лавшу, мно́зи ве́роваша в Него́». То́чию не вопия́ си́ми ве́щьми: не смуща́йся, о́ послу́шниче, а́ще что смире́нно услы́шиши. И́же бо по толи́ком уче́нии не у́ уве́рени, я́ко от Отца́ есть, в ле́поту смире́ннейшая слы́шаху, да уве́рятся.

И сие́ у́бо отве́т есть о имя́щых смире́нне рещи́ся. Ве́роваша у́бо, не я́ко подоба́ше же, но про́сте и я́коже прилучи́ся, обра́довавшеся и упоко́ившеся о глаго́лемых [в] смире́нии. Я́ко бо несоверше́нную ве́ру имя́ху, показу́ет евангели́ст от су́щых по сих слове́с, в ни́хже Ему́ па́ки досажда́ют. И я́ко си́и са́ми суть они́, изъяви́л есть рек: «Глаго́ла у́бо Иису́с к ве́ровавшым к Нему́ иуде́ом: А́ще вы пребу́дете в словеси́ Мое́м», показу́я я́ко не у́ прия́ша уче́ние, но то́кмо внима́ху глаго́лемым. Те́мже и уязви́тельнейше рече́. Та́мо у́бо про́сте рече́: «Взы́щете Мене́», ны́не же бо́льше приложи́л есть: «Я́ко во гресе́х ва́шых у́мрете». И е́же ка́ко показу́ет: я́ко не мо́жете прише́дше та́мо умоли́ти Мя про́чее. «Сия́ я́же глаго́лю в ми́ре», си́ми изъяви́л еси́ про́чее исходя́щу Ему́ во язы́ки. Поне́же не позна́ша про́чее, я́ко Отца́ им глаго́лет пре́жде, па́ки веща́ет о Не́м. И вину́ смире́ния глаго́л положи́л есть евангели́ст.

Нравоуче́ние пяти́десять тре́тие: Я́ко подоба́ет и в це́рковь и в прочита́ние писа́ний упражня́тися: си́це бо и гре́шнии и а́лчущие преуспе́ти возмо́жем:

А́ще си́це у́бо восхо́щем Писа́ние испытова́ти со опасе́нием, а не про́сте - возмо́жем спасе́ния на́шего получи́ти. А́ще вы́ну в них пребыва́ем - и догма́т пра́вость и житие́ уве́мы опа́сно. А́ще и зело́ же́сток кто бу́дет, и лют, и слаб, и ничто́же приобрета́ше во ины́х вре́менех - вре́мя у́бо припло́дит сие́, и прии́мет не́кую по́льзу, а́ще и не такову́, я́коже чу́вство име́ти, но оба́че прии́мет. А́ще бо миропрода́вца кто ми́мо ходя́, и приседя́ де́лательницам таковы́м, и не хотя́ обоня́ется от благоуха́ния - мно́го па́че в це́рковь отходя́. Я́коже от пра́здности пра́здность ражда́ется, си́це от де́йства усе́рдие ражда́ется. А́ще и безчи́сленых бу́деши испо́лнен злых, а́ще и нечист - да не бежи́ши е́же зде пребыва́ния.

Что у́бо рече́, зане́ слы́ша не творю́? Нема́ло приобре́тение - окаява́ти себе́. Не непотре́бен сей страх. Не безвре́менна сия́ боя́знь. А́ще постене́ши то́кмо, я́ко «слы́ша не творю́», - вся́чески на е́же твори́ти при́деши не́когда: несть бо мо́щно Бо́гу бесе́дующему и послу́шающему Бо́гу бесе́дующу, не обрета́ти что. А́бие у́бо спря́туемся, и ру́це умыва́ем, егда́ Кни́гу восхо́щем прия́ти.

Зри́ши ли, и пре́жде почита́ния коли́ко благогове́ние? А́ще же и со опасе́нием прочита́ем, мно́гу обои́мем по́льзу: не бо́ а́ще в благогове́нии устро́ил бы ду́шу, ру́це у́бо умы́ли бы́хом. И жена́, а́ще и не покрове́нна бу́дет, обложи́т а́бие плат, су́щаго внутрь благогове́ния указа́ние показу́ющи. И муж, а́ще покрове́н бу́дет, обнажа́ет главу́. Зри́ши ли, ка́ко быва́ет пропове́дник е́же благогове́ния внутрь вне́ший о́браз? Та́же и в послуша́ние сед, воздохну́ мно́жицею и позазре́ житию́ настоя́щему. Да внима́ем у́бо Писа́нием, о́ возлю́блении! И а́ще ничто́же и́но, Ева́нгелия у́бо потща́тельна нам да быва́ют, и сия́ в ру́ки да прие́млем. А́бие бо разну́в кни́гу, Христо́во и́мя обря́щеши, и у́зриши внутрь лежа́ще, и услы́шиши а́бие глаго́люща: «Иису́с Христо́во Рожество́ си́це бе, обруче́не бо бы́вше ма́тери его́ Мари́и... Обре́теся во чре́ве име́ющи от Ду́ха Свя́та». Сия́ же слы́шай, возжеле́ет де́вства а́бие, почуди́тся рожеству́, свободи́тся земли́. Не ма́ла и сия́, егда́ уви́диши и Ду́ха сподобле́ну деви́цу и а́нгела ей бесе́дующа. И сия́ у́бо све́рху. А́ще же пребу́деши до конца́ проходя́, вся а́бие оплюе́ши жите́йская, всем посмее́шися су́щым зде. А́ще и бога́т бу́деши - ничто́же вознепщу́еши бога́тство, слы́шав я́ко текто́нова су́щи Она́ и смире́нныя хра́мины, Ма́ти Dлады́ки твоего́ бысть. А́ще и нищь бу́деши - не постыди́шися нищеты́, уве́дев я́ко худе́йшия хра́мины не устыде́ся И́же ми́ру Соде́тель.

Сия́ помышля́я, не похи́тиши, не лихои́мствуеши, не во́змеши я́же друго́в твои́х, но рачи́тель бу́деши па́че нищеты́ и пре́зриши бога́тство. А́ще же сия́ бу́дет, вся изго́ниши зла́я. Па́ки, егда́ уви́диши Его́ в я́слех лежа́ща, не потщи́шися о́троку своему́ обложи́ти у́тварь злату́, ниже́ жене́ среброко́ван сотвори́ти одр. Сия́ же тща́ся, ниже́ я́же от сих соде́лаеши лихоима́ния и хище́ния. Мно́га и и́на есть обрести́, я́же не леть есть ны́не по ча́сти глаго́лати, ве́дят же иску́с прие́мшии. Те́мже молю́ истяжава́ти кни́ги, и с кни́гами разуме́ния держа́ти, и в мы́слех писа́ти. Иуде́и бо поне́же не внима́ху, на рука́х повелева́хуся кни́ги повеша́ти. Мы же ниже́ в рука́х, но в дому́ полага́ем - потре́бно вообража́ти в се́рдцы. Си́це бо настоя́щее очи́стивше житие́, получи́м бу́дущых благи́х, и́хже бу́ди всем нам получи́ти благода́тию и человеколю́бием Го́спода на́шего Иису́са Христа́, я́ко Тому́ сла́ва и держа́ва, ны́не и при́сно и во ве́ки веко́в. Ами́нь.

Глаго́ла у́бо Иису́с к ве́ровавшим к Нему́ иуде́ом: А́ще вы пребу́дете в словеси́ Мое́м, вои́стинну ученицы́ Мои́ есте́, и позна́ете и́стинну, и и́стинна свободи́т вас.

Мно́га терпе́ния тре́буют на́ша, о́ люби́мицы! Терпе́ние же быва́ет, егда́ в глубину́ укорене́ни догма́ты бу́дут. Я́коже ду́ба в до́льняя не́дра испусти́вша ко́рения истя́гнута со опасе́нием, ни еди́н же ветр припа́д исто́рнути возмо́жет - си́це у́бо и ду́шу пригвожде́нную Бо́жию стра́ху, никто́же преврати́ти возмо́жет: укорене́ния бо е́же пригвозди́тися бо́льше есть. Сие́ у́бо проро́к мо́лится, глаго́ля: «Пригвозди́ от стра́ха Твоего́ пло́ти моя́». Си́це и ты пригвозди́, и совокупи́ а́ки гво́здем проверте́нным.

Я́коже бо си́и не удо́бь е́млеми, си́це сопроти́внии удо́бь е́млеми быва́ют и низверза́ются удо́бне - е́же и тогда́ пострада́ша иуде́и. Слы́шавше бо и ве́ровавше, па́ки разврати́шася. Хотя́ у́бо углуби́ти ве́ру их Христо́с, я́кобы́ не на верху́ бы́ти, копа́ет ду́шу уязви́тельнейшими словесы́: ве́ровавшых бо бе и обличе́ний терпе́ти. Они́ же а́бие сверепя́ху. Ка́ко же сие́ твори́т? Пре́жде завещава́ет: «А́ще вы пребу́дете в словеси́ Мое́м, вои́стинну ученицы́ Мои́ есте́, и позна́ете и́стину, и и́стинна свободи́т вас», то́чию не глаго́ля: «хощу́ глубо́ко да́ти сече́ние, но не коле́блитеся». Па́чеже и си́ми их киче́ние мы́сли их спря́та. Чего́ свободи́т, рцы ми? Грехо́в. Что у́бо презо́ривии они́? «Се́мя Авраа́мле есмы́, и ни еди́ному же порабо́тахом никогда́же». Низпаде́ а́бие их мысль, сие́ же глаго́лят от е́же к мирски́м ве́щем устраши́тися. «А́ще пребу́дете во словеси́ Мое́м». Явля́ющаго бе я́же в се́рдцы их и ве́дящаго я́ко ве́роваша у́бо, не пребы́ша же. И ве́лие обещава́ет, е́же ученико́м Его́ оне́м бы́ти. Поне́же бо не́цыи отъидо́ша пре́жде, гада́тельствуя их рече́: «А́ще пребу́дете», поне́же и они́ слы́шаша и ве́роваша, и отъидо́ша, поне́же не пребы́ша. «Мно́зи бо от учени́к его́ отъидо́ша вспять, и не ктому́ с Ним хожда́ху». «Позна́ете и́стинну», си́речь, Мене́: «Аз бо есмь и́стинна». Иуде́йская у́бо вся о́браз бе́ша, и́стинну же от Мене́ уве́сте, и свободи́т вас от грехо́в. Я́коже бо оне́м глаго́лаше: «Во гресе́х ва́шых у́мрете», си́це сим глаго́лаше: «свободи́т вас». И не рече́ свобожу́ вас от рабо́ты, но сие́ им оста́ви све́дети. Что у́бо они́? «Се́мя Авраа́мле есмы́, и ни еди́ному же порабо́тихом никогда́же». И́бо а́ще подоба́ше негодова́ти о пре́жнем, ле́по бе тем е́же рещи́ «позна́ете и́стинну» и рещи́: Что у́бо ны́не, и́стинны не ве́мы ли? Зако́н у́бо ло́жен ли и позна́ние на́ше? Но ничто́же о сих им раде́ние бысть, но о мирски́х ве́щех боле́знуют, и наипа́че рабо́ту вознепщева́вше.

Суть бо, суть и ны́не мно́зи, и́же от худы́х у́бо срамля́ются, и о рабо́те сей: о рабо́те же грехо́вней не ктому́, и изво́лили бы у́бо тмам о́ной рабо́те нарещи́ся раби́, не́жели сей еди́ною. Такови́ не́цыи бе́ша и они́, и ниже́ ве́дяху ину́ю рабо́ту, и ре́ша: Рабо́в ли наре́кл еси, су́щих от ро́да Авраа́мля? Благоро́дных ли, и́хже не подоба́ше сего́ ра́ди нарещи́ рабо́ты? Никогда́ же бо рече́ рабо́тахом. Такова́ бо иуде́йская похвале́ния: «Се́мя Авраа́мля есмы́», изра́ильтяне есмы́. Нигде́ же свои́х исправле́ний помина́ют. Сего́ ра́ди к ним возопи́ Иоа́нн глаго́ля: «Не помышля́йте глаго́лати я́ко отца́ и́мамы Авраа́ма». Что же ра́ди не обличи́л есть их Христо́с? И́бо мно́жицею рабо́таша, и еги́птяном, и вавило́няном, и ины́м мно́гым. Зане́ не к любоче́стию Ему́ глаго́лемая бе́ша, но ко спасе́нию и ко благодея́нию: и к сему́ тща́шеся. Поне́же рекл бы четы́рех сот ле́т, рекл бы у́бо седми́десяти, рекл бы у́бо я́же при судия́х, я́же овогда́ у́бо два́десять, овогда́ же два, овогда́ же седмь - рек бы у́бо: Ка́ко, никогда́же преста́ша рабо́тающе?

Но не сие́ тща́шеся показа́ти, рабо́в челове́ком бы́вшых, но греха́, и́же есть и люте́йшая рабо́та, ея́же Бог еди́н свободи́ти мо́жет: е́же бо оставля́ти грехы́ ни еди́наго ина́го есть. И сие́ и са́ми испове́даху. Поне́же бо сие́ испове́даху Бо́жие де́ло бы́ти, в сие́ их возво́дит, и рече́: «Всяк творя́й грех, раб есть греху́», показу́я я́ко [о] сей глаго́лет свобо́де я́же от сея́ рабо́ты.

«Раб же не пребыва́ет в дому́.., Сын пребыва́ет во ве́ки». Ти́хо и зако́ном осужда́ет, гада́тельствуя пре́жния времена́, да́же бо не востека́ют и глаго́лют «же́ртвы и́мамы я́же повеле́ Моисе́й», оне́ нас свободи́ти возмо́гут, - сего́ ра́ди сия́ наведе́.

Поне́же ко́е после́дование имя́ху рече́нная? «Вси бо согреши́ша и лиша́ются сла́вы Бо́жия, оправда́еми ту́не», и свяще́нницы са́ми. Сего́ ра́ди и Па́вел рече́ о иере́и: «Я́ко до́лжен есть рече́ приноси́ти о себе́, я́коже о лю́дех, поне́же и той облежи́т не́мощию». И сие́ явля́ет тем е́же рещи́: «Раб не пребыва́ет в дому́». Зде же и единоче́стие свое́ явля́ет е́же ко Отцу́, и разли́чие раба́ и свобо́днаго. При́тча бо сие́ хо́щет , си́речь, не име́ет о́бласти раб - сие́ бо есть е́же не пребыва́ет. Что же ра́ди о гресе́х бесе́дуя, до́ма воспомяну́л есть? Показу́я, зане́ я́коже о до́му влады́ка, си́це все́ми Той владе́ет. А е́же не пребыва́ет сие́ есть: не име́ет о́бласть дарова́ти, а́ки не сый до́му влады́ка. Сын же до́му влады́ка есть - сие́ бо есть пребыва́ти во ве́ки, от подо́бия челове́ческих. Да не глаго́лют: Ты кто еси́? - Моя́ суть вся, Сын бо есмь, и в дому́ пребыва́ю О́тчи: дом о́бласть нарица́я, и́бо и́нде дом нарица́ет Отца́ нача́льство: «В дому́ Отца́ Моего́ оби́тели мно́ги суть». Поне́же бо о свобо́де и рабо́те сло́во, в ле́поту сим де́йствует ноше́нием глаго́ля, я́ко не имя́ху о́бласть они́ оставля́ти: «А́ще у́бо Сын вас свободи́т». Ви́дел ли еси́ единосу́щное е́же ко Отцу́ и ка́ко показу́ет ту́же име́юща Самому́ О́ному власть? «А́ще у́бо Сын свободи́т», никто́же сопроти́в глаго́лет про́чее, но изве́стну име́йте свобо́ду: «Бог бо оправда́яй, и кто осужда́я?». Зде показу́ет и греха́ Себе́ чи́ста, и ю́же до нарече́ния свобо́ду гада́тельствует: сию́ бо и челове́цы даю́т, о́нуже еди́н Бог. И сим увещава́ет их не срамля́тися о рабо́те сей, но о грехо́вней. И хотя́ показа́ти я́ко раби́ не бе́ша бы́ли за е́же о́ну отрази́ти, па́че же показу́ет су́щых рабо́в, тем е́же рещи́ [и́стинно] свобо́дни бу́дете: сие́ бо я́вляющаго есть, я́ко сия́ свобо́да не и́стинна.

Та́же, да не глаго́лют я́ко греха́ не име́ем, [ле́по бо сие́ бе рещи́,] зри ка́ко их во осужде́ние вложи́ сие́. Оста́вль бо все их обличи́ти житие́, сие́ е́же с рука́ми е́же еще́ де́йствовати хотя́ху приво́дит на среду́ и рече́: «Вем, я́ко се́мя Авраа́мле есте́, но и́щете Мене́ уби́ти». Ти́хо и пома́лу отрева́ет сро́дства их о́ного, наказу́я не велему́дроствовати о сем: я́коже бо свобо́да и рабо́та от дел, си́це и сро́дство.

И не рече́ а́бие: «Не́сте Авраа́мле сы́нове, мужеуби́йцы, пра́веднаго», но истека́ет еще́ и рече́: «Вем, я́ко се́мя Авраа́мле есть», но не сие́ есть иско́мое: и про́чее тяжча́йша де́йствует уче́нием сим. И́бо есть я́ко мно́гая соблюсти́: я́ко хотя́ ве́лие соде́лати что, по е́же соде́лати, вя́щшим де́йствует дерзнове́нием, я́ко сведете́льству су́щему от дел зауща́ющу их. «Но и́щете Мене́ уби́ти».

Что у́бо, а́ще пра́ведне, рече́? Но ниже́ сие́. Те́мже и вину́ полага́ет, «я́ко сло́во Мое́ не вмеща́ется в вас». Ка́ко у́бо глаго́леши, я́ко ве́роваху в Него́? Но е́же рех, прелага́хуся па́ки. Те́мже и зело́ их каса́шеся. А́ще бо сро́дством хва́литеся о́ного, и житие́ показа́ти подоба́ет. И не рече́ не вмеща́ете сло́во, но не вмеща́ется Мое́ сло́во в вас: высо́кое Свои́х догма́т показу́я, и́бо ниже́ о сем уби́ти подоба́ше, но па́че почита́ти, угажда́ти, я́ко бы навы́кнути. Что у́бо, а́ще от себе́ сия́ глаго́леши? Сего́ ра́ди наведе́: «Я́же Аз ви́дех у Отца́ Моего́, сия́ глаго́лю, и вы я́же слы́шасте от отца́ ва́шего, сия́ творите́». Я́коже рече́ Аз и от глаго́л, и от и́стинны явля́ю Отца́, си́це и вы от веще́й. Не то́же бо существо́ то́кмо, но и ту́же и́стинну име́ю Отцу́. «Глаго́лаху Ему́: мы отца́ име́ем Авраа́ма. Глаго́ла им Иису́с, а́ще отца́ име́ли бысть Авраа́ма, дела́ его́ твори́ли бы́сте. Ны́не же и́щете Мене́ уби́ти». Ча́сте зде уби́йственое их обраща́ет произволе́ние, и Авраа́ма помина́ет: твори́т же сие́, и сего́ их отвести́ хотя́ сро́дства, и изли́шнее хвале́ние изъя́ти, и увеща́ти не ктому́ о о́ном наде́жди спасе́ния име́ти, ниже́ во е́же по естеству́ сро́дстве, но в су́щем по произволе́нию.

Сие́ бо бе возбраня́ющее их приходи́ти ко Христу́, е́же непщева́ти довле́ти им сро́дство о́но во спасе́ние. Ко́ю же и́стинну глаго́лет? Я́ко ра́вен есть Отцу́. Сего́ бо ра́ди иска́ху Его́ иуде́и уби́ти. И рече́: «И́щете Мене́ уби́ти, я́ко и́стинну вам глаго́лах, я́же слы́шах от Отца́». Показу́я я́ко несопроти́вна Отцу́ сия́ суть, па́ки к Нему́ прибега́ет. «Глаго́лаху Ему́: Мы от блуда́ не́сме рожде́ни, еди́наго Отца́ име́ем, Бо́га». Что глаго́леши? Вы отца́ Бо́га име́ете, и Христу́ ли порица́ете сие́ глаго́лющу?

Зри́ши ли, я́ко изря́дне глаго́лаше Своего́ Отца́ бы́ти Бо́га? Поне́же у́бо сро́дства их отве́рже Авраа́мля, ничто́же име́юще рещи́, и́но не́что бо́льше дерза́ют, к Бо́гу востека́юще. Но и сия́ их отрева́ет че́сти, глаго́ля: «А́ще Бог Оте́ц ваш был бы, люби́ли у́бо Мя бы́сте, зане́ Аз от Бо́га изыдо́х и приидо́х; и от Себе́ не приидо́х, но Он Мя посла́. Что ра́ди не ве́сте бесе́ды Моея́? Зане́ не мо́жете слы́шати слове́с Мои́х. Вы от отца́ ва́шего диа́вола есте́ и вожделе́ния отца́ ва́шего хо́щете твори́ти: он человекоуби́йца бе искони́ и во и́стинне не стои́т. Егда́ глаго́лет лжу, от свои́х глаго́лет». Изве́рже их сро́дства Авраа́мля. И поне́же бо́льшая дерзну́ша, тогда́ про́чее наво́дит я́зву глаго́ля, я́ко не то́кмо Авраа́мли не суть, но я́ко и диа́воли суть. Супроти́в си́льно безсту́дия дая́ сече́ния. И ниже́ без сведе́тельства сие́ оставля́ет, но обличе́ньми сие́ состроя́ет: е́же бо убива́ти рече́, о́ного зло́бы есть. И не рече́ про́сте: де́ла, но вожделе́ния его́ твори́те, показу́я я́ко зе́льне и он и си́и уби́йств держа́тся, и я́ко за́висть бе вина́: ниже́ бо име́я что Ада́му порица́ти, но ра́зве зави́дуя то́кмо, уби́. Сие́ у́бо и зде гада́тельствует. «И во и́стинне не стои́т», си́речь, в пра́вом житии́.

Поне́же бо ча́сте Кго́ оклеветова́ху я́ко от Бо́га несть, глаго́ла, я́ко и сие́ отту́ду есть: он бо пе́рвый роди́л есть ложь, глаго́ля. «Во́ньже день а́ще сне́сте, отве́рзутся ва́ша очеса́». То́ею пе́рвый де́йствова. Челове́цы бо не я́ко свое́ю ею́ де́йствуют, но я́ко чу́жедю, сей же - я́ко свое́ю. «Аз же я́ко и́стинну глаго́лю, не ве́руете Ми». Ко́е сие́ после́дование? Ничто́же порица́юще, уби́ти Мя хо́щете. Поне́же бо врази́ есте́ и́стинны, сего́ ра́ди мене́ го́ните. Поне́же а́ще не сего́ ра́ди, рцы́те согреше́ние. Сего́ бо ра́ди наведе́: «Кто от вас обличи́т Мя о гресе́?». Та́же они́: «Мы от блуда́ не роди́хомся». И у́бо от блуда́ роди́шася мно́зи, [и́бо не подоба́ющая смеше́ния творя́ху,] но ниже́ сие́ облича́ет, но ко о́ному стои́т. Поне́же бо показа́ не су́щых от Бо́га, но от диа́вола от сих всех, [и́бо е́же убива́ти диа́вольско есть и е́же лга́ти диа́вольско, я́же обоя́ вы творите́,] показу́ет, я́ко е́же люби́ти сию́, зна́мение е́же от Бо́га не бы́ти . «Что ра́ди не ве́сте бесе́ды Моея́?». Поне́же бо при́сно недоуме́яху глаго́люще: «Что есть я́ко глаго́лет?». «Иде́же Аз иду́, вы не мо́жете приити́». Сего́ ра́ди рече́ не ве́сте бесе́ды Моея́, я́ко сло́во Бо́жие не име́ете. Сие́ же вам быва́ет за долере́вностное мы́сли и за е́же мно́го бо́льше бы́ти Моя́. Что у́бо а́ще не можа́ху све́дети? Зде е́же не мощи́, е́же не хоте́ти есть, я́ко смире́нных себе́ наказа́сте, я́ко ничто́же ве́лие мечта́ете. Поне́же бо глаго́лаху гони́ти Его́ я́ко о Бо́зе ревну́юще, сего́ ра́ди везде́ покуша́ется показа́ти, я́ко е́же гони́ти Его́, ненави́дящых есть Бо́га. Сопроти́вное же, е́же люби́ти ве́дящых Бо́га рече́. «Еди́наго отца́ име́ем Бо́га». От сих украша́ются от че́сти, а не о исправле́нии;.

Не у́бо е́же чу́жду бы́ти Мне е́же не ве́ровати вам зна́мение, но е́же вам не ве́дети Бо́га. Неве́рие зна́мение вино́вно е́же от е́же хоте́ти лга́ти и диа́вольская твори́ти: сие́ же твори́т душе́вная ху́дость, я́коже апо́стол рече́: «Иде́же бо в вас рве́ние и за́висть, не пло́тсти ли есте́?». Что же ра́ди не мо́жете? «Я́ко вожделе́ния отца́ ва́шего хо́щете твори́ти». Тщи́теся, любопри́теся.

Зри́ши ли я́ко е́же не мощи́ е́же не хоте́ти глаго́лет. «Я́ко Авраа́м сие́ не сотвори́л есть». Но ка́я суть его́ дела́? Кро́ткое, ти́хое, поко́рное. Вы же от сопротивле́ния стоите́, непокорли́ви су́ще и лю́ти.

Отку́ду же им на́йде к Бо́гу прибега́ти? Недосто́йных их, показа́ Авраа́ма. Хотя́ще у́бо сего́ избежа́ти, на бо́льшее взыдо́ша. Поне́же бо поноси́ уби́йство, я́ко отвеща́ние не́кое творя́ще, я́ко Бо́га отмща́ют сие́ глаго́лаху. Показу́ет у́бо, я́ко сие́ са́мое сопротивля́ющихся есть Бо́гу. А е́же изыдо́х, показу́ет Себе́ отту́ду су́ща. Изыдо́х же глаго́ла, е́же к нам достиже́ние гада́тельствуя. Поне́же ле́по бе им рещи́: Я́ко стра́нна не́кая глаго́леши и но́ва, - от Бо́га рещи́ приити́. В ле́поту у́бо не послу́шает их рече́: От диа́вола су́ще, что бо ра́ди убива́ете, что име́юще порещи́? А́ще не сие́ есть, что ра́ди не ве́руете Мне? Си́це у́бо их су́щых от диа́вола, от лжи и уби́йства показа́в, показа́ чу́ждих су́щых Авраа́ма и Бо́га от е́же ненави́дети ничи́м же оби́девшаго и от е́же не слу́шати слове́с Его́. И показу́ет горе́ и до́лу, я́ко ниже́ богопроти́вен бе. Ниже́ сего́ ра́ди не ве́роваху, но я́ко чу́ждии бе́ша Бо́гу. И́же бо греха́ не сотвори́в, глаго́ляй Себе́ приити́ от Бо́га и отту́ду посла́тися, и́стину глаго́ляй; и си́це и́стинну глаго́ля, я́ко всех ко обличе́нию призыва́ти, та́же не ве́руемь, благоявле́нно, я́ко за е́же плотяны́м о́нем бы́ти не ве́руется.

Нравоуче́ние пятьдеся́ть четве́ртое: я́ко не жите́йская, но Ца́рствие небе́сное похища́ти подоба́ет:

Ве́дят бо, ве́дят, смире́нну ду́шу твори́ти грехи́ . Сего́ ра́ди рече́: «Поне́же лени́ви бы́сте слу́хи ва́шими». Егда́ бо су́щых на земли́ пренебрещи́ не возмо́жет кто, ка́ко о су́щых на небесе́х любому́дрити и́мать когда́? Сего́ ра́ди молю́, вся да де́йствуем, я́ко бы житию́ на́шему испра́витися, я́ко бы очи́ститися мы́сли, я́ко бы ничто́же скве́рно бы́ти нам возбране́ние. Просвети́те бо себе́ свет ра́зума и не се́йте в те́рниях. Не ве́дый бо я́ко е́же лихои́мствовати зло, когда́ уве́сть бо́льшее? Не оша́яйся сих, когда́ оне́х держа́тися и́мать? Добро́ е́же похища́ти, но не погиба́ющая, но Ца́рствие небе́сное. «Ну́жницы бо рече́ похища́ют е́», не у́бо с ле́ностию есть получи́ти его́, но со тща́нием. Что же есть ну́жницы? Ну́жди тре́ба мно́гия: те́сен бо путь, и ю́ношьскыя тре́бует ду́ши и до́блественыя. Похища́ющии, всех хотя́т предвзя́ти, к ничему́ же зрят: ни к зазре́нию, ни ко осужде́нию, ни к муче́нию - но еди́ного быва́ют то́кмо, е́же взя́ти я́же хотя́т похи́тити, и всех су́щых напреди́ претека́ют.

Да похища́ем у́бо Ца́рствие небе́сное. Несть бо зде согреше́ние е́же похища́ти, но похвала́: согреше́ние же зде е́же не похища́ти. Не ина́го тще́ты, но на́ше быва́ет бога́тство. Да потщи́мся у́бо сие́ похи́тити: а́ще и стужа́ет я́рость, а́ще и стужа́ет вожделе́ние, да пону́дим естество́, кротча́йши да быва́ем, труди́мся ма́ло, да упоко́имся непреста́нне. Да не похи́тиши зла́то, но похи́ти бога́тство, ти́ну показу́ющее зла́то. Рцы бо ми, а́ще предлежа́л бы свине́ц и зла́то, что у́бо похи́тил бы еси́? Не благоявле́нно ли я́ко зла́то? Та́же иде́же у́бо похища́я и му́чится, бо́льшее почита́еши, а иде́же похища́я и почита́ется, предае́ши ли бо́льшее? А́ще бо от обою́ду му́ка была́ бы, не на сие́ ли па́че прише́л бы еси́? Зде́же ничто́же таково́ есть, но блаже́нство. И ка́ко есть похи́тити рече́? Пове́рзи су́щая в рука́х: доне́лиже бо сия́ держи́ши, о́на похи́тити не возмо́жеши.

Помы́сли бо ми му́жа, сребра́ ру́ки испо́лнены име́юща: еда́ возмо́жет, до́ндеже держи́т сие́, похи́тити зла́то, а́ще не пове́ржет сие́ и благоразреше́н бу́дет? Похища́ющему бо благоопоя́сану подоба́ет бы́ти, я́ко бы не удержа́ну бы́ти. И́бо и ны́не суть сопроти́вныя си́лы натека́ющия на нас, да отъи́мут. Но да бе́гаем их, бе́гаем, ниже́ еди́ну привлача́юще вину́ отвне́, да пресеца́ем ю́жа , нази́ да быва́ем жите́йских. Ка́я потре́ба шо́лковых риз? Доко́ле зла́то покопа́ем ? Хоте́х преста́ти сия́ глаго́ля при́сно, но вы не оставля́ете, при́сно мне подаю́ще изве́ты и вины́. Но ны́не у́бо да отступи́м, да ины́х житие́м наказа́вше, получи́м обеща́нных благи́х благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва, со Святы́м Ду́хом, ны́не и при́сно и во ве́ки веко́в. Ами́нь.

Су́щее: Сень свиде́ния бя́ше отце́м на́шим в пусты́ни, я́коже повеле́ глаго́ляй Моисе́ови: «Сотвори́ ю́ по о́бразу его́же ви́де». Ю́же и внесо́ша прие́мши отцы́ на́ши со Иису́сом Нави́ном во одержа́ние язы́ком, и́хже изри́ну Бог от лица́ оте́ц на́ших, да́же до дни Дави́да, и́же обре́те благода́ть пред Бо́гом и испроси́ обрести́ селе́ние Бо́гу Ия́ковлю.

Толкование Златоустаго: «Кровь свиде́тельства» нарече́т, си́речь Бо́жиим повеле́нием и чудесе́м, и́же и по пусты́ни носи́мь бе и не на ме́сте еди́ном стоя́. И а́ще и а́нгел бе глаго́ля Моисе́ю в горе́ сина́йстей, но в горе́ Сина́йстей, но в Бо́жии ли́цы глаго́лаше ему́. Мно́га бо такова́я в боже́ственном писа́нию обрета́ются. Пи́шет бо во Исхо́де, я́ко а́нгел Госпо́день глаго́ла к Моисе́ю: «Да не прибли́жишися се́мо». И на про́чая глаго́лют а́нгел: «Аз Бог Авра́амов, и Бог Исаа́ков, и Бог Иа́ковль». И апо́стол же Госпо́день о зако́не глаго́лет: «А́ще бо а́нгелы глаго́лан был зако́н, и ника́коже храм язы́цы изринове́ни бы́ша». Сего́ ра́ди глаго́лет: «И́хже отри́ну Бог от лица́ оте́ц на́ших». И толи́ка зна́мения - и ника́коже храм да́же до дня Дави́дова рече́, и ника́коже храм испроси́ обрести́ благода́ть пред Бо́гом, и не созда́ храм: та́ко не бысть вели́ко что храм. Испроси́ обрести́ благода́ть Дави́д же вели́кий и чу́дный храм не созда́, но Соломо́н «ни еди́ного поко́я рече́ прииму́, пре́жде да́же не обрести́ ми ме́сто и селе́ние Бо́га Иа́ковля», я́ве я́ко Христу́.

Су́щее: Соломо́н же созда́ ему́ храм. Но Вы́шний не в рукотворе́них церква́х живе́т, я́коже проро́к глаго́лет: «Не́бо Мне престо́л есть, земля́ же подно́жие нога́ма Мои́ма». Кий храм сози́ждете Ми глаго́лет Госпо́дь, или́ ко́е ме́сто поко́ищу Моему́? Не рука́ ли Моя́ сотвори́ сия́ вся?

Толкова́ние: Четвертосо́тное и четыридеся́тное ле́то исхо́да сыно́в Изра́илев из Еги́пта, нача́т Соломо́н созида́ти ему́ храм во Иерусали́ме, я́ко четве́ртая кни́га я́же о ца́рствиих учи́т нас. Сего́ ра́ди же по толи́цех ле́тех е́же из Еги́пта исхо́да Изра́илева, храм зи́жден бысть, да оста́вившеся я́же по гора́м претыка́ния, еди́наго ме́ста Иеросали́мскаго возлю́бят, его́же Бог че́стна зело́ сотвори́.

Толкова́ние Кири́лла Александри́йскаго: А́ще кто хо́щет ве́щи вину́ навы́кнути, ничто́же ло́жно и́стинствующе глаго́лем: сози́жда бо в Иеросали́мех Соломо́н пресла́внаго хра́ма о́ного, возлюби́ша же его́ зело́ иуде́йстии собо́ри. Непщева́ху бо, я́ко всели́ся вонь огражде́н вся́ческих Бог. Ко́сни бо не́како су́ще в ра́зуме и о Бо́жиих словесе́х недово́льны, град Бо́жий мня́ху бы́ти сей Иеросали́м и в нем еди́ном то́чию глаго́лах Бо́га жи́ти. Зане́же глаго́лется гла́сом Дави́довым: «Пресла́вная глаго́лашася о тебе́, гра́де Бо́жий». И поне́же ма́ла не́кая сла́вляху, облича́ет их Бог глаго́ля: «Кий храм сози́ждете Ми, престо́л иму́щаго не́бо и подно́жие зе́млю?». Те́мже у́бо огражде́нно бы́ти на ме́сте еди́ном боже́ственное естество́ мня́щим, я́ве показу́ется я́ко повсю́ду испо́лнен есть и нигде́ же вмеща́ется: я́коже есть на небеси́, та́ко и на земли́.

Су́щее: «Жестоковы́йнии и необре́зании се́рдцы и ушесы́, вы при́сно Ду́ху Свято́му проти́витеся: я́коже отцы́ ва́ши, та́ко и вы. Кого́ от проро́к не изгна́ша отцы́ ва́ши и уби́ша, провозвести́вшая о прише́ствии пра́веднаго? Ему́же вы ны́не преда́теле и уби́йцы бы́сте, и́же прия́сте зако́н повеле́нием а́нгел и не сохрани́сте». Слы́шаще же сия́, распыха́хуся се́рдцы свои́ми и скрежета́ху зубы́ нань.

Толкова́ние Златоу́стаго: Зде про́чее низложе́но сло́во прие́млет на них глаго́ля: «жесто́ции вы́я и необре́заннии се́рдцем» и про́чая. Мно́го у́бо имя́ше дерзнове́ние хотя́щи умре́ти, и́бо смерть свою́, я́ко мню, прови́де. Зри у́бо му́жа, не с гне́вом бесе́дует им, ниже́ доса́дою, но проро́ческими словесы́ воспомяну́ет им. Я́ко бо не бе гнев егда́ злострада́ша, тогда́ моля́шеся о них глаго́ля: «Го́споди не поста́ви им грех сей». Си́це ни гне́вахся, но боле́ па́че о них, и ха́паяся си́це глаго́лаше: «Пре́жде бо и Иереми́я проро́к о них такова́я глаго́лет, вы всегда́ Ду́ху Свято́му противля́етеся» рече́, си́речь егда́ не хотя́ше же́ртвы бы́ти, вы же́ртвы творя́сте; егда́ не хотя́ше да́ти вам повеле́ния прия́ти, прину́дисте; егда́ же прия́сте, неради́сте. Па́киже, егда́ Аста́рху и́долу служи́сте. Егда́ же хо́щет без хра́ма служи́ти Ему́, сопроти́вное же твори́те. И не рече́ «Бо́гу проти́вистеся», но «Ду́ху Свято́му», си́це ни еди́но разли́чие есть Тро́ицы Единосу́щней.

Толкова́ние Севи́рово: Иуде́йский беззако́нный собо́р Ду́ху Свято́му при́сно противля́ющеся и Бо́жиим зако́ном, к худо́му и е́же нас ра́ди смире́нному Бо́жию Сло́ву и Спа́су вочелове́чения, сле́пи су́ще я́ко во тме ходя́ще потыка́хуся. И бысть им ка́мень краеуго́льный и избра́нный че́стный - ка́мень собла́зну, ка́мень претыка́ния. И ника́коже разуме́ша его́ пре́жде существо́, и е́же от Отца́ безтеле́сное рожде́ние, и Роди́вшаго ра́вность, и по всему́ неизмене́ние. «Возвести́вших вам проро́к уби́сте» рече́, и а́нгел[ом] , и Ду́ху Свято́му проти́вистеся рече́. Я́коже и́но писа́ние глаго́лет: «Го́споди, проро́ки Твоя́ уби́ша, и олтари́ Твоя́ раскопа́ша». Се дерзнове́ние му́жа, крест Христо́в нося́щаго.

Су́щее: Стефа́н же, сый испо́лнь Ду́ха Свя́та, воззре́в на не́бо ви́де сла́ву Бо́жию, Иису́са стоя́ща одесну́ю Бо́га. И рече́: «Се ви́жу небеса́ отве́рзста, и Сы́на челове́ча одесну́ю стоя́ща Бо́га».

Толкование Златоу́стаго: Сын челове́ческий есть, И́же одесну́ю Бо́га. И а́ще мни́ши преиме́ние име́ти глаго́лемое - и́же Ду́ха Свята́го испо́лнь, и такова́я па́че сподо́бився ви́дети Стефа́н, и отвещава́ет ти: «Я́ко ви́де Сы́на челове́ча стоя́ща одесну́ю Бо́га, со сла́вою мно́гою».

Вопро́с: Почто́ у́бо стоя́ща, а не седя́ща?

Отве́т: Да пока́жет заступле́ние е́же к му́ченику. И́бо и отцы́ глаго́лется: «Воста́ни Бо́же». Да мно́гое страда́льцу усе́рдие пода́ст, и сотвори́т вражду́ющая посла́бити е́же нань я́рость, помага́ющаго показу́ет о́браз. Я́ко стоя́ у́бо, слы́ши Па́вла глаго́люща: «Се же воздви́же, се посади́ в небе́сных одесну́ю себе́, вы́ше вся́кого нача́лства и вла́сти и госпо́дьства».

Толкова́ние Исихи́ево: Во иуде́ох бо Оте́ц Сы́на своего́ за неве́рие их убо́га су́ща, бога́та в язы́цех сотвори́. Одесну́ю его́ став, е́же ты мни́ши смире́но бы́ти, е́же есть зело́ высо́ко. О Сы́не Еди́нем, я́ко Бо́гу Единосу́щну мо́щно глаго́латися, я́коже бо Сын не то́кмо одесну́ю Отца́ седи́т, но одесну́ю стои́т. Я́коже Стефа́н свиде́тельствует, си́це и Оте́ц стои́т глаго́лется одесну́ю Сы́на, да еди́но мы досто́инство Сы́на и Отца́ навы́кнем. Бо́га ви́дети невозмо́жно, те́мже глаго́лет «ви́дех сла́ву Бо́жию», сию́ сла́ву Бо́гом нари́чет. Те́мже и́же в писа́ниих глаго́лемы ви́дети Бо́га, сла́ву боже́ственную ви́деша: или́ о́гненным виде́нием, или́ столпо́м о́блачном, или́ сапфирови́дных.

Су́щее: Возопи́вше же гла́сом ве́лием, затыка́ху у́ши свои́ и устреми́шася единоду́шно нань. И изве́дше вне гра́да, ка́мением побива́ху его́. И свиде́телие сне́мше ри́зы своя́, положи́ша при ногу́ ю́ноши, нарица́емаго Са́вла. И ка́мением побива́ху Стефа́на, моля́щася и глаго́люща: «Го́споди Иису́се прими́ дух мой». Прекло́нь же коле́ни, и возопи́ гла́сом ве́лием: «Го́споди не поста́ви им греха́ сего́», и сия рек у́спе. Савл же бе споспешеству́я уби́йству его́.

Толкова́ние Златоу́стаго: Я́коже бо на Христа́ сотвори́ша, та́ко и зде. И я́коже Христо́с рече́: «Узри́те одесну́ю Бо́га Сы́на челове́ча седя́ща», и хулу́ вещь наре́кша, устреми́шася Нань, си́це и зде: та́мо расторгну́ша ри́зы, а зде у́ши заткну́ша. А́ще у́бо ло́жная глаго́лаше, я́ко неи́стовна оста́вити подоба́ше. Но хотя́ их привести́, они́же супроти́вна помышля́ют нань: изве́дше вне из гра́да, ка́мением побива́ху. Па́ки вне из гра́да, я́коже и Христа́, и в само́й той сме́рти испове́дание и про́поведь: столпи́ зижда́ху возводя́щая на не́бо. «И свиде́тели положи́ша ри́зы своя́ при ногу́ ю́ноши нарица́емаго Са́вла» рече́. Быв на уби́йство апо́стола Стефа́на му́ченика, обе́щник бе тогда́ уби́йству, всем уби́йцам ри́зы храни́ти восхоте́в, да всех ру́ки на уби́йство обрати́т. Сего́ ра́ди глаго́лет: «Савл же бе спосо́бствуя уби́йству его́». И вели́ко, и изря́дное исправле́ние бысть душа́м на́шим, Го́сподем на́шим Иису́с Христо́м, поне́же бо оправди́хомся ве́рою е́же к Нему́, и в то са́мое безгреше́ние челове́ческо естество́ покая́нием богатя́щее обре́теся. Обнови́ нам е́же не ктому́ во ад сходи́ти душа́м на́шим по разделе́нии те́ла, я́коже и пре́жде, посыла́тися па́че в ру́це Бо́га жи́ва. И се ве́дый блаже́нный Стефа́н глаго́ла: «Го́споди Иису́се приими́ дух мой», си́речь ду́шу мою́. И не про́сто мо́лится. Зри боже́ственную смерть его бы́вшу. Да́же бо до сего́ оста́ви ду́шу в нем бы́ти Влады́ка. В нача́ле пропове́дания Стефа́на, я́коже река́ теку́щая всех везу́щая. И безсту́дныя загражда́я иуде́йския язы́ки, и́мже никто́же проти́витися можа́ше, и све́тлу поста́вив побе́ду, до́блий сей прему́дрый, и́же благода́ти Свята́го Ду́ха испо́лнен сый, и толи́ко Це́рковь по́льзовав, не мно́го вре́мя сотвори́в в пропове́дании, внеза́пу восхи́щен бысть и я́ко ху́льник, благочести́вый от иуде́ев осужда́шеся, и ка́мением до́блий побие́н бысть. Что у́бо не «поста́ви» им согреше́ние, но «оста́ви» рече? И а́ще пока́яшася, оста́вися: и́бо испове́дник уби́йства сего́ и Це́ркви гони́тель Па́вел, Христо́ве Це́ркви предста́тель бысть.

Су́щее: Бысть же в той день гоне́ние ве́лие на це́рковь Иеросали́мскую. Вси же разсе́яшася по страна́х иуде́йских и самари́йских, кроме́ апо́стол. Сотреби́ша же Стефа́на му́жие благогове́йни, и сотвори́ша плачь вели́к над ним.

Толкова́ние Златоу́стаго: Зри, ка́ко па́ки искуше́ния попуща́ет Бог бы́ти, Зри, ка́ко ве́щи стро́ятся: удиви́шася зна́мениих ра́ди, в темни́цы бы́вше, ничто́же пострада́ша, уста́виша слуги́ рукоположе́нием, растя́ше сло́во. Па́ки попуща́ет возбране́ние вели́ко бы́ти и гоне́ние нема́ло. Убоя́ша бо ся, дерзнове́ние о́нем прие́мшим, вку́пеже по́казуется, я́ко челове́цы бя́ху страху́ющеся и бе́гающе. Да не у́бо глаго́леши, я́ко благода́тию то́чию исправля́ху я́же исправля́ху. Гони́ми же ти́и и страшли́вейши бы́ша, они́ же дерзне́йши. Разуме́й, я́ко се смотре́ние бысть и я́ко не ктому́ про́чее во Иеросали́ме всех соде́яти без сумне́ния. Смеша́хуся самаря́ном про́чее, слы́шавше «в путь язы́к не иде́те». «Кроме́ апо́стол» рече́. А́ще благогове́йни бы́ша, почто́ плач сотвори́ша? Еще́ не бя́ху соверше́ни. И се показу́ет челове́чески су́ще: не то́чию страх, но скорбь и плачь. Кто у́бо не попла́кал бы кро́ткого о́ного а́гнца, ка́мением побие́на бы́вша и ме́ртва лежа́ща?

Су́щее: Савл же озлобля́ше Це́рковь, по домо́х входя́ и влача́ му́жа и жены́, предая́ше в темни́цу. Они́же у́бо разсе́явшеся, проидо́ша благовеству́юще сло́во.

Толкова́ние Златоу́стаго: Мно́га зло́ба е́же еди́ного бы́ти и е́же в до́мы входи́ти: ду́шу у́бо свою́ дасть о зако́не. «Пла́каше рече́ му́жие и жены́». Зри дерзнове́ние и доса́ду и вражду́: впа́дающе все в руку́ его́, безчи́сленных влага́ет зло́бы. От заколе́ния бо Стефа́нова де́рзостнейши бы́ша: ни смерть Стефа́нова угаси́ им я́рость, но и па́че простре́. Расточи́ учи́тели, я́ко мно́жае бы́ти учи́тельство. А́ще и плачь бысть ве́лий, но зри па́ки блага́я: в ма́ло вре́мя неду́г бе, и та́ко их свободи́: «Разсе́яни же рече́ приидо́ша благовеству́юще сло́во».

Коне́ц толкова́нию.