Пятидесятница

В после́дний день вели́кий пра́здника стоя́ше Иису́с, и зва́ше глаго́ля. А́ще кто жа́ждет, да гряде́т ко Мне, и пие́т. Ве́руяй в Мя, я́коже рече́ писа́ние, ре́ки от чре́ва его́ истеку́т во́ды жи́вы. Се же рече́ о ду́се, Его́же хотя́ху приима́ти ве́рующеи во и́мя Его́. Не у́ бо бе Дух Святы́й, я́ко Иису́с не у́ бе просла́влен. Толкова́ние. Три пра́здники пра́здноваху иуде́и. Пра́здник Па́схи, о воспомина́нии исхо́да еги́петскаго, и свобоже́ния их, егда́ и чермно́е мо́ре немо́крено проидо́ша. И составле́ние ски́нии, на воспомина́ние пусты́ннаго жития́, и е́же та́мо страда́ние их. В хи́жах бо пребыва́ющим тогда́, е́же нарица́ются коли́бы, четы́редесят лет та́мо сотвори́ша. Пятьдеся́тный же пра́здник, на воспомина́ние зако́ннаго прия́тия. И вхожде́ния земля́ обетова́нныя. Поне́же тогда́ пре́жде вкуси́ша плода́ пшени́ца и вина́, и про́чая. В пусты́ни бо неора́н и без се́мене хлеб ядя́ху, с небесе́ сходя́щ. И рукоя́ти приноша́ху от нив на пра́здник. Того́ бо ра́ди пра́здник нарица́шеся но́вых плод и рукоя́тия. По па́сце у́бо седмь неде́ль исчита́ху иуде́и, е́же есть пянтико́стия. По преше́ствии бо чермна́го зато́ка, пятидеся́тим днем мимоше́дшим, дан бысть им зако́н от Бо́га. Сего́ ра́ди глаго́лют, и собира́хуся вси в це́рковь, на три сия́ пра́здники. Зако́н бо та́ко повелева́ше им собира́тися. Я́ко и боже́ственыя и вели́кия да́ры Бо́жия воспомина́ти. И в едине́ние и любо́вь друг со дру́гом совокупля́ются. В сия́ у́бо пра́здники явля́ется и Госпо́дь наш Иису́с Христо́с, собира́яся с ни́ми, и ку́пно пра́зднуя, да не яви́тся супроти́вен зако́ну. Той бо есть Пода́тель зако́на. Да́же и мно́жайших зна́меньми и поуче́ньми приведе́т. Стоя́ше у́бо Иису́с Христо́с и Бог наш, и возопи́ глаго́ля. А́ще кто жа́ждет да гряде́т ко Мне, и да пие́т. Никого́же ну́ждею, или́ си́лою привлачи́т Христо́с, но име́юща усе́рдие мно́го и те́пло, сего́ призыва́ет, и сего́ напая́ти хо́щет. Не хотя́щаго же не понужа́ет, ниже́ си́лует. А́ще кто жа́ждет да гряде́т ко Мне, и да пие́т. Той бо есть Бо́жия му́дрость и си́ла, я́же свое́ вино́ почерпа́ет в Свое́й крати́ре, и повелева́ет пи́ти хотя́щим. Той есть преве́чное и присносу́щное Сло́во О́тчее, И́же тогда́ и ны́не стоя́щий, и на питие́ жа́ждущих призыва́я. Той есть Влады́ка тва́ри, И́же весь есть сла́дость и вожделе́ние, пи́во пои́стине живото́чное. Вели́кая и и́стинная и приснотеку́щая река́, Иису́с пресла́дкий Бог наш. От Него́ же вся ре́ки, и вся сла́дкая моря́, и исто́чницы и езе́ра, и кла́дязи истека́ются. Вку́сим у́бо бра́тие, вку́сим и позна́ем и ви́дим я́ко благ Госпо́дь, благосты́ни и безсме́ртия неизчерпа́емая пучи́на. Вода́ сла́дка и жива́я и теку́щая, преистека́ющася и прелива́ющася. Пия́й бо во́ду сию́, не вжада́ется во ве́ки. Вси жа́ждущеи на во́ду сию́ приходи́те, и напи́йтеся, и жизнь приими́те. Я́коже бо жела́ет жадя́щий еле́нь на исто́чники водны́я, та́коже и мы жела́ти до́лжни есмы́. И жада́ти боже́ственыя воды́, и поуче́ния Спа́са на́шего и Бо́га, и любо́вь име́ти насы́тну. Я́коже глаго́лати и ко́ждо нас, по богоотце́ святе́м Дави́де. Бо́же Бо́же мой к тебе́ у́тренюю, возжада́ тебе́ душа́ моя́. Возжада́ющеи бо, егда́ в рука́х ча́шу испо́лнь почерпа́ния прии́мут, со мно́гим усе́рдием сию́ привлача́т, и испи́вше утеша́ются. Та́коже и слы́шащеи боже́ственая словеса́, а́ще жадя́щии прие́млют, до́ндеже испию́т е́, и николи́же не преста́нут. Блаже́ни у́бо рече́ а́лчущеи и жа́ждущеи я́ко ти́и насы́тятся. Ве́рующеи в Мя я́коже рече́ писа́ние, ре́ки потеку́т от чре́ва его́ воды́ живы́я. Чре́во бо зде се́рдце глаго́лет, си́речь смышле́ние, и слове́сное души́. Я́коже в друго́м глаго́лет, и зако́на Твоего́ посреди́ чре́ва моего́ благовести́х. От чре́ва бо ве́рующаго, пра́во рече́ писа́ние, вода́ жива́ глаго́лет Христо́с потече́т. Си́речь, духо́вное поуче́ние, напая́ющее ду́ша послу́шающих. И мно́го изъоби́льное благода́ти дар во́ду нарица́ет, си́речь, вы́ну присноде́йствующу. Вода́ жива́ есть ка́пля поуче́ния Христо́ва. Поне́же бо я́ко вода́ очища́ет скве́рну греха́, и угаша́ет пла́мень страсте́й, и безве́рие и сухоту́ и непло́дие исцеля́ет. Вода́ жива́ благода́ть есть Ду́ха Свята́го, разли́чно бо нарица́ется, по разли́чию де́йства Его́. Ны́не у́бо вода́ нарица́ется, иногда́ же огнь. Оба́че же вода́ глаго́лется, поне́же я́ко вода́ с небесе́ сходя́щеи, пита́ет и напая́ет. И еди́на виде́нием су́ща, разли́чно де́йствует. Убеля́я, очерня́я, очервля́я, и обагря́я, услажа́я, и огорча́я. Та́коже и Дух Святы́й с небесе́ сходя́щь, напая́ет и пита́ет ду́шу, и еди́ну су́щу на разли́чная де́йства разделя́ет благода́ть и си́лу. Огнь же нарица́ется Дух Святы́й. И я́коже бо огнь единови́ден сый, многоразли́чно де́йствует. Согрева́я и попаля́я и просвеща́я и очища́я. Та́коже и Дух Святы́й. Разделе́ние бо суть даро́в по апо́столу, То́йже Дух. И разделе́ния слу́жбам есть, То́йже Госпо́дь. И разделе́ния де́йствам суть, То́йже Бог, де́йствуяй во всех вся. Кому́ждо же дае́тся явле́ние Ду́ха на по́льзу. О́вому у́бо Ду́хом дае́тся сло́во прему́дрости. Ино́му же сло́во ра́зума, о том же Ду́се. Друго́му же ве́ра, те́мже Ду́хом. Ино́му же дарова́ние целба́м. Ино́му же де́йства си́лам. Ино́му же проро́чество. Друго́му же разсуже́ния духово́м. Ино́му же роже́ние язы́к. Си же вся де́йствует то́йже еди́н Дух, разделя́я вла́стию кому́ждо я́коже хо́щет. Свет есть и живо́т, и живы́й исто́чник мы́сленый, Дух прему́дрости. Дух ра́зума, благ прав мы́слен, влады́чествующь, очища́я прегреше́ния. Бог, и боготворе́ц. Огнь, от огня́ исходя́й. Глаго́ля де́йствуя, разделя́я дарова́ния. Благода́ть у́бо Ду́ха Свята́го егда́ в чи́сто се́рдце прии́дет, и в нем ме́сто обря́щет. Па́че вся́каго исто́чника мно́жае истека́ет. Ниже́ преста́ет николи́же, ни истоща́ется, ниже́ весма́ стои́т. Се же ве́мы опа́сно в са́мых апо́столех, не боя́хубося апо́столи учи́ти и благовеща́ти сло́во Бо́жие. Но мучи́тельская воста́ния и наве́ты мно́гих град, и я́рость наро́д свире́пых, нивочто́же имя́ху. И ре́ки источи́ша поуче́ния воды́ живы́я. Се же Ду́ха Свята́го благода́ть бя́ше, я́коже и евангели́ст глаго́лет. Се же рече́ о Ду́се, и́же хотя́ху приима́ти ве́рующеи Вонь. Еще́ бо не бя́ше Дух Свят, поне́же Иису́с еще́ не бя́шеся просла́вил. Ниже́ бо пре́жде креста́ и стра́сти и воста́ния, дре́внюю добро́ту прия́хом, ея́же преступле́нием погуби́хом. Искони́ бо челове́к нетле́нен сотворе́н бысть, но преступи́в за́поведь, с про́чими да́ры и Ду́ха Свята́го прие́млет лише́ние. Глаго́лет бо блаже́ный Моисе́й. И созда́ Бог челове́ка, персть прие́м от земля́, и ду́ну на лице́ его духнове́ние живота́. Зане́же у́бо к сме́рти испаде́ преступле́ния ра́ди, и дре́вняя че́сти о́ны погуби́. Обнови́ па́ки его́ Христо́с, и на пе́рвую по́честь возведе́ духнове́нием. Обнови́ти бо па́ки восхоте́ вся, я́ко всех Зижди́тель и Госпо́дь и Влады́ка. Сего́ ра́ди со все́ми про́чими обеща́ся, да́ти ученико́м Дух Святы́й. Е́же бо и даде́ по Воскресе́нии, ду́нув и рек им, приими́те Дух Свят. Трети́цею же дан бысть Дух ученико́м от Христа́. Пре́же распя́тия зело́ не я́ве. По воскресе́нии же по дуновле́нием явля́ше. По вознесе́нии же посла́ И́ су́ществено, па́чеже сам Той Дух Святы́й сни́де, соверше́но просвеща́я и освяща́я их. Бя́ше бо и пре́жде во проро́цех, просвеще́ние боже́ствено и бога́тно Ду́ха Свята́го. Науча́я и наставля́я сих, на хотя́щее и бу́дущее постиже́ние благи́х. Уде́ржана же бысть благода́ть, и исчезе́ от земля́ от дне о́ного, от него́же рече́но бысть, я́ко се оставля́ется дом ваш пуст. Ктому́ же не бя́ше проро́чьство во иуде́ох, ниже́ на свята́я их призира́ше благода́ть. Оба́че же и апо́столи пре́же распя́тия бе́сы изгоня́ху, и исцеле́ния вся́ческая творя́ху, споспеше́нием Ду́ха Свята́го и благода́тию. Напосле́док же по Воскресе́нии, бога́тно излия́ся благода́ть Ду́ха Свята́го. И не то́кмо бо во апо́столех де́йствоваше, но и ты́сяща и тмы от них испо́лнишася. И поне́же у́бо сию́ благода́ть хотя́ху приима́ти ве́рующеи, еще́ бо не бя́ше дана́ благода́ть. Сего́ бо ра́ди рече́, я́ко не бя́ше еще́ Дух Свят, поне́же Иису́с еще́ не бя́шеся просла́вил. Сла́ву бо крест нарица́ет и Воскресе́ние. Еще́ бо не бя́ше дан Дух Святы́й ученико́м, и ве́рующим Вонь. Сла́ву же крест нарица́ет, поне́же бо в про́чих всех поноше́ние бя́ше, и безче́стие крест. Я́ко же вели́ким прегреше́нием за́поведь, еди́ным же Христо́м сла́ва бысть. Я́ко ве́лии любви́ е́же к нам хода́тай есть. Кто бо па́мятну ду́шу име́я, слы́шаще бо́лшаго вся́кия че́сти, толи́кое безче́стие прие́мша Христа́, не просла́вит ли безчи́сленое Его́ милосе́рдие исхоже́ние; Пре́жде бо распя́тия, не даде́ Ду́ха ученико́м Христо́с, но власть на ду́хи нечи́стыя, я́ко изгоня́ти их, и цели́ти всяк неду́г, и вся́ку я́зю. По распя́тии же и по Воскресе́нии, Дух Святы́й дарова́ им. Не я́ко ме́ртвыя воскреша́ти, или́ и́на ка́я твори́ти, но грехи́ оставля́ти. Ду́ну у́бо рече́ и глаго́ла им, приими́те Дух Святы́й. А́ще кому́ оставля́ете грехи́, оста́влени бу́дут им. А́ще ки́им удержите́, уде́ржани бу́дут. Поне́же бо согреши́вше, и прирази́вшеся врази́ бе́хом Бо́гу. Благода́ть же Ду́ха Свята́го дар есть. Дар же любо́вным дае́тся. Подоба́ше бо пре́жде принести́ же́ртву е́же нас ра́ди, смире́ние и разруше́ние вражды́, е́же бя́ше закла́ние слове́снаго а́гньца смерть Христо́ва, и тогда́ пото́м дана́ бысть благода́ть. По Вознесе́нии же бога́тно излия́ся благода́ть Ду́ха Свята́го. Я́ко же и ве́рующим во Христа́, и за́поведьми очища́ющимся, не озаре́ние и просвеще́ние есть про́сто та́ко духо́вное. Но са́мый Той Дух Святы́й пребыва́ти ве́руем по рече́нному, вселю́ся в них и похожу́. И я́ко Ца́рство небе́сное внутрь вас есть. Ца́рьство же небе́сное сла́ву Ду́ха Свята́го глаго́лет, водворя́етбося в нас Дух ве́рою. Ве́руяй в Мене́, я́коже рече́ писа́ние, ре́ки потеку́т от чре́ва его́. Поне́же бо мно́зи ве́роваша чуде́с ра́ди. Сего́ ра́ди глаго́лет Христо́с, я́коже рече́ писа́ние. Да́же научи́мся, я́ко испра́вленая ве́ра от писа́ния есть, а не от зна́мен. И та́ко подоба́ет ве́ровати я́ко от писа́ний. Сведе́тельствует бо писа́ние, я́ко единоро́дный Сын Бо́жий есть Христо́с, и я́ко Зижди́тель и Влады́ка. Я́ко Госпо́дь всем и благода́тель, я́ко Спас ми́ру и свободи́тель. Мно́зи бо мня́ху ве́ровати, но непра́во, ни я́коже рече́ писа́ние. И поне́же бо они́ свои́м ересе́м после́доваша, того́ ра́ди и погибо́ша. Не всяк глаго́ляй Ми Го́споди Го́споди вни́дет в Ца́рство небе́сное, но творя́й во́лю Отца́ Моего́ небе́снаго. И па́ки мно́зи реку́т Ми в день он. Го́споди, Го́споди, не Твои́м ли и́менем проро́чествовахом, и Твои́м и́менем бе́сы изгна́хом, и Твои́м и́менем си́лы мно́гия сотвори́хом. И пове́м им, я́ко николи́же позна́х вас. Отступи́те от Мене́ вси де́лающеи безза́коние. Такови́ у́бо суть вси еретицы́. Мно́зи бо лжи проро́цы, и лжеучи́тели, овча́та бы́ти явля́ющеся во́лцы су́ще, уморя́юще слове́сная овча́та Христо́ва. Сих бо всех отрица́ется Госпо́дь глаго́ля, не ве́де вас, отступи́те от Мене́ вси де́латели непра́вде. Мно́зи же от наро́да слы́шавше сло́во се глаго́лаху. Се есть воис́тину проро́к. О нем же Моисе́й написа́, я́ко проро́ка вам возста́вит Госпо́дь Бог. И вои́стину я́ко сей бя́ше, они́ же проро́ка Его́ мня́ху про́ста бы́ти я́коже Моисе́я, а не Бо́га. Ини́и же глаго́лаху, я́ко сей есть Христо́с, и вои́стину сей бя́ше. Но они́ глаго́лющеи сия́, про́ста челове́ка мня́ху Его́ бы́ти. Ини́и же глаго́лаху, еда́ от Галиле́я Христо́с прихо́дит. Оба́че же ни сей в Галиле́и роди́ся, но в Вифлее́ме. Не писа́ние ли рече́, от се́мени Давы́дова, и от вифлее́мскаго села́, иде́же бе Дави́д, Христо́с прихо́дит. И́бо и Христо́с отту́ду бя́ше, от се́мени Давы́дова, и от Вифлее́мска села́. Сие́ бо село́ роди́ Его́, Назаре́т же воспите́ И́. Капернау́м же имя́ше Его́ живу́ща вы́ну. Кни́жницы же и фарисе́и злохоте́нием оте́чество Христо́во глаго́лют Назаре́т, отну́ду бя́ше Ма́ти и оте́ц Его́ мня́щиися. Да́же от Вифлее́ма не нарица́ем быва́я Христо́с, уве́рен бу́дет проро́чествия ра́ди. Рече́ бо проро́к Михе́й, и ты Вифлее́ме земле́ иу́дова, ничи́м же ме́нши бу́деши во влады́ках иу́довах. Из тебе́ бо изы́дет Вождь, И́же упасе́т лю́ди Моя́ Изра́иля. Разделе́ние же в наро́де Его́ ра́ди бысть, ко́ждой стране́ распира́ющеися. Не́цыи же от них хотя́ху я́ти Его́, я́ко преле́стника и престу́пника зако́ну. Но никто́ же возложи́ Нань ру́ки, удержа́я их неви́димо и возбраня́я. Поне́же бо и еще́ не хотя́шеся преда́ти Христо́с. Ева́нгелие. Приидо́ша же слуги́ ко архиере́ом и фарисе́ом, и ре́ша им ти́и. Почто́ не приведо́сте Его́. Отвеща́ша слуги́, николи́ же та́ко есть не глаго́лал челове́к, я́ко сей Челове́к. Толкова́ние. Идо́ша у́бо слуги́ связа́ти Христа́. Возврати́шажеся они́, свя́зани бы́вше чудесми́ слове́с Его́. Посла́вшеи бо их архиере́и и кни́жницы и фарисе́и, мно́га словеса́ слы́шавше Христо́ва. И чудеса́ мно́ги ви́девше, и е́же о нем проро́чествия прочита́юще. И прему́дри мня́щеся, ничто́же разуме́ша, помрачи́шася за́вистию и зло́бами. По́слании же приобрето́шася, нелицеме́рну бо мысль име́яху, завиде́ния и зло́бы кроме́ су́щим. Отну́ду бо не то́кмо же есть удиви́тися ра́зуму слуг оне́х, но и дерзнове́нию их. Не ре́ша бо, я́ко поне́же не сотворя́тися молве́ в лю́дех оста́вихом Его́, ниже́ покрове́на веща́ния не́кая глаго́лют, но са́мыя ты́я и́стины глаго́лют. И пропове́дают прему́дрость и си́лу Христо́ву. Ева́нгелие. Отвеща́ша же им фарисе́й, еда́ и вы прельще́ни бы́сте. Толкова́ние. Зри́те у́бо за́висть, и неи́стовьство и лука́вьствие. Не хотя́ху бо вопраша́ти и уве́дати что глаго́лал есть Христо́с, но а́бие ласка́ют их. Ктому́ же несвире́пие показу́ют им, боя́щеся еда́ до конца́ приложа́тся Христу́. Ева́нгелие. Еда́ кто от князь ве́рова Вонь, или́ от фарисе́й. Но наро́д сей и́же не весть зако́на. Толкова́ние. Бо́льшее бо осуже́ние па́че, архиере́ом и кни́жником и фарисе́ом се есть. Поне́же бо наро́ди ве́роваша во Христа́, они́ же неве́роваша. Зако́н же глаго́лет зде, все писа́ние ку́пно. Но наро́д сей не ве́дяй зако́на про́кляти суть. И зако́н у́бо про́клял есть преступа́ющих зако́на. Архиере́и же иуде́йстии, и кни́жницы и фарисе́и, про́кляти суть преступа́юще зако́на. Наро́ди же соблюда́ют зако́на. Ве́рующе Христо́ви. Повелева́ет бо зако́н ве́ровати в Бо́га. Ева́нгелие. Глаго́ла Никоди́м к ним, и́же прише́дшый к Нему́ но́щию, еди́н сый от них. Еда́ зако́н наш су́дит челове́ку, а́ще не слы́шит от Него́ пре́жде, и разуме́ет что твори́т. Толкова́ние. Еди́н от князь бя́ше Никоди́м, а́ще и они́ глаго́лаху, я́ко никто́же от князь ве́рова Вонь. Облича́ет же их, престу́пники зако́ну показу́я их, оба́чеже покрове́нно и пощаде́нием. А́ще бо подо́бное дерзнове́ние не имя́ше Никоди́м. А́ще бо зако́н не осужа́ет, пре́же слы́шати и разуме́ти. Они́ же осуди́ша Христа́ пре́же сло́ва и разуме́ния. Преступи́ша ве́де вои́стину зако́н. Ева́нгелие. Отвеща́ша и реко́ша ему́. Еда́ и ты от Галиле́я еси́. Толкова́ние. Еда́ тоя́же страны́ и о́тчины еси́, и того́ ра́ди помага́еши Ему́. Ева́нгелие. Испыта́й и виждь я́ко проро́к от Галиле́я не прихо́дит. Толкование. Свире́пно бо и я́ростно отвеща́ху Никоди́му. Оба́чеже не рече́ я́ко проро́к есть, но я́ко осуди́ти Его́ без истяза́ния не подоба́ет. Они́же поруга́нно глаго́лют. Вопроси́ и уве́ждь, не ве́си бо писа́ния. А́ще у́бо не ве́дел бы Никоди́м писа́ния, ка́кобы обличи́л их преступа́ющих зако́на. Но до́бре глаго́лет при́тча. Не облича́й злы́я да не возненави́дят тебе́. Облича́й прему́дра и возлю́бит тя. Даждь прему́дрому пр́итчу, и прему́дрее бу́дет. Сказа́й пра́ведному, и приложи́т приима́ти. Ева́нгелие. Па́ки же Иису́с рече́ им глаго́ля. Аз есмь Свет ми́ру. После́дуяй Мне, не и́мать ходи́ти во тме. Толкова́ние. Поне́же бо вы́ше и ни́же обраща́ху Галиле́я иуде́и. И проро́ка нарица́ху Христа́. Той всех избавля́я такова́го погреше́ннаго мне́ния, и чу́ждия сла́вы показа́ше я́ве, я́ко не еди́н от проро́к есть, я́коже си́и мнят, но всего́ ми́ра Влады́ка есть. А́з есмь Свет ми́ру глаго́лаше, и не Галиле́и то́кмо и Иуде́и, но всему́ ми́ру есмь Свет. Нарица́ет же Себе́ Христо́с Свет ми́ру, зна́менуя све́та боже́ственыя сла́вы. И я́коже све́тлостию ра́зума, очище́ныя я́ко душе́вно озаря́я. И я́же во тме неве́дения содержи́мых просвеща́я. Свет бо Христо́с, я́ко душа́м просвети́тель, и́́же житием и сло́вом очища́ющимся. А́ще помраче́ние есть, неразуме́ние и грех. Свет у́бо ве́де есть, ра́зум и житие́ по Бо́зе быва́ющее. Свет нарица́ется Христо́с, я́ко просвеща́я ума́ на уве́дение неве́домых. И показа́я есть ви́дима та́иньства, чи́стым се́рдцем, Бог бо Со́лнце пра́ведное, я́коже пи́́шет, всем просто сия́я заря́ благода́ти. Душа́ же по изволе́нии свое́м, или́ я́ко воск быва́ет боголю́́бием, или я́ко кал любомоты́лием ми́ра сего́. Я́коже бо кал по естеству́ со́лнцем изсыха́ет, та́коже и вся́ка душа́ любомоты́лна и миролюби́ва, от Бо́га поучава́ема. И я́коже кал по изволе́нии, воображе́ние отвраща́ющи же́стока быва́ет. И себе́ порева́ет на погубле́ние, я́коже тяжкосе́рдый фарао́н. Вся́кая же душа́ боголюби́вая я́ко воск умягча́ется, и боже́ственая воображе́ния и начерта́ния прие́млющи, быва́ет Бо́жие жили́ще ду́хом. Ева́нгелие. Ходя́й по Мне, не и́мать ходи́ти во тме, но и́мать свет живо́тный. Толкова́ние. Си́речь, не и́мать пребыва́ти в заблуже́нии и во гресе́, и не и́мать ходи́ти во тме, но во све́те живота́ и́стины и пра́вды. Кто есть после́дуяй Христу́; Благочести́вии и пра́ведно живу́щеи, и благогове́йно и благообра́зно, я́ко во дни ходя́щеи. И мы у́бо бра́тие, благоче́стно и пра́ведно и непоро́чно поживе́м, и благообра́зно хо́дим, и после́дуем све́ту ве́ры за́поведей Христо́вых. А не в беззра́чней тме кроме́шняя тмы и греха́, и зло́бы и заблуже́ния пребу́дем. Но име́ти све́та ве́чнаго живота́, невече́рня же и не погубля́ема. На вся́ку же доброде́тель простре́м себе́ бра́тие, и крепча́йше теце́м. Воспряну́вше от разслабле́ния и поко́я, на тру́днейший путь преходя́ще. Дово́лно бо торжествова́хом ра́достная, и коленопрекло́нныя труды́, и друга́я жесто́кая жития́, поко́й обрета́хом, в пра́зднованныя дни воскресе́ния. В сия́ у́бо дни, ниже́ се́товати, ниже́ коле́на прекланя́ти, повелева́ют нам. Поне́же бо пло́тию пострада́, и во́лею нас ра́ди прия́т погребе́ние, я́ко Бог челове́к Госпо́дь, и воскре́с от гро́ба тридне́вно. И нас умерщве́ных грехо́м, с Собо́ю воскреси́. И та́ко врази́ на́ши бе́сове, низложи́шася. Ти́и спя́ти бы́ша и падо́ша. Мы же возста́хом, и про́сти бы́хом. Соверша́ющужеся дню пятьдеся́тному, о́гнеными язы́ки Пресвято́му Ду́ху нам я́вльшуся. Коле́на прекланя́ем вси, таково́е виде́ние не терпя́ще. И показу́юще, я́ко Ду́хом Святы́м в Тро́́йце совершеное покланя́ние навыко́́хом. Дух бо есть Бог. И покланяющимся Ему́, ду́хом и и́стиною подоба́ет кла́нятися. Коле́на прекланя́юще у́бо чи́стым се́рдцем, и покланя́ющеся Святе́й и Животворя́щей и Нераздели́мей Тро́йце. Тепле́йше бо и на́часте до́лжни есмы́, по неде́ли сей притека́ти и собира́тися в боже́ственыя и свяще́ныя хра́мы. И опа́сно и подви́жно боже́ственая пе́ния и чте́ния послу́шати, и от плода́ сих по́льзоватися. Словеса́ бо Госпо́дня, словеса́ чи́ста суть. Вожделе́нна па́че зла́та и ка́мения че́стна мно́га, и сладча́йша па́че ме́да и со́та. Научи́мся у́бо бра́тие, от боже́ственых писа́ний. Неми́лостивии, ми́лованию. Невозде́ржьнии, воздержа́нию. Блу́днии, целому́дрию. Гне́вливии, кро́тости. Малоду́шнии, долготерпе́нию. Сребролю́бцы, име́ния презре́нию. Высокоу́мнии, смире́нию. Вси вся от боже́ственых писа́ний научи́мся ели́ка на по́льзу, и ели́ка на спасе́ние душа́м на́шим. Смири́мся у́же под кре́пкую ру́ку Бо́жию, да́же не всу́е теце́м. Стра́хом и тре́петом, и слеза́ми и воздыха́нми, умо́лим милосе́рдаго и долготерпели́ваго Бо́га. Да не у́зрим Его́ гне́влющася на нас, и я́звяща на́часте, и ра́ны на ра́ны возлага́юща, уцелому́дрити нас хотя́ща. Не ожести́мжеся бра́тие, ниже́ ле́ностно прилежи́м. А́ще бо не обрати́мся, бою́ся и устраша́юся, всеконе́чнаго осужде́ния и погубле́ния. Пока́емся отсе́ле молю́ся, и блага́я твори́ти потщи́мся. Да́же угото́ваннаго гне́ва на нас отвра́тим, и бу́дущая му́ки убежи́м. И ве́чная блага́я получи́м, о Христе́ Иису́се Го́споде на́шем, с Ним же Отцу́ ку́пно и Ду́ху Свято́му, сла́ва и держа́ва, честь и покланя́ние. Ны́не и при́сно и во ве́ки веко́в, Ами́нь.

О Пра́зднице ма́ла возлюбому́дрствуем, да ду́ховно возпра́зднуем. И́но у́бо ино́му торжество́, уго́днику же Сло́ва сло́во, и слове́с вре́мени прино́снейшее, и ин еди́но та́ко весели́т до́брое, добролюбе́зных ни еди́наго, я́ко торжествова́ти духо́вно любопра́зднственнику. Смо́трим же си́це, пра́зднует и иуде́й, но по пи́смени: теле́сен бо гоня́ зако́н. В духо́вен зако́н не дости́же. Пра́зднует и е́ллин, но по телеси́, и свои́м бого́м же и де́моном: их же о́ви у́бо суть страсте́й соде́теле по самы́м о́нем: о́виже от страсте́й почто́шася. Сего́ ра́ди стра́стное их и е́же пра́здновати, да бу́дет честь бо́гу, е́же греши́ти, коему́же прибега́ет страсть, я́ко честносло́вие. Пра́зднуем и мы, но я́ко мни́тся ду́ху. Мни́тся же, или́ глаго́лющим не́что подоба́ющих, или́ де́ющым. И сие́ есть пра́здновати на́ше, души́ не́что сокро́вищити от стоя́щих, и держи́мых, но не от ходя́щих, и реши́мых, и ма́ла ласка́ющих чу́вство. Вя́щшая же гу́бящих, и вредя́щих, по моему́же сло́ву. Дово́лно бо те́лу зло́ба его́. Что бо тре́бствует пла́мени вя́щшия ве́щи, или́ зве́рю оби́лнейшия пи́щи, да па́че неудободержи́м бу́дет, и по́мысла нуждне́йш. Сих ра́ди у́бо пра́зднователно духо́вне, нача́ло же сло́ва. Глаго́лателно бо. И а́ще ма́ло что преисхо́днейшее нам сло́во, и люботружда́телно любосло́вцем. Да я́коже услажде́ние не́кое торжеству́ сосмешы́м, седми́цу чтят евре́йстии о́троци, от моисе́ова законоположе́ния, я́коже пифаго́рици четвери́цу после́жди, и́же у́бо и роту́ сотвори́ша, и осли́цу, и тридеся́тицу симониа́не и маркио́няне, и́миже у́бо и равночи́сленыя не́кыя ве́ки имену́ют, и чтут, не вем у́бо ки́ми словесы́ возсло́вия, или́ по ко́ей числа́ сего́ си́ле. Чтут же у́бо, е́же у́бо проявле́но, я́ко в шесть дни, Бог вещь соста́вив же и вообрази́в, и украси́в вся́кими ви́дами, и сосужде́нми, и ны́не ви́димый мир сей сотвори́в, в седмы́й почи́ от дел, я́ко явля́ет, и савва́ти нарече́ние, поко́й евре́йски знамену́ющее. А́ще же ко́е и вы́шшее о сих сло́во, и́нии да любому́дрствуют. Честь же им не во днех то́чию, но и в ле́та достиза́ющи. О́ва у́бо дней, савва́та, сие́ явля́ет, при́сно у них что́ма: я́коже и ква́са отъя́тие равночи́слено. О́ва же лет, седми́чное ле́то оставле́ния, и не в седми́цах то́чию, но и в седми́цах седми́ц, подо́бне и во днех же и ле́тех. О́вия у́бо дней седми́ци, ражда́ют пятьдеся́тницу, нарече́нный святы́й у них день. О́вия же лет, Иовиле́а у них имену́ема. Подо́бне земли́ же оставле́ние иму́ща, и раб свобо́ду, и стяжа́ний ку́пленых отше́лствие. Освяща́ют не плодо́в то́чию, ниже́ перворожде́нных, но уже́ и дней, и лет нача́тки, Бо́гу сей род. Та́ко седмо́е что́мо число́, честь пятьдеся́тници совведе́. Седмо́е бо на себе́ слага́емое, ражда́ет пятьдеся́тное, еди́ному оскудева́ющу дню, его́же от бу́дущаго ве́ка привзя́хом, осмы́й же сущ то́йжде, и пе́рвый, па́чеже еди́н и не раздруши́мь. Подоба́ет бо та́мо сконча́тися та́мошнему саввати́сму душ, я́ко дану́ бы́ти часть седми́м, и осми́м же: я́ко уже́ не́ции пре́жде нас, соломо́нское прия́ша. Седми́ же че́сти, мно́га у́бо сведи́телства, ма́ла же от мно́гих нам удовле́ют, я́ко седмь у́бо имену́еми честни́и ду́хове. Де́йства бо непщу́ю Ду́ха, ду́хы лю́бно Иса́ии нарица́ти, очище́на же словеса́ Госпо́дня по Дави́ду седмогу́бо. И пра́ведник у́бо шести́щы, от нужд у́бо изъе́млемь, в седмо́м же ниже́ ураня́емь. Гре́шник же, не седми́щи то́чию, но и седмдесяти́щи седмь проща́емь. И у́бо па́ки от проти́вных. Похва́лна бо зло́бы му́ка. Ка́ин у́бо отмща́емь седми́щи, си́речь ка́зней истяза́емь братоуби́йства. Ламе́х же седмдесяти́щи седмь, я́ко уби́йца бе по зако́не, и осужде́нии. Лука́вии же сосе́ди, седмогу́бля в не́дро свое́ восприе́млюще. Седми́ же столпа́ми му́дрости дом утвержда́емь. Толи́кы же очесы́ зорова́велев ка́мень украша́емь. Седми́щи же в день Бог хвали́мь, и у́бо и непло́ды ражда́ющи седмь, соверше́нное число́, не соверше́ннаго в ча́дех противоположи́. А́ще же подоба́ет и ве́тхыя по́вести смотре́ти, помышля́ю седма́го у́бо в прароди́телех Ено́ха, преложе́нием почте́на. Помышля́ю же двадеся́того пе́рваго Авраа́ма, патриа́ршеством просла́влена, та́йны прило́гом вя́щшия. Утроя́ема бо седма́я седми́ца, число́ сие́ де́лает. Дерзне́т же у́бо кто все́ми ю́ношеских, и до но́ваго Ада́ма дойти́ Бо́га моего́, и Го́спода Иису́са Христа́ от ве́тхаго * под грехо́м Ада́ма, седмдеся́таго седма́го чи́слимаго: по Лукину́ родосло́вию воспяща́ющу. Помышля́ю же и седмь трубы́ Иису́са нави́, и обхожде́ния толи́ка, и дни, и иере́и, от ни́хже иерихо́нския сте́ны потряса́ются. Я́коже и седми́чное возвраще́ние. Я́коже та́инственное трегу́бое вдунове́ние Илии́ проро́ка, сара́ффския вдовы́ сы́ну, е́же жи́ти вдохну́вшее, и того́жде равночи́слено, на поле́на полия́ние, егда́ огне́м богопо́сланым же́ртву потреби́, и сту́дныя проро́ки осуди́, ра́внаго и не возмо́гшым от призва́ния. Та́кожде и седми́щное смотре́ние о́блака о́трочищу повеле́ное, елиссе́ово же ра́вно преклоне́ние на о́трока суманитяны́ни дыха́ние живоо́гнствовашее. Того́жде непщу́ю догма́та, да не глаго́лю, седмосте́бана, и седмосве́щна хра́ма свети́лника. В седмь у́бо дни, иере́й соверша́емь, в седмь же прокаже́н очища́емь, в толи́ки же храм обновля́емь. Седмдеся́таго же ле́та, люд от плене́ния возводи́мый. А я́коже есть во еди́ницах, сие́ в десяти́цах бу́дет, и числе́ соверше́ншим, седми́ци почте́тся та́йна. Что ми да́лная глаго́лати; Иису́с сам чи́стое соверше́ние, весть пита́ти у́бо в пусты́ни, и пятми́ хле́бы пятьты́сящная, весть же седми́ па́ки четыроты́сящныя, и сы́тости оста́нки, та́ко у́бо двана́десять кош, зде же ко́шниц седмь. Ни еди́но же безслове́сно непщу́ю, ниже́ не досто́йне Ду́ха. И ты у́бо по тебе́ само́му возглаго́ля, мно́га наблюде́ши чи́сла, иму́щая не́что явля́емаго глу́бшее, е́же настоя́щу вре́мени поле́зншее, я́ко по сим не́гли словесе́м, или́ я́ко ближа́йшым сих, или́ и боже́ственным не́кым, чтут * евре́и пятьдеся́тный день: чтем же и мы, я́коже суть не́кая и и́ная евре́йская, обра́зно у́бо о́неми соверша́ема, та́йне же на́ми устроя́ема. Толи́ка о дне предглаго́лавше, на проче́е сло́ва пре́йдим. Пятдеся́тницу пра́зднуем, и Ду́ха прише́ствие, и предуставле́ние обетова́ния, и наде́жди соисполне́ние, и та́йну ели́ку, я́ко вели́ка же честна́я. Теле́сная у́бо Христо́ва коне́ц и́мут, па́чеже теле́снаго прише́ствия. Леню́са бо рещи́ теле́сная, до́ндеже у́бо ни еди́но увеща́ет мя сло́во, я́ко до́брее отврещи́ся те́ла, духо́вная же начина́ются. Ка́я же бя́ху Христо́ва; Де́ва, рождество́, я́сли, опелене́ние: а́нгели сла́вяще, па́стырие прити́чуще, зве́зды тече́ние, волхв поклоне́ние, и дароно́сие, и́родово детоуби́йство, бе́гая Иису́с во Еги́пет, возвраща́яся из Еги́пта, обре́зуемь, креща́емь, сведи́телствуемь с вы́шше, искуша́емь, камену́емь нас ра́ди, и́мже о́бразу подоба́ше да́тися злострада́ния за Сло́во: предае́мь, пригвожда́емь, погреба́емь, воскреса́я, восходя́, и́хже и ны́не мно́га стра́ждет от христоненави́дец у́бо, безче́стная, и терпи́т, долготерпели́в бо. От христолю́бец же, честна́я, и отлага́ет. Я́коже о́нем гнев та́ко нам бла́гость. О́вым у́бо не́гли покая́ния дая́ вре́мя, на́шу же искуша́я любо́вь: а́ще не стужа́ем в ско́рбех, и за благоче́стие по́двизех. Я́коже с вы́шше боже́ственнаго смотре́ния Сло́во, и непости́жных Его́ суде́б, и́ми же исправля́ет му́дро на́ша. Христо́ва у́бо сицева́, и про́чая, у́зрим, сла́внейшая, и у́зримся. Духо́вная же, да предста́нет ми Дух, и * даст сло́во, ели́ко и хощу́. А́ще же не толи́ко, но ели́ко же вре́мени соме́ренно. Вся́ко же, предста́нет же влады́чески, но не ра́бски, ниже́ возжида́ющ повеле́ния, я́ко не́ции мнят. Ды́шет бо, иде́же хо́щет, и на я́же хо́щет, и егда́, и ели́ко. Та́ко мы, и разуме́ти, и глаго́лати вдыха́емся от ду́ха: Дух свят, о́ви у́бо во зда́ние низводя́ще, досади́теле, и раби́ зли́и, и злых зле́йшии. Раб бо злых отмета́ти влады́чество, и воста́яти на госпо́дство, и сора́бно твори́ти себе́, свобо́дное. * Бо́га же мня́щии, боже́ственнии и све́тлии ра́зумом. Имену́ющии же, а́ще у́бо благоразу́мным, высо́ци. А́ще же смире́нным, не смотрели́ви. Ка́лу би́сер воверя́юще, и слу́ху сла́ву. Гро́ма глас: и очесе́м немощне́йшым со́лнце, и пи́щу тве́рду, еще́ мле́ком напоя́емым. Ле́по по ма́лу, приводи́ти я́ на пре́жднее, и провозводи́ти на вы́шшая, све́том свет да́рующе, и и́стинною происхода́тайствующе и́стинну. Те́мже и мы соверше́ншее оста́влше сло́во. Не у́бо вре́мя, та́ко им побесе́дуем. А́ще у́бо ниже́ не созда́н, О си́и, испове́дуете Дух свят, ниже́ безве́тен, проти́внаго ду́ха я́ве де́йство. Дади́те у́бо ре́вности что, и продерзну́ти ма́ло. А́ще же толи́ко у́бо здра́вствуете, я́коже проявле́ннаго бе́гати нече́стия, и ра́бства вне полага́ти, и вас творя́щее свобо́дных, про́чее са́ми смотри́те, со Святы́м Ду́хом, и на́ми. Ве́рую бо коли́ко сему́ причаща́тися вам, и я́ко свои́м уже́ соразсмотрю́. Или́ дади́те ми сре́днее ра́бства, и влады́чества, да та́мо положу́ досто́инство Ду́ха, или́ ра́бства бежа́ще, не нея́вственное иде́же учините́ иско́мое. Но сло́гом стужа́ете, и гла́су претыка́ется, и ка́мень претыка́ния вам сие́ быва́ет, и ка́мень собла́зны. Елма́ и Христо́с не́ким, челове́ческая страсть. Сни́димся друг дру́гу духо́вне. Бу́дим братолю́бци па́че, не́же самолю́бци. Даде́те си́лу Божества́, и са́мы вам гла́са проще́ние. Испове́дайте естество́, во и́нех гла́сех, я́же почита́ете па́че, и я́ко немощны́я вы уврачи́м. Суть я́же и к сла́сти приукра́дше. Сра́мно бо сра́мно у́бо, и дово́лне безслове́сно, по души́ здра́вым, малосло́вити о гла́се, и кры́ти сокро́вище, я́коже и́нем зави́дящым, или́, да не и язы́к освяти́те, устраши́вшымся. Сра́мнее же нам, е́же порица́ем пострада́ти, и малосло́вие небрегу́щым, самы́м малосло́вити о пи́сменех. Еди́наго Божества́, О си́и, Тро́ицу испове́дите, а́ще же хо́щете, еди́наго естества́. * и Бог, глас, от Ду́ха вам испро́сим. Даст бо, до́бре вем, пе́рвое дав, и второ́е, и найпа́че, а́ще боя́знь не́кая бу́дет духо́вная, но ненастоя́ние диа́волское бори́мое. Еще́ ясне́е реку́, и сокраще́ннее, ниже́ вы вас вино́вствуйте вы́шшаго гла́са. За́висть бо ни еди́на восхожде́ния. Ниже́ мы дости́жное уже́ вам порече́м, до́ндеже у́бо и́нем путо́м к тому́жде принесе́теся обита́лищу: не бо́ победи́ти и́щем, но прия́ти бра́ты, и́хже разлуче́нием терза́емся. Сия́ вам, у ни́хже не́что и живо́тно обрета́ем, о сы́не здра́вствующих. И́хже житию́ дивя́шеся, не похваля́ем вся́чески сло́ва. Духо́вная же иму́ще, и дух приими́те, да не стра́ждете то́чию, но и зако́нно: отнего́же и вене́ц сей вам, да́стся жи́телства мзда, испове́сти Дух соверше́нно, и пропове́сти с на́ми же, и пре́жде нас, ели́ко досто́йно. Дерза́ю не́что и вя́щшее, о вас апо́столское провеща́ти. Толи́ко вас объиму́ю, и толи́ко ва́шея срамля́юся благоукраше́нныя сея́ оде́жды, и ша́ра воздержа́ния, и свяще́нных сих соста́в, и честна́го де́вства, и чи́стости, и всено́щнаго псалмопе́ния, и нищелю́бнаго, и братолю́бнаго, и страннолю́бнаго, я́коже ана́фема бы́ти от Христа́, и пострада́ти не́что, я́ко осужде́н прие́млю: то́чию а́ще ста́нете с на́ми, и о́бщне Тро́ицу просла́вим. О и́нех что тре́бствует и глаго́лати, я́ве уме́рших, я́же Христу́ то́чию воскреши́ти животворя́щему ме́ртвыя по свое́й си́ле; И́же зле, ме́стом отлуча́ются, сло́вом свя́зани, и толи́ко в друг дру́гу бо́рбствуют, ели́ко о́чи развраще́ни еди́но зря́ще, и не зра́ком, лежа́нием же крамо́лствующе. А́ще же и развраще́ние им порица́телно, но не слепота́. Елма́ же ме́рно положи́х, я́же к вам, принеси́ и к Ду́ху па́ки возврати́мся. Мню же и вы уже сопосле́дствуете. Дух Свят бе у́бо при́сно, и есть, и бу́дет. Ниже́ наче́ншийся, ниже́ преста́нущ, но при́сно Отцу́, и Сы́ну сочине́н, и сочи́слим. Ниже́ бо лепотствова́ше, лиши́тися когда́ или́ Сы́на Отцу́, или́ Ду́ха Сы́нови. Велича́йшым бо бы́ло не сла́вно Божество́, я́коже от раская́ния прише́дшее, в соисполне́ние соверше́нства. Бе у́бо при́сно прие́млемь, но не прия́телен, соверша́я, не соверша́емь: исполня́я, не исполня́емь. Освяща́я, не освяща́емь. Обожа́я, не обожа́емь. Сам себе́ тождь при́сно, и и́мже сочини́ся. Неви́димь, безле́тен, не вмести́м, неизме́нен, безка́чествен, безколи́чиствен, безви́ден, не осяжи́мь, самодви́жимь, приснодви́жимь, самовла́стен, самоси́лен, всеси́лен. А́ще и к пе́рвой вине́, я́коже единоро́днаго вся, та́ко у́бо и я́же Ду́ха возсыла́ются. Живо́т, и животво́рен. Свет, и пода́тель све́та. Самобла́г, и исто́чник бла́гости. Дух прав, влады́чествителен. Госпо́дь, посыла́я, отлуча́я, храмотворя́ себе́. Наставля́я, де́йствуя я́же хо́щет. Разделя́я да́ры: Дух сыноположе́ния, и́стинны, му́дрости, ра́зума, ве́дения, благоче́стия, сове́та, кре́пости, стра́ха от чи́сленых. И́мже Оте́ц зна́ется, и Сын сла́вится. И отни́хже сами́х зна́ется еди́но сочине́ние, служе́ние еди́но, поклоне́ние, си́ла, соверше́ние, освяще́ние. Что ми долгосло́вити; Вся ели́ка Оте́ц Сыно́вня, кроме́ не рожде́ния. Вся ели́ка Сын, Духо́вня, кроме́ рожде́ния. Сия́ же не существа́ разлуча́ют, по моему́ сло́ву. О существе́ же разлуча́ются. Боле́знуеши противоположе́ния, аз же сло́ва тече́ние. Почти́ день Ду́ха. Удержи́ ма́ло язы́к, а́ще мо́щно, о и́нех язы́цех сло́во: сих устыди́ся, или́ убо́йся, со огне́м зри́мых. Днесь да воздогма́тствуим: у́тро возхитросло́вим. Днесь воспра́зднуим: у́тро усрами́мся. Сия́ та́йно, о́ная позо́рищно. Сия́ Це́рквам, о́ная то́ржищем: сия́ трезвя́щымся, о́ная упива́ющымся. Сия́ тща́щихся, о́ная глумя́щихся на Дух. Елма́ же от устро́ихом чужде́е, принеси́, да совершы́м на́ше. Сей де́йствоваше, пе́рвее у́бо во а́нгелских, и небе́сных си́лах, и ели́кы пе́рвыя по Бо́зе, и при Бо́зе. Не бо от и́нуду им соверше́ние, или́ осия́ние, и к зло́бе не удободви́жимое, или́ недви́жимое, ра́зве от Свята́го Ду́ха. Та́же во отце́х, и в проро́цех, и́хже о́ви у́бо мечта́ша Бо́га, или́ разуме́ша. О́виже и бу́дущее проразуме́ша, образу́еми Ду́хом влады́чествително, и я́ко прису́тствующим сосу́тствующе бу́дущим. Сицева́ бо Ду́ха си́ла. Та́же в Христо́вых ученице́х. Оставля́ю бо рещи́ Христа́, Ему́же прису́тствоваше: не я́ко де́йствуя, но я́ко равноче́стну сопосле́дуя, и сим трегу́бо, по ели́ку мо́щни же бя́ху вмеща́ти, и по времене́м трем пре́жде да́же прослави́тися Христу́ стра́стию. По е́же просла́витися воскресе́нием, и по на небеса́ возше́ствии, или́ устрое́нии, или́ е́же, что тре́бствует глаго́лати. Явля́ет же пе́рвое, неду́г, и духо́в очище́ние, не кроме́ Ду́ха я́ве бы́вшее, и по смотре́нии вдунове́ние, я́ве су́щее вду́хновение Боже́ственшее, и ны́нешнее разделе́ние о́гненых язы́к: е́же и торжеству́им. Но пе́рвое у́бо не явле́нне, второ́е же изобра́знее, ны́нешнее же соверше́нне, не ктому́ де́йством прису́тствующ, я́коже пе́рвее. Су́щественно же, я́ко у́бо рече́т кто, собыва́ющ же и соживу́щ. Ле́потствоваше бо Сы́ну, теле́сне нам бесе́довавшу, и тому́ яви́тися теле́сне. И Христу́ к себе́ возше́дшу. О́ному к нам сни́ти, гряду́ща у́бо я́ко Го́спода, посыла́ема же я́ко не богопроти́вна. Такови́ бо гла́си, не мне́е единомы́слие явля́ют, или́ естество́ разлуча́ют. Сего́ ра́ди по Христе́ у́бо, да Уте́шитель нам не оскудева́ет. Ин же, да ты равноче́стие вмы́слиши. Е́же бо ин, ин аз, поставля́ется. Сие́ же совлады́чества, но небезче́стия и́мя. Е́же бо ин, не о чужди́х, но о единосу́щных. Вем глаго́лемо, в язы́цех же, за к слову усвое́ние. О́гненных же, ищу́ еда́ за очище́ние. Весть бо сло́во на́ше, и огнь чисти́телен, я́ко от всю́ду хотя́щым есть уве́дети, или́ за существо́. Огнь бо Бог наш, и огнь потребля́я зло́бу. А́ще и па́ки стужа́еши единосу́щному, тесновмеща́яся. Разделя́емых же, за даро́в разли́чное. Седя́щих же, за Ца́рское, и на святы́х воспочива́ние. Елма́ и Бо́жий Престо́л херуви́ми. В го́рници же, да не преде́лателнейш бы́ти мню́ся подоба́ющаго, за возше́ствие прие́мных, и от земно́е вознесе́ние. Елма́ и вода́ми боже́ственными превы́спрная не́кая покрыва́ются, и́ми же пое́тся Бог. Иису́с сам в го́рници, та́йне обща́ет, вы́шшими соверша́емыя, да оно пока́жется: я́ко о́во у́бо не́что сни́ти подоба́ет Бо́гу к нам, е́же и пе́рвее при Моисе́и вем бы́вшее. О́во же нам взы́ти, и та́ко бы́ти обще́нию Бо́га к челове́ком, досто́инству сорастворя́ющуся. До́ндеже у́бо обое́, во свое́м пребу́дет, о́во у́бо о смотри́лищи, о́во же смире́нии. Не сме́сна бла́гости, и человеколю́бное необщи́мо, И про́пасть посреде́ вели́ка, и непрохо́дна, не бога́таго от Ла́заря то́чию, и жела́емых авраа́млих недр разлуча́ющи, вы́шнее же естество́, и теку́щее, от невы́шнаго и стоя́щаго. Сие́ пропове́дася у́бо от проро́к, я́ко в сем: Дух Госпо́день на мне, и почи́ют на нем седмь ду́хове, и сни́де Дух Госпо́день, и наста́ви я́. И дух худо́жества испо́лнив Веселеи́ла архитекто́на ски́нии. И дух поощря́емь. И дух возне́с Илию́ на колесни́ци. И взы́скан от Елиссеа́ сугу́б. И Ду́хом благи́м, и влады́чествителным Дави́д, путеводи́мь же, и утвержа́емь. Обеща́ся же от Иои́ля у́бо пе́рвее, и бу́дет в после́дния дни глаго́лющаго: излию́ от Ду́ха моего́, на вся́ку плоть, я́ве ве́рующую, и на сы́ны ва́шя, и на дще́ри ва́шя, и про́чая. От Иису́са же, и после́жди, сла́вима же, и воспрославля́юща, я́ко Отца́, и от Отца́. И обетова́ние, я́ко оби́лно, сове́чнествовати, и сопребыва́ти, а́ще же у́бо ны́не по вре́мени досто́йным. А́ще же после́жди та́мо удостоя́емым, егда́ всеце́ла того́ житие́м сохрани́м. Но да не толи́ко отлага́ем, по ели́ку а́ще греши́м. Сей Дух соде́йствует у́бо Сы́ну, и зда́ние, и воскресе́ние. И да уверя́ет тя, е́же, сло́вом Го́спода. Небеса́ утверди́шася, и Ду́хом уст его́ вся си́ла их. Дух же Боже́ствен сотвори́в мя. Дыха́ние же вседержи́телево уча́щее мя. И па́ки: по́слеши Дух твой, и сози́ждутся. И обнови́ши лице́ земли́, содеева́ет духо́вное возрожде́ние. И да уверя́ет тя, е́же, ни еди́ному же мощи́ ца́рство ви́дети, или́ прия́ти, и́же не свы́шше роди́ся Ду́хом, и пе́рвшаго очи́стися рожде́ния, е́же но́щи есть та́йна, дневны́м и све́тлым созда́нием, им же по себе́ ки́йждо созида́ется. Сей Дух, мудре́йш бо, и человеколю́бнейш, а́ще па́стыря по́ймет, певца́ твори́т, ду́хы лука́выя напева́юща, и Царя́ исра́илска показу́ет. А́ще козляща́ря, я́годичия сеча́ща, проро́ка содеева́ет, Дави́да и Амо́са помы́сли. Егда́ ю́ношу благоро́дна по́ймет, пресви́тер твори́т судию́ и чрез во́зраст. Сведи́телствует Дании́л, победи́вый в ро́ве лвы. А́ще ры́баря обря́щет, вмрежа́ет Христу́ мир весь, сло́ва плете́нием съе́млющя. Петра́ приими́ ми, и Андре́а, и сы́ны гро́мовы, духо́вная возгреми́вшыя. А́ще мытаря́, во уче́ние приобрета́ет, и душ купцы́ содева́ет. Глаго́лет Матфе́й, вчера́ мыта́рь, и днесь евангели́ст. А́ще гони́тели те́плыя, ре́вность прелага́ет, и твори́т Па́влы, ме́сто Са́влев, и толи́ко во благоче́стие, ели́ко в зло́бу дости́же. Сей и Дух есть кро́тости, и поощря́ется греша́щыми. У́бо бо искуси́мся, я́ко кро́ткаго. И негне́внаго досто́инство испове́дающе, и ху́лнаго бе́гающе. И не восхо́щем ви́дети гне́вающася непроще́нне, сей и мене́ твори́т днесь вам де́рзостна пропове́дника. А́ще у́бо ничто́же постра́ждуща, Бо́гу благода́ть. А́ще же постра́ждуща, и та́ко благода́ть. О́во у́бо да пощади́т ненави́дящих ны. О́во же да ны освяти́т, мзду сие́ прие́мшыя священноде́йства Ева́нгелия, е́же сконча́тися кро́вию. Глаго́лаху бо стра́нными язы́ки, и не оте́ческими, и чу́до ве́лие, сло́во от неучи́вшихся глаго́лемое: И зна́мение неве́рным, не ве́рующим, да бу́дет неве́рных о глаго́летелно, я́ко же пи́сано есть, я́ко во иноязы́чных, и во устна́х и́нех, возглаго́лю лю́дем сим, и ниже́ та́ко услы́шат мя, глаго́лет Госпо́дь. Слы́шаху же, ма́ло зде вонми́, и недоуме́й, ка́ко раздели́ши сло́во. И́мать бо не́что сумни́мо, речь, черто́ю разделя́емо. Еда́ бо слы́шаху свои́ми диале́ктами ки́йждо: я́ко принеси́ рещи́, еди́ну у́бо изглаша́тися гла́су, мно́гым же слы́шатися, та́ко шумя́щу возду́ху. И да реку́ ясне́е: гла́са гла́сом быва́ющым, или́ о́во у́бо слы́шаху, воспочива́телно, о́во же глаго́лющих свои́ми гла́сы, про́чему прилага́телно. Да бу́дет глаго́лющих гла́сами, свои́ми слы́шащих, е́же быва́ет чужди́ми. Я́коже и па́че полага́ю. Она́че бо у́бо слы́шащих бу́дет па́че, не́же глаго́лющих чу́до, та́ко же глаго́лющих, и́же и пия́нством порица́ются. Явле́нно я́ко са́ми чудоде́юще о гла́сех Ду́хом. Оба́че похва́лно у́бо и дре́внее разделе́ние гла́сов егда́ столп зижда́ху, зле и безбо́жне единоглася́ще: я́ко же и ны́не держа́т не́ции. Гла́са бо разстоя́ние соразреши́вшееся единомы́слие, начина́ние разреши́. Достопохва́лнейшее же ны́не чудоде́емое. От еди́наго бо Ду́ха, во мно́гыя разлия́вшееся, во еди́но соли́чество па́ки собира́ется. И есть разли́чие даро́в, и́наго тре́бующее да́ра, к разсужде́нию лу́чшаго. Елма́ же вся похва́лное и́мут, добро́ у́бо и о́но глаго́лется, о нем же Дави́д глаго́лет: потопи́ Го́споди, и раздели́ язы́ки их. Почто́; Я́ко возлюби́ша вся глаго́лы пото́па, язы́к лстив. То́чию сие́ я́ве зде язы́ки обвиня́я, я́же Божество́ секу́т. Сия́ у́бо до толи́ка. Елма́ же обита́ющым во Иерусали́ме благогове́ннейшым иуде́ем, па́рфяном, и ми́дяном, и елами́том, и еги́птяном, и ливи́аном. Кри́тяном же и ара́вяном, месопотами́том же, и мои́м каппадо́кяном, глаго́лаху язы́ци, и и́же от вся́каго язы́ка под небесе́м, иуде́ем, а́ще любе́зно та́ко разумева́ти, та́мо собра́ным, досто́йно ви́дети, ки́и бы́ша си́и, и ко́его плене́ния. О́во бо у́бо во Еги́пет и Вавило́н, опи́сано бя́ше, и дре́вле возвраще́нием разреши́ся. О́во же от ро́млян, не у́ бысть, бу́дуществоваше же, истяза́ние су́щее на Спа́са дерзну́тия. Оставля́ется у́бо от Антио́ха сие́ непщева́ти, не мно́го сих су́щее време́н ста́ршее. А́ще же кто се́го у́бо не прие́млет сказа́ния я́ко преде́лателнейша. Ниже́ бо дре́внее бы́ти плене́ние, ниже́ на мно́го вселе́нныя разлия́вшееся, и́щет же уве́тлившаго, о́но не́гли мне́ти у́нше, я́ко мно́гащы, и от мно́гших язы́ка преселя́щася, я́ко Е́сдрою повеству́ется. О́ва у́бо племе́н возспасо́шася, о́ва же оста́вишася. Им же ле́по разсе́явшымся в язы́ки мно́гшыя, тогда́ прибы́ти не́кым, и причаща́тися чудеси́. И сия́ предъистяза́шася любоучи́мым: не́гли не преде́лателне, и я́ко а́ще соприно́сит кто в прису́тствующ день, и нам сие́ бу́дет собра́вшее. Нам же у́бо собо́р уже́ разреши́телен. Дово́лно бо сло́во. Торжество́ же николи́ же, но пра́зднствователно. Ны́не у́бо и теле́сне, ма́ло же после́жди все духо́вне. Иде́же и словеса́ сих сразуме́ем чи́стее и ясне́е: в само́м Сло́ве, и Бо́зе, и Го́споде на́шем Иису́се Христе́, и́стинном спаса́емых пра́зднице, и ра́дости, с Ним же сла́ва, и честь Отцу́, со Святы́м Ду́хом, ны́не и во ве́ки, Ами́н.

Лю́бящим Бо́га, пра́зднованию год не быва́ет. Се бо пра́зднующим нам, и а́нгели свеселя́тся, арха́нгели ра́дуются, и вся небе́сныя си́лы с на́ми пра́зднуют. Пра́зднуем у́бо не я́ко неве́рнии, ни я́ко жидо́вския де́ти: но напо́лньшеся духо́вныя ра́дости, я́коже Сио́нская ча́да, а не я́ко фарао́н, яды́й, я́ко вол. Пра́зднуем у́бо ве́рнии, я́коже апо́стол Па́вел рече́, не ква́сом ве́тхим, ни ква́сом зло́бным и лука́вным : но пра́зднуем днесь духо́вне, Свята́го Ду́ха прише́ствие, Госпо́дь бо Дух есть, вселя́яся в сердца́ лю́бящих Его́. Пра́здник бо нам - пятьдеся́тный день ны́не по Воскресе́нии Христо́ве, во́ньже Свята́го Ду́ха прише́ствие бе на апо́столы. Я́коже златы́я плени́цы ря́снове друг дру́га прехо́дят, та́коже и свята́я Це́рковь, пра́здник от пра́здника чтет. Неда́вно пра́здновахом о стра́сти Госпо́дни, и о Воскресе́нии, и о испыта́нии ребр Госпо́дних, и о возше́ствии Его́ на небеса́. Днесь же в соверше́нии Госпо́дни за́поведи доидо́хом. «А́ще бо иду́ Аз, рече́ Госпо́дь, ино́го вам Уте́шителя послю́, и не оста́влю вас си́рых». Ви́дите ли человеколю́бие Госпо́дне? Пред си́ми десятию́ де́ньми взы́де Госпо́дь на не́бо, Ца́рский прия́ти Престо́л, одесну́ю Отца́ се́де: днесь же прише́ствие Свята́го Ду́ха дарова́, и ско́рбный о́блак ученико́м Свои́м разори́. Поне́же слы́шали бы́ша Го́спода глаго́люща: «Ше́дше научи́те вся язы́ки» , и не домышля́хуся ка́мо им ити́. Того́ ра́ди прии́де Дух Святы́й на апо́столы во о́гнене о́бразе, кому́ждо разделя́я вселе́нныя ча́сти, да́нным им язы́ком, а́ки писа́нием проявля́я ку́юждо страну́ и уче́ния преде́лы, да разделе́ную вселе́нную во еди́но совокупи́т. Я́коже бо пре́жде язы́цы вселе́нную предели́ша злым столпотворе́нием, си́це ны́не апо́столи разделе́ными язы́ки вселе́нную совокупи́ша, и разстоя́щыяся лю́ди во еди́ну ве́ру собра́ша. О́ ди́вныя Ду́ха Свята́го хи́трости, вско́ре да́вшу му́дрость апо́столом! Ви́дите двана́десять луч от еди́наго Со́лнца исходя́щыя, двана́десять све́щник от еди́наго Огня́ вжига́емы, двана́десять грезн от и́стиннаго Виногра́да изра́стша, двана́десять кошь от еди́ныя Трапез́ы наполня́емы, двана́десять рек от еди́наго Исто́чника исходя́ще и двана́десять язы́к от еди́ныя Благода́ти бесе́дующе. Поклони́мся убо ве́рою Свято́му Ду́ху, Единосу́щну со Отце́м и Сы́ном, добро́тами озари́вшеся, а не пия́нством, ни зло́бами, да вселе́ние Свята́го Ду́ха прии́мем я́коже и апо́столи. Рече́ бо им Госпо́дь: «По сему́ позна́ют вы вси, я́ко Мои́ есте́ ученицы́, а́ще любо́вь и́мате в себе́» . Того́ ра́ди име́ем любо́вь ве́рнии, и с то́ю пра́здник пра́зднуем. Иде́же бо любо́вь, ту вся зла́я преста́ют. «Любы́, рече́, не возвыша́ется, не горди́тся, не зави́дит, бли́жнему не твори́т зла» . Име́яй о Бо́зе любо́вь, «никому́же зла не де́ет, не ра́дуется о непра́вде, ра́дует же ся о и́стине, все терпи́т, всему́ ве́ру е́млет» . Погуби́те у́бо за́висть, совлецы́теся всех злоб, угаси́те сатани́нскую вражду́, отве́рзитеся беззако́ннаго пия́нства, отступи́те грабле́ния, отбе́гните татьбы́ и оби́ды, блуда́ же и прелюбоде́йства, и вся́кия непра́вды уклони́теся, да спасе́теся. Бо́гу на́шему сла́ва всегда́, ны́не и при́сно и во ве́ки веко́в. [Ами́нь.]

Стихи́:

Дыха́нием ну́жным, языкоо́гненно подае́т

Христо́с боже́ственнаго ду́ха апо́столом.

Излия́ся в вели́ком дни́ ду́х рыбаре́м.

В си́й де́нь, в Неде́лю осму́ю по Па́сце, Святу́ю Пятдеся́тницу пра́зднуим, и сию́ же прия́хом от евре́йских кни́г. Я́коже бо они́, я́же у ни́х Пятдеся́тницу пра́зднуют, почита́юще седмо́е число́, и зане́ по Па́сце пятдеся́т дни́й преше́дше, зако́н прия́ша: та́ко и мы́ по Па́сце, пятдеся́т дни́й пра́зднующе, Всесвята́го Ду́ха прие́млем, законополага́ющаго и наставля́ющаго на вся́кую и́стину, и уго́дная бо́гу повелева́ющаго. Ве́домо же да е́сть, я́ко у евре́й три́ бе́ша пра́здницы: Па́сха, Пятдеся́тница и Скинопи́гиа, си́есть, се́ниц потче́ние. Па́сху у́бо в воспомина́ние творя́ху преведе́ния Чермна́го мо́ря: па́сха бо преведе́ние толку́ется. Явля́ше же таковы́й пра́здник, на́ше е́же от те́мнаго греха́ к раю́ па́ки преведе́ние и возвраще́ние. Пятдеся́тницу же пра́здноваху, в воспомина́ние е́же в пусты́ни злострада́ния и́х, и ка́ко мно́гими скорбьми́ в зе́млю обетова́ния введе́ни бы́ша: тогда́ бо и плода́ пшени́цы и вина́ наслади́шася. И явля́ше пра́здник се́й на́ше озлобле́ние от неве́рия, и в Це́рковь вни́тие: тогда́ бо и мы́ Влады́чняго причаща́емся Те́ла и Кро́ве. О́ви у́бо тоя́ ра́ди вины́ глаго́лют, я́же у евре́й Пятдеся́тнице пра́здноватися: о́ви же в че́сть я́коже глаго́лют, пяти́десятим дне́м, в ня́же пости́вся Моисе́й, Богопи́санный зако́н прия́т, вку́пе помина́ющым и тельца́ жре́ния, и ины́х, я́же егда́ Моисе́й восходя́ на го́ру, и низходя́ соде́я. Други́м же непщева́ся Пятдеся́тнице у евре́й умы́слитися, че́сти ра́ди седми́чнаго числа́, я́коже рече́ся: то́ бо о себе́ слага́емо, твори́т пятдеся́тное, еди́ному оскудева́ющу дне́ви. Че́сть же седмочи́слия у евре́й, не то́чию во дне́х е́сть, но и в ле́та достиза́ющая, от ни́хже ле́т и е́же у ни́х творя́т иовиле́он, сказу́емо оставле́ние. уседморича́емым бо ле́том, сие́ быва́ет, егда́ и зе́млю несе́янную оставля́ют, и живо́тным подаю́т осла́бу, и ку́пленым рабо́м отходи́ти повелева́ют. Тре́тий же пра́здник, Скинопи́гиа, си́есть, се́ниц потче́ние, пра́зднуемый по собра́нии плодо́в, е́же е́сть по пяти́х ме́сяцех пра́здника Па́схи. Соверша́ше же ся се́й в па́мять дне́, во́ньже Моисе́й пре́жде потче́ се́ницу на горе́ Сина́йстей ви́денную о́блаком, и угото́ванную от перводреводе́ля веселии́ла: се́ни бо и си́и творя́ще, се́й пра́здник пра́здноваху и на се́лех пребыва́юще, и благодаря́ще Бо́га, плоды́ свои́х трудо́в собира́ху. В си́й мни́тся и Дави́д я́же о точи́лех надписова́ти псалмы́. О́браз же бе́ то́й из ме́ртвых на́шего воскресе́ния, егда́ разруши́вшымся теле́сным се́нем на́шым, и па́ки слепле́нным, свои́х трудо́в плоды́ восприи́мем, торжеству́юще в ве́чных се́нех. Подоба́ет же ве́дати, я́ко в си́й де́нь Пятдеся́тницы соверша́емыя, Ду́х Святы́й на ученики́ прии́де. Елма́ же святи́и отцы́ изво́лиша разделя́ти пра́здники, ра́ди вели́чия Пресвята́го и Животворя́щаго Ду́ха, я́ко Еди́н е́сть Святы́я и Живонача́льныя тро́ицы. Се́ и мы́ рече́м воу́трие, ка́ко Ду́х Святы́й прии́де. Святы́х апо́стол моли́твами Христе́ поми́луй на́с. Ами́нь.