Сей бя́ше от Селу́ня. Максимиа́ну царю́ зи́ждущу Селу́нь, ят быв я́ко христиани́н, и предста́ суди́щу его́. Он же с гне́вом рече́ к нему́: Почто́ мне председя́щу во гра́де, ты дерза́я испове́дуеши Бо́га ино́го? Но пожри́ бого́м, а́ще хо́щеши жив бы́ти. Свято́му же не покаря́ющуся, повеле́ содра́ти те́ло его́. Да я́ко ви́дя себе́ поруга́ема, и укоре́на от свята́го, повеле́ извести́ его́ пред гра́дом, и сокруши́ти ему́ коле́на. И отсе́ченыма нога́ма бы́вшема, святы́й му́ченик седмь дней прежда́ терпя́, не вкуси́в пи́щи. И та́ко благодаря́ Бо́га предаде́ Ему́ блаже́нную свою́ ду́шу, Его́же и возлюби́.