Сей святы́й Иоа́нн Хозеви́т преподо́бный отец́ наш, фиве́янин бя́ше, страны́ еги́петския. Прие́м а́нгельский о́браз от своего́ де́да: и совеща́вся с тем ста́рцем шед во свята́я ме́ста иерусали́мская, и па́ки возврати́вшеся. И сотвори́ со ста́рцем не́колико дней, и отъи́де от него́ в разсе́линное ме́сто те́сное. И обре́т мал верте́п, и обита́ та́мо, пита́емь бе от та́мо су́щих бы́лий. Его́же Бог хотя́ просла́вити, объяви́ си́це: Ана́ния не́кто по́стник вели́к бя́ше во о́нех ме́стех живы́й преди́вен: приведе́н же быв сын не́коего му́жа бога́та к тому́ Ана́нии, му́чимь ду́хом нечи́стым, и не прия́т его́: но ре́кшу свято́му от всего́ смире́ния, во вну́трешнее ме́сто вни́ти, и поиска́ти Иоа́нна еги́птянина. Да я́ко по́сланнии обрето́ша его́же иска́ху, и пове́даша его́же ра́ди приидо́ша: пе́рвее не повину́ся е́же помоли́тися, но последи́ всех помоли́ся. И обрати́вся глаго́ла к бе́су: «О и́мени Иису́с Христо́ве, нечи́стый ду́ше, не аз, но Ана́ния повелева́ет ти изы́ти от о́трока сего́». Слы́шав же от свята́го нечи́стый дух, изы́де, и бысть о́трок здрав. И о пресла́внем чудеси́ объя́влена того́ соде́ла. Пону́жден быв, и не хотя́ епи́скопство прия́т в Кесари́и.
И я́ко не моги́й терпе́ти сла́вимь, хотя́ держа́ти и́ноческое житие́, оста́вль Кесари́ю, к пусты́ни па́ки устреми́ся. Но не утаи́ся от земледе́лец сокро́вище. Отроча́ бо ма́ло име́я не́кто, му́чимо ду́хом нечи́стым, вложи́ е́ в кошь, и с выспрь бы́лием закры́в, положи́ е́ при верте́пе свята́го. Попла́кавшу же отроча́ти, воста́в святы́й, и ви́дев позна́, гнездя́щагося в нем ду́ха нечи́стаго: и прогна́в бе́са, исцели́ отроча́. Но не ути́шися прогна́ный, в челове́ческий о́браз себе́ претвори́в. И в разседа́льне и брегови́те ме́сте обре́те свята́го. И припаде́ к нога́ма его́, я́ко благослове́ния ища́. Внеза́пу у́бо лице́ его́ Бо́жий раб ви́дев, удиви́ся. О́ному же за но́ги е́мшу свята́го, и низ во глубину́ бре́га того́ сметну́, и стремгла́в пад: пребы́сть же Бо́жиею благода́тию невреди́мь, ничто́же успе́вшу о сем человекоуби́йце.
Па́ки же мужеуби́йце разбо́йнику, Бо́жия раба́ вдаде́. И овогда́ от него́ бие́мь быва́ше, овогда́ же оде́жду ему́ сдира́ше: и коли́бицу ему́ мучи́тель сожже́. И та́ко стражда́ святы́й, сие то́чию в себе́ глаго́лаше: «О́ Вы́шний Го́споди, благодарю́ Тя, а́ще уго́дно есть Тебе́». И услы́ша с небе́с Вы́шний. Я́ту же бы́вшу разбо́йнику кня́зем, и го́рькою сме́ртию ду́шу свою́ изве́ргшу: и ма́ло поко́ище Бо́жий раб обре́те.
Но и па́ки льсти́вый не преста́ боря́ся со блаже́нным. Мимоходя́щу же свято́му к посеще́нию бра́тий. Жена́ не́которая сре́те свята́го на пути́, и припаде́ к нога́ма его́, моля́ше того́ не презре́ти ея, но поити́ в клеть ея́, е́же прия́ти освяще́ние от него́. Умоле́н же бысть святы́й, по́йде, и вни́де. И непреподо́бная и скверна́вая преле́стница врата́ затвори́вши, и вся своя́ у́ды обнажи́. И яже са́мая несы́тная и ме́рзская соде́ловаше, я́же несть возмо́жно рещи́, окуша́ющися оскверни́ти нескве́рнаго. Но тве́рдый сей бесо́вское бряца́ло низложи́в, и отри́нув изы́де невреди́мь.
Сей блаже́нный Иоа́нн слы́шав о не́коем по́стнице Маркиа́не, прослы́те повсю́ду, и возжеле́ того́ ви́дети. Егда́ же дости́же во у́зы впа́сти, е́же не изы́ти из верте́па, да́же в не́кое непотре́бие впаде́т, и той сам себе́ связа́в, и у́зу разреши́ти не хотя́. Творя́й же пресла́вная, и вся ви́дяй, по́мощь угото́ви сицеву́ю: А́нгел Превы́шняго похи́тив Маркиа́на от ке́ллии его́, и внеза́пу во огра́де блаже́ннаго Иоа́нна поста́ви и́. И сше́дшымся им ку́пно, и целова́вшымся, и е́же друг к дру́гу бесе́дам духо́вным прилежа́ста, и та́ко наслади́стася. И блаже́нному Иоа́нну коне́чнаго благодаре́ния словесе́ спле́тшу, и та́ко ре́кшу: «Сла́ва Свято́му Бо́гу, сподо́бльшему мя ви́дети люби́маго ми Маркиа́на». И напра́сно а́нгелом похи́щен Маркиа́н, и неви́димь бысть. Сей же в по́мыслы разли́чныя введ свята́го, и бя́ше сомня́ся, и по́мыслы содержи́мь убо: и связь преоби́дев, изы́де из верте́па: и в путь прилежа́щь к келлии Маркиа́нове идя́ше. И́бо вели́чию чуде́с уди́влься, привиде́ние мня́ше бы́ти бы́вшее, и я́ко до́йде, и на и́мя призва́в Маркиа́на Иоа́нн. Слы́шав же блаже́нный, и о́браз прише́ствия Иоа́ннова уве́дев, ра́дуяся бе се́рдцем и веселя́ся. И того́ де́ля па́ки целовавшымся, и благода́рственную сла́ву Бо́гу прине́сшым, па́ки во своя́ обрати́ся.
И что ми мно́го глаго́лати? Сей бе́сы мно́ги от челове́к отгна́, и неду́ги лю́тыя уврачева́, и во́ды в разл́ичных местех искипе́ти сотвори́, и дожди́ многи с небесе́ моли́твою сведе́: и и́на мно́га зна́мения Бог соде́ла его́ ра́ди. По сих же честну́ю свою́ ду́шу Бо́гу предаде́ с ми́ром, в до́брей ста́рости.