Па́вел просте́ц неве́жа и ра́тай быв, сочета́ся с жено́ю красно́ю зра́ком, злообра́зною же ра́зумом. Вшед у́бо еди́ною с села́ в дом свой, и обре́те любоде́ющу жену́ со ине́м. И расмотри́в себе́, рече́ к нему́: «Вои́стину небрегу́ та́ко ми Иису́са. Аз у́бо не и́мам поя́ти ея́, се ты и́маши ю́ и де́ти пита́й, и аз иду́ и бу́ду мних». И и́де к блаже́ному Анто́нию, и толкну́в две́ри, он же ви́дев его́ такого́ ста́ра, глаго́ла: «Что хо́щеши?». И рече́: «Хощу́ мних бы́ти». И святы́й рече́: «Шестьдеся́ть лет ста́рец, напа́сти не мо́жеши терпе́ти». И глаго́ла: «Е́же ми вели́ши твори́ти, то творю́». И искуси́ и́ Анто́ний, и обре́т, я́ко все терпи́т. И постриже́ и́, и созда́в еди́н ке́лию и пребыва́ше ту. Тольми́ доброде́телен бысть, я́ко дарова́ния прия́ти чудотворе́ния, и на неду́ги и на бе́сы. Во еди́н у́бо от дний приведе́н бысть ко Анто́нию ю́ноша, иму́щь бес нача́льный, и повеле́вшу ему́ Анто́нию, помоли́вся, изгна́ и́.