Сия́ свята́я бе́яше при Диоклитиа́не цари́ и Доментиа́не коми́те, раба́ су́щи Кла́вдия не́коего. О не́йже слы́ша коми́т, написа́ к господи́ну ея́, е́же посла́ти ю́ к нему́. И я́ко христиа́ныни ей су́щи, господи́н же ея́ оскорбе́, во вре́тище обо́лкся, пла́каше о ней. Она́ же утеша́ющи его́ глаго́лаше: «Го́споди мой, не скорби́, но ра́дуйся, о свои́х бо и о твои́х гресе́х же́ртва Бо́гу прия́тна вмене́на бу́ду». Тому́ же к ней ре́кшу: «Помяни́ мя у Небе́снаго Царя́». И посла́ ю́ к коми́ту. И приведена́ бы́вши к коми́ту, и испове́давши Христа́. Остриго́ша главу́ ей и жера́тком горя́щим посы́паша. Та́же привяза́вше на ню ка́мень тя́жек и ври́нуша ю́ в мо́ре. Изше́дши от морска́го гро́ба, яви́ся коми́ту и мно́го му́чена бы́вши, но́гти ручны́я и ножны́я истерза́вше ей, Бо́гу дух преда́сть.