Мздои́мец и сребролю́бец и резои́мец и граби́тель ‐ еди́на колесни́ца есть четвери́чна, иму́щи го́рдостнаго воза́тая сатану́, и́же Бо́гом све́ржен бысть. Собира́ет же вся после́дующая ему́ во свою́ поги́бель. Неподо́бно есть у́бо до́бре смы́слящим от вражде́бника води́мым бы́ти, да не с ним в я́му ве́чнаго огня́ вва́лятся. Но лу́чше со апо́столом в жизнь напра́витися, глаго́лющим: «Иму́ще же пи́щу и оде́ние, си́ми дово́льни бу́дем. Хотя́щеи бо богате́ти впа́дают в напа́сть, и в се́ти неприя́знены» (1Тим. 6:8-9) ‐ нехраня́щии за́поведий апо́стольских. Па́чеже Бо́га глаго́люща Самого́: «Не стяжи́те ни зла́та, ни сребра́, ни пецы́теся, что я́сте или́ что пиете́» (Мф. 6:31,34,10), а сби́рающаго бога́тство низлага́ет Бог, и Свои́ма нога́ма стира́ет. До́бре же и прито́чник свари́т мздои́мцы, глаго́ля: «Любя́й сребро́ не насы́тится сребра́. Ни отъима́я и́ у убо́га, нищь бо есть и не уме́ет ходи́ти пря́мо жи́зни». (Еккл. 5:9; Притч. 22:22) Глаго́лет бо и апо́стол: «Лу́чше есть да́яти не́же взъима́ти». (Деян. 20:35) Зако́н же рече́: «Не оправди́ нече́стиваго мзды ра́ди, ни возми́ мзды, мзда бо ослепля́ет о́чи ви́дящим». И Само́ил бо держа́ за́поведь зако́нную к лю́дем глаго́лаше: «Еда́ от руки́ ва́шея взях изба́ву? Се по́слух Госпо́дь, не прии́де мзда в ру́це мои́». Проро́к же Амо́с скорбя́ о судия́х глаго́лаше: «Мзду избра́нну от ни́щих прия́сте». Иса́ия же укаря́я град, глаго́лет: «Кня́зи твои́ лю́бят мзду, гоня́ще возда́ния. Го́ре оправда́ющим нечести́ваго мзды ра́ди. И пра́ведное без пра́вды от пра́ведника взъима́ющим». (Ис. 5:23) И паки: «Губи́тель сам свое́й души́ мздои́мец, а не любя́й мзды и́мати жив бу́дет». И паки: «Прие́мляй мзду в не́дра без пра́вды, не испра́вится пред Бо́гом. Лу́чше бо и́мя добро́ не́же бога́тство». Дави́д же моля́шеся Бо́гу глаго́ля: «Не погуби́ с нечести́выми души́ моея́, и́хже десни́ца испо́лнися мзды». (Пс. 29:5) Ви́диши ли безако́нники и му́жи кро́ви нарица́ет уби́йцы и мздои́мцы. То же рече́ Госпо́дь: «Безу́мне, в сию́ нощь ду́шу твою́ изму́ из тебе́, а и́же угото́ва кому́ бу́дет?» (Лк. 12:20) Безу́мныя нарица́ет наде́ющаяся на бога́тство погиба́ющее. И паќи Дав́ид рече́: «Приклони́ се́рдце мое́ во свиде́ния твоя́, а не в лихои́мство». (Пс. 118:36) И́ов же показа́я свою́ чистоту́: «Еда́ рука́ моя́ прикосну́ся мзде?» (Иов. 31:7) И Госпо́дь Спас наш запове́дает глаго́ля: «Блюди́те и храни́теся от вся́кого лихои́мства, я́ко не от избы́тка кому́ душа́ есть и живо́т; (Лк. 12:15) я́коже пи́сано есть: пра́ведник ве́рою жив бу́дет».