О́бщему житию́ бе не́кто старе́йшина игу́мен, име́я под собо́ю бра́тий две́сте, и́же бе испе́рва нищелюби́в, последи́ же славолюби́в, име́я вели́ку любо́вь к бога́тым и к боля́ром и от тех сла́вимь. К сему́ Госпо́дь я́ко ста́рец убо́г в монасты́рь вни́де. И рече́ две́рнику: «Иди́ ко игу́мену и рцы: он сий брат ти есть, и мно́гим трудо́м до тебе́ приидо́х». И прише́д две́рник, обре́те игу́мена с бога́тыми бесе́дующа. Постоя́в же ма́ло и возвести́ о убо́зем, не ве́дый я́ко Христо́с есть. Игу́мен же сваря́ше его́, глаго́ля: «Не ви́диши ли мене́ с челове́ки бесе́дующа? Да почто́ еси́ пуща́л его́? Небрези́ ны́не». И отъи́де вра́тник. Долготерпели́вый же Госпо́дь пребыва́ше ожида́я, до́ндеже прии́дет. При пя́тем же часе́ бога́т не́кто прии́де, его́же в бо́рзе игу́мен сам во врате́х сре́те. И ту узр́ев игу́мена с бога́тыми, Бога́тый ми́лостию и смире́ных Друг Христо́с моли́ игу́мена реки́й: «Сло́во Ми есть к тебе́, о́тче». Он же ни озре́ся, но с бога́тым и́де обе́дати. И па́ки по обе́де проводи́в до врат бога́таго и возврати́вся, небре́г моле́ния убо́гаго и беззло́биваго ста́рца. Ве́черу же бы́вшу, не сподо́бися прия́ти благослове́ния вои́стинну стра́нна. И отъи́де рек вра́тнику: «Си́це рцы игу́мену. Поне́же сла́ве челове́честей хо́щеши, аз пре́дних де́ля трудо́в твои́х и дре́вняго жития́ прише́л бех благослове́ние хотя́ вда́ти тебе́, и не восхоте́л еси. И се ны́не от всея́ страны́ сея́ вельмо́жи послю́ к тебе́, поне́же тре́бования хо́щеши. Благи́х же Ца́рства Моего́ не тре́буеши». И та́ко позна́ся Вседержи́тель Христо́с, во о́бразе ни́щаго прише́дый.

Се же мы слы́шаще бра́тие, не отвраща́ем о́чию от убо́гих, зане́ сам Христо́с Вседержи́тель хо́дит во о́бразе ни́щих, даю́ще бо ни́щему – Христу́ в ру́це даю́т. Яду́щии же с бога́тыми и пию́ще, славохоте́ние ми́ра сего́ исполня́ют. Неудо́бь бо есть вельбу́ду сквозе́ иглине́ у́ши проити́, ни бога́ту в Ца́рство Небе́сное. Аз же не бога́тство ху́ля глаго́лю, но и́хже не име́ющих жи́ти в бога́тстве сбира́ющих сокро́вища, и ненави́дящих ни́щих, и губя́щих свое́ ца́рство, и во власть диа́волу даю́щих. Молю́ же вы, бра́тия моя́, слы́шаще сие́ бу́дем ми́лостиви, странноприи́мцы, нищелю́бцы, да ве́чных благ сподо́бимся прия́ти о Христе́ Иису́се Го́споде на́шем, Ему́же возсыла́ем сла́ву и держа́ву, честь и поклоне́ние, Святе́й и Животворя́щей и Неизрече́нней и Нераздели́мей Тро́ице, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.