Па́ки шепотни́к и клеве́тник, обе́щника еста́ сра́мному ею́ злодея́нию, и́бо еди́но есть обою́ де́лание, в путь поги́бельный водя́. Ме́рзка пои́стинне Бо́гу и челове́ком гну́сно клеветника́ и шепотника́. Живу́щим с ни́ма скверне́но и нечи́сто житие́ сотворя́ется, не пребыва́ем у́бо в отрече́ном сем житии́, да не обря́щемся врагу́ ко единоплемене́нию. Запове́дает зако́н не приима́ти слу́ха су́етна: не ся́ди с непра́вым свиде́телем, всегда́ бо злоглаго́ливый ме́рзостив есть. Прему́дрый же Соломо́н рече́: «Шепотника́ и двоязы́чника кля́ти досто́ит, мно́ги бо погуби́л живу́щая с ним». И па́ки: «Язы́к объя́тив мно́гими подвиза́л и слу́шая его́ не обря́щет поко́я». И па́ки: «Я́зва язы́чная сокруша́ет ко́сти, смерть бо люта́ его́». Проро́к же Авваку́м: «Му́жи ми́рнице твои́ положи́ша сеть под тобо́ю». Иереме́я рече́: «Стрела́, язвя́щи язы́к их». Дави́д же, уста́вити хотя́ от враждова́ния сего́, запреща́ет, глаго́ля: «Удержи́ язы́к свой от зла и устне́ твои́ не глаго́лати льсти». Ве́дый же зло́бу во́льную, и приво́дит: «Гроб отве́рст горта́нь их и язы́ки свои́ми льща́ху: суди́ им Бог, зане́ яд а́спиден под устна́ма их: на мя бо шепта́ху, вси вразе́ мои́, на мя помышля́ху зла́я мне. Сло́во законопресту́пно возложи́ша на мя, но да облеку́тся облыга́ющии мя в срам и оде́жутся я́ко оде́ждею студо́м свои́м». И мо́лит, глаго́ля: «Го́споди, изба́ви ду́шу мою́ от усте́н непра́веден и от язы́ка льсти́ва, от та́йных мои́х пощади́ раба́ твоего́, да непоро́чен бу́ду». И При́точник глаго́лет: «Муж скороречи́в впа́дает во зло». И па́ки: «Смерть и живо́т в ру́це язы́ка; держа́щии же его́ снедя́т плоды́ его́». И: «А́ще мни́тся в вас ве́рен сый, не восхлаща́я язы́ка своего́, но льстя се́рдце свое́, сего́ су́етна ве́ра», и приво́дит: «Се коль мал огнь коли́ку грома́ду сожига́ет и язы́к утваря́ется в удо́лех на́ших, скверня́ все те́ло и паля́ колоро́дства на́шего, житие́ бо челове́че ко́ло есть, обраща́яся и опаля́емо от гее́ны».

Бежи́м у́бо, бра́тие, шепта́ния, да не лиши́т нас поро́ды Госпо́дь наш Человеколю́бец и препрова́дит ны в гее́ну о́гненую. Пошепта́вши бо змия́, изгна́ Е́ву из поро́ды, я́коже е́тер прему́др рече́: «Блаже́н и́же язы́ком не попо́лзнется». И Па́вел: «Егда́ ка́ко рве́ние в вас зави́ды и я́рости, ре́ти, клеветы́, ше́пти, горды́ни и про́чая». Госпо́дь же рече́: «До́брый челове́к от до́браго сокро́вища изно́сит до́брое, и злый челове́к от зла́го сокро́вища се́рдца своего́ излага́ет зла́я, от избы́тка бо се́рдца уста́ глаго́лют».