Сей роди́ся во стране́ Пефлаго́нстей, от благочести́вых и боголюбе́зных роди́телей. Глаго́лют же о нем, я́ко сро́днику ему́ бы́вшу Феодо́ры цари́цы, жены́ Фео́фила иконобо́рца. Вдан же быв святы́й Ники́та к наказа́нию, и вни́де в Царь град седмина́десяти лет сый. Ири́не же тогда́ ца́рства ски́птры держа́щи, и сы́ну ея́ Константи́ну. И уве́девше о нем я́ко скопе́ц есть, восприи́мше того, и пома́ле над все́ми в ца́рстем до́му поста́влен. Таже патрики́йскаго са́на дости́же, и страти́г Сикили́йский вмене́н бысть, от тогда́ у́бо до́бре и богоуго́дне пожи́в, и хотя́ пострищи́ся, и не оста́влен бысть от самоде́ржец, от Ники́фора Ге́ника, и сы́на его́ Ставрики́я. По си́х же прии́мшу ца́рство Михаи́лу Рагкаве́ю. И едва́ не́когда умили́ся е́же бы́ти мона́ху, и не изы́ти из гра́да обеща́вся: но во златы́х вратех да́ти ему́ пребыва́лище, в нарече́нней Хрисоники́я: та́мо тому́ пребыва́ти повеле́но бысть. Пяти́десяти бо лет бя́ше, внегда́ постриже́ся, и сам царь бысть к слугова́нию его́. И пребы́сть в такове́й обители, до́ндеже доспе́ до ца́рства Льва Армени́на иконо́борца. Да я́коже ви́де е́же на святы́я ико́ны быва́емая, изы́де из гра́да, и и́де в подгра́дие, иде́же бя́ше не́коея бра́тии оби́тель: и примеси́ себе́ после́дним бра́тиям, не вкуша́я трудя́ся, и с ни́ми стражда́. Не́цыи же вражде́бницы су́щии пове́даша о ико́не Спа́сове, ю́же той стяжа́л бя́ше из Ри́ма. И не́который к нему́ по́слан бысть от вельмо́ж, словесы́ некро́ткими, но и преще́нием страша́, и прося́ е́же пода́ти о́ну пречестну́ю ико́ну. Да я́ко не возмо́же о́ного препрети́ отве́том, но рече́: Не моя́ есть такова́я пречестна́я ико́на, но Бо́жия, и свяще́нным церко́вным предста́тельница упра́влена. По́сланный же похи́тив еди́наго мона́ха, е́же сказа́ти ему́ иско́мое: и вшед в це́рковь, пречестну́ю о́ну ико́ну, я́ко не́кую ме́рзость метну́в ю́, безче́стно в свой скут. Святы́й же сия́ ви́дев, из глубины́ воздохну́в, нача́ток напа́стей таково́е вмени́в. Да внегда́ отъи́ти хотя́ по́сланный, запове́да тве́рдо, ника́коже свято́му оттуде́ исходи́ти. По си́х же Фео́филу ино́му иконобо́рцу ца́рство похи́тившу, и тому́ е́же на святы́я ико́ны прилежа́щу, е́же не поклоня́тися им. По́слан бысть царе́м к преподо́бному не́который, и́менем Феодо́сий, и та́ко к нему́ пред все́ми сте́кшимися рек: Та́ко повелева́ет ти царь мно́ю, иди́ и приобщи́ся патриа́рху Анто́нию, и не покланя́йся ико́нам: а́ще ли ни, то изгна́н и́маши бы́ти. Святы́й же рече́: Христа́ и Бо́га моего́ ико́не не преста́ну вы́ну покланя́тися: Анто́ния же не нареку патриа́рха, но любоде́йника и законопресту́пника, ты же твори́ е́же хо́щеши. И а́бие изгна́н быв. Благодари́в же Бо́га святы́й: и пое́м с собо́ю три бра́та, и пойде в друго́е ме́сто, и та́мо святы́й пост проводи́в, да́же и до Пятидеся́тницы. До́йде же до не́которыя страны́. Изы́де же повеле́ние от царя́, не приима́ти бе́гающыя христиа́ны, но отгоня́ти я́. Дости́же святы́й к не́коему о́строву и обрати́ся: но и та́мо ага́рянскаго ра́ди нахо́да ско́рбен бя́ше. До́йде же к нему́ не́кто Никола́й сро́дник его́ глаго́ля: А́ще хо́щеши ма́ло поко́ище обрести́, пойди́ к подгра́дию, и есть ме́сто Зило́па нарица́емо. Шед же та́мо по не́коем вре́мени. И изы́де к нему́ весть, или́ приобщи́тися им, или́ отту́ду тому́ отъи́ти. Отше́д же отту́ду, и в подо́лие не́кое шед. И та́мо ма́ло ме́сто обре́т, растреби́в е́, и церковь постави во и́мя Безпло́тных сил небе́сных. И пребы́сть нема́ла времена́ та́мо, и с су́щими с ним бра́тиями: до́бре же и богоуго́дно поживе́. И коне́чное в примо́рский монасты́рь вшед, и та́мо мно́ги мона́хи научи́, и мно́га чудес́а показа́ при животе́. Прови́дев же о свое́м сме́ртнем отше́ствии: и благослови́ всех, отъи́де ко Го́споду. Та́коже и по сме́рти свое́й мно́гая чудоде́йствия яви́. Поживе́ же всех лет живота́ своего́, се́дмьдесять и пять.