Святы́й сей блаже́нный и присновоспомина́емый Андре́й, бысть рожде́нием и воспита́нием гра́да Кри́тскаго. Ча́до благочести́ву роди́телю и доброде́тельну, и до́бре жи́тельствоваше в нем. И иску́сен са́мым за́поведем Божиим быв де́латель. В ца́рство же Константи́на гноеимени́таго, зря Бо́жия рабы́ ги́блемы от него́, и от бу́ести его́. И прише́д в Константи́нь град, испове́да и́стину, и нече́стие его́ небоя́знено изобличи́в. Он же дерзнове́ния его́ не терпя́, препадается, внеза́пу глаго́лющу до́блему, я́ти его́ предстоя́щым повелева́ет. Они́же уби́йственыма рука́ма, и тяжча́йшим а́бие устреми́вшеся, о́ви за главу́ его́, а ини́и за ру́це пое́мше, друзи́е за ра́ма, а ини́и за оде́жду, па́че и досади́тельне, и к земли́ низлага́ют мы́слию высо́каго. И не пе́рвее бя́ху влача́ще, доне́леже самому́ испыта́ти царю́. По е́же стерпе́вшу дерзнове́нию страда́льца, возвести́ того́ повеле́. Свято́му же мно́гая про́чая известву́ющу царе́ви о святых ико́нах, и я́ко ца́рским изобразова́тися о́бразом о́ царю́, я́ко в тех а́ще не испове́дати бу́дут, то после́дними у́бо облага́ются му́ками: и какову́ преще́нию боже́ственному в позна́ние не бы́ти, и́же на Христо́ву ико́ну руга́ющымся. И зело́ разже́гся мучи́тель, обнажи́ти свята́го повелева́ет, и у́жи растящи́, и зело́ того́ би́ти. Сему же бы́вшу, земля́ на нейже лежа́ше, тече́ние кро́ве его́ очервленя́шеся. И извопроше́н же быв, и ни да́ром, ниже́ преще́нием вдав себе́ до́блий. Зело́ а́бие су́рово томле́н быва́ет, и в ре́бра пробода́ется. И уста́ ка́мением сокруши́ша ему́, и в темни́цу посыла́ется. И па́ки, предста́вшу свято́му: и зане́же дерзнове́ннейша паки мучи́тель того́ ви́дев, ра́нами повеле́ того́ язви́ти. Сему́ же бы́вшу, раздробля́шеся те́ло его́ и распа́даше. Коне́чнее же у́жи за но́зе свя́зан быв, и по земли́ влачи́мь быва́ет среде́ торга, е́же в злоде́йственое ме́сто того́ поврещи́. Влачи́мь же иду́щими, и му́ченику та́ко влеко́му, не́который в мо́ри ры́бу улови́в, и на торг на прода́ние предложив: сам же не́ким бесо́м подви́гся, и се́чиво макела́рско похвати́в, вско́ре но́гу му́ченику пресече́, уста́ви му́ченику страда́льческое тече́ние, и ко о́нем оби́телище отсла́. Честно́е же те́ло его́ в злоде́йственых помета́ют ме́сто. И смеси́вше со о́неми скве́рными телесы́, и бя́ше да́же мно́жае двоюна́десяте седми́ц. И му́жие и́же бесми́ одержи́мии, от разли́чных мест Константи́ня гра́да, я́ко со́звани соше́дшеся, и свята́го те́ло пое́мше, на свяще́ннем ме́сте положи́ша. О́ле суда́, беснова́вшиися вме́сто на́йма цельбу́ прия́ша внеза́пу, мзду обре́тения, врачева́ние прие́мше.