Лют есть клевети́вый вред, па́че бо диа́волу есть подо́бен, по рече́нному о нем во псалме́: Смири́т клеветника́. Врази́ бо суть, и Бо́гу ме́рзцы клеветницы́, и соо́бщнии [прича́стницы] прода́вшым и́стину и распе́ншым Го́спода на́шего Иису́са Христа́. Аз бо есмь, рече́, И́стина и Живо́т. Вели́т же и зако́н глаго́ля: Не бу́ди по́слух на всю непра́вду и согреше́ние. Пред усты́ бо рече́ двою́, или́ трие́х по́слух, всяк глаго́л ве́рен. Сау́л же преступи́в за́поведь сию́, три́ста Господ́них иере́й уби́, послу́шеством еди́наго клеветника́ Дои́ка си́рина. При́точник же глаго́лаше: Оклевета́яй убо́гаго, раздража́ет Сотво́ршаго и́. И па́ки: Сла́ва му́жу отвраща́тися клеветы́. Всяк же безу́мный тем обяза́ется. Дави́д же мо́лится гонзну́ти от клеветы́: Изба́ви мя от клеветы́ челове́чи, глаго́ля: И покры́й мя от сонм лука́внующих, и́же изостри́ша я́ко ору́жие язы́ки своя́. И ин: Оклевета́яй убо́гаго, мно́га собира́ет зла. И па́ки: Нечести́вый мужь хва́лится оклевета́яй дру́га. И па́ки: Лев а́лчай, и волк жа́ждай, обою́ есть го́рши клеветни́к, зане́ пролива́яй кровь язы́ком. И прирече́: Велича́ется клеветни́к, изрыва́я я́му язы́ком бли́жнему, последи́ же сам впа́дает в ню. Екклисиа́ст же: Обрати́хся аз, и ви́дех вся клеветы́ быва́ющыя под со́лнцем: и се сле́зы оклевета́емых, и несть утеша́ющаго их. И па́ки: Оклевета́ние му́драго возмуща́ет, и благодари́ваго погубля́ет. Дави́д же: Спасе́т сы́ны убо́гих, и смирит клеветника́. Утверди́мся у́бо са́ми бра́тие от всея злы́я, клеветы, боя́щеся го́рькия му́ки, де́ющым такова́я. И с Па́влом рцем: Оклевета́еми, благослови́м: гони́ми, терпи́м: ху́лими, мо́лимся. Я́коже отре́би бы́хом всем в попра́ние. Да не бу́дем осужде́ни со враги́ Христо́вы иуде́и, и́же прише́дше к Пила́ту, на Го́спода глаго́лаху оклевета́нием: Сего́ обрето́хом развраща́юща язы́к наш, и возбраня́юща дая́ти да́ни ке́сарю, и Себе́ глаго́люща пома́зана Царя́. Той же я́ко а́гня незло́бивое терпя́ше.