По сме́рти благочести́ваго царя́ и вели́каго кня́зя Васи́лия Иоа́нновича всея́ Росси́и, ца́рствующему вели́кому гра́ду Москве́, грех ра́ди на́ших от злочести́вых ля́хов взя́ту бы́вшу. Тогда́ у́бо все росси́йское во́инство от разли́чных градов́ росси́йския земли́ подви́жеся к нему́, е́же па́ки того́ от о́нех восприя́ти. Егда́ же собра́шася благочести́вии воево́ды, и все христолюби́вое во́инство, тогда́ сове́т сотвориша пе́рвее, е́же моли́ти о сем Всеще́драго Бо́га, и Пречи́стую Его́ Ма́терь, Пресвяту́ю Богоро́дицу на по́мощь призыва́ти. И запове́даша всему́ во́инству, и су́щым с ни́ми, правосла́вному наро́ду тридне́вный пост сотворити, и та́ко приступи́ти ко гра́ду. И у́бо росси́йскому во́инству постя́щуся, Благи́й Человеколюби́вый Бог наш, ви́дя обраще́ние люде́й Свои́х ка́ющихся, вско́ре милосе́рдие Свое́ показа́. В ты́я у́бо дни бысть явле́ние внутрь ца́рствующаго гра́да Москвы́, архиепи́скопу не́коему гре́чину, Галасу́нскаго гра́да, Арсе́нию и́менем, и́же пре́жде от ины́х злочести́вых ля́хов, ну́ждею с ни́ми во оса́де внутрь гра́да удержа́ну бы́вшу ему́: его́же дом и име́ние они́ злочести́вии до конца разгра́биша: И уже́ от гла́да коне́чне изнемога́ющу ему́, и на коне́чном издыха́нии бы́вшу, внеза́пу явля́ется ему́ преподо́бный Се́ргий, ра́донежский чудотво́рец. Слы́шит бо архиепи́скоп, я́ко прише́д не́кто к ке́ллии его́, ти́хо моли́тву сотво́рь а́бие вни́де, и свет возсия́ ве́лий в ке́ллии его́. Та́же глаго́ла ему́: Арсе́ние, се Госпо́дь Бог услы́ша моли́тву раб Свои́х, и моли́тв ра́ди Всенепоро́чныя Ма́тере Своея́, Пресвяты́я Влады́чицы на́шея Богоро́дицы, и при́сно Де́вы Мари́и: и вели́ких чудотво́рцев, Петра́, Алекси́я, и Ио́ны, с ни́миже и аз хода́тай бых, зау́тра град сей предае́т Госпо́дь Бог, в ру́це правосла́вным христиа́ном, и враго́в ва́ших низложи́т. Архиепи́скоп же возведе́ о́чи свои́, и виде преподо́бнаго Се́ргия близ одра́ его́ стоя́ща, едва́ воздви́гся от вели́кия боле́зни, воста́ от одра́ своего́, поклони́ся ему́. Он же неви́дим бысть, и свет он вели́кий я́вльшийся в ке́ллии его́ а́бие разы́деся. Архиепи́скоп же в себе́ прише́д, от ужа́снаго о́ного виде́ния, ощути́ себе́ от належа́щия ему вели́кия боле́зни здра́ва. Пронесе́ся же всќоре виде́ние сие в слу́хи благочести́вых воево́д, и всего́ правосла́внаго росси́йскаго во́инства. И а́бие благонаде́жни бы́вше, по словеси́ свята́го Се́ргия, и вооружи́вшеся приступи́ша ко гра́ду, и вско́ре взя́ша град Кита́й, ме́сяца окто́врия, в два́десять вторы́й день, седмь ты́сящь два́десять пе́рваго ле́та. Во гра́де же Кремле́ велию тесноту́ сотвори́ша злочести́вым ля́хом: Ви́дяще же они я́ко уже́ не избе́гнути им от росси́йскаго во́инства, преда́шася вско́ре, и град Кремль им отвори́ша. В день же неде́льный, собра́шася благочести́вии воево́ды, с су́щими с ни́ми от освяще́ннаго чи́на, архимандри́ты, и свяще́нники, и со всем христолюби́вым во́инством: и взе́мше честны́я кресты́, и святы́я ико́ны, поидо́ша на ло́бное ме́сто моле́бная соверша́юще. Из гра́да же Кремля́ изы́де во сре́тение им пре́жде помяну́тый архиепи́скоп Галасу́нский Арсе́ний, с су́щим с ним освяще́нным чи́ном, и́же бя́ху с ним пре́жде удержа́ни во гра́де, нося́ще с собо́ю ико́ну Пречи́стыя Богоро́дицы Влади́мирския, и честны́я кресты́, и про́чыя святы́я ико́ны. Егда́ же узре́ша благочести́вии воево́ды, и все христолю́бивое во́инство, чудотво́рную о́ну ико́ну Богома́тере, ея́же не наде́яхуся ви́дети никогда́же, от ра́дости мно́гия сле́зы от о́чию излива́юще, целова́ху ю́. И доидо́ша во град Кремль, обы́чныя литии́ соверша́юще: и та́ко внидо́ша в вели́кую соборную це́рковь, Успе́ния Пресвяты́я Богоро́дицы. И боже́ственную Литурги́ю соверши́вше, во мно́зе ра́дости и весе́лии испове́дающеся Го́сподеви. И та́ко разыдо́шася ко́ждо во своя́ си, сла́вяще и благодаря́ще Бо́га, и Пресвяту́ю Богоро́дицу. И отто́ле уста́виша таковый пра́здник праз́дновати Пресвяты́я Богоро́дицы. Ме́сяца окто́врия в два́десять вторы́й день, во́ньже пресла́вная побе́да, и заступле́ние, богома́терними моли́твами бысть, на воспомина́ние предбу́дущым родо́м, во сл́аву Христа́ Бо́га: Ему́же сла́ва, ны́не и при́сно, и во ве́ки веко́в. Ами́нь.