Той самозва́н к мучи́телем прише́д, и Христа́ Бо́га И́стиннаго вся́ческих Творца́ дерзнове́нно пропове́да, и всех во у́жас устро́и. И непреложе́ние его́ ви́девше, мече́м главу́ его́ отсеко́ша, и в мо́ре вверго́ша. Жена́ же не́кая благочести́ва, из глубины́ взе́мши свято́е те́ло его́, воня́ми благи́ми, и поня́вами обви́вши, и це́ркви своего́ до́ма положи́. И мно́гия цельбы́ творя́, в сла́ву Человеколю́бца Бо́га.