Вельми́ добро́ есть челове́ку ну́дитися, да удержи́т страсть гне́вную, и да сокруши́т я́рость душе́вную, долготерпе́нием, и кро́тостию, моли́твами, и смире́нием. Зело́ бо ре́ет бес челове́ка на гнев, хотя́щаго спасти́ся. Да я́же собере́т труды́, посто́м и моли́твою, бде́нием, или́ слу́жбами, то во еди́н час изгуби́т, бе́су гне́вом многоле́тный плод отъе́мшу от него́: и уже́ обря́щется челове́к без вина́ пия́н. Мно́га у́бо тре́бует челове́к уче́ния, да изжене́т страсть гне́вную. Хотя́й к соверше́нию приити́, и жела́я по́двиги духо́вными подвиза́тися, от сего́ прихо́да гне́внаго чуждь да бу́дет. Дух бо гне́вный в на́шем се́рдце седя́й, о́чи разу́мнеи те́мными мяте́жи ослепля́ет. Да уже́ ни разсужде́ния поле́зных стяжа́ти мо́жем, ни духо́внаго ра́зума обрести́, ни сове́та благ удержа́ти. Не подобает бо нам с гне́вом на единове́рныя наступа́ти, но то́чию на своя́ грехи́, и на злы́я мы́сли, я́же тща́тся соврати́ти ны со и́стиннаго пути́. Того́ бо ра́ди и При́точник глаго́лет: Отъими́ разгне́вание от себе́, и помяни́, я́ко и ты всегда́ прогне́ваеши сотво́ршаго тя. И па́ки: Гнев погубля́ет пра́ведники: сло́во же же́стоко воздвиза́ет гнев. И гнев отцу́, сын безу́мен: слуга́ же мудр, укроти́т гнев му́жа. И па́ки: Тя́жек ка́мень, и неудо́бь носи́мь песо́к: гнев же безу́мнаго тяжча́йши обои́х. И прирече́: Утоли́ гнев, бе́су бо есть оте́ц. Да не подоба́ет нам бра́тие лю́таго бе́са в се́рдце держа́ти, веду́щаго ны в поги́бель. Я́коже бо вода́ дви́жется от ну́жди ве́треныя, та́кожде и гневли́вый смуща́ется от мы́сли гне́вныя. Челове́к гневли́вый, вепрь ди́вий: Ви́дев друг дру́га, и зубы́ поскрежета́. Иа́ков же учи́т ны глаго́ля: Да бу́дет всяк челове́к скор на послуша́ние, ме́длен же в гнев: гнев бо му́жу пра́вду Бо́жию не содева́ет. Па́вел же: Не себе́ отмща́юще возлю́бленнии, но дади́те ме́сто гне́ву. И па́ки: Вся́ка го́ресть, гнев, и хула́, да отъи́мется от вас со вся́кою зло́бою. То́же и Дави́д: Преста́ни от гне́ва, и оста́ви я́рость. Строи́тель же душ на́ших Госпо́дь веща́ет глаго́ля: Я́ко всяк гне́ваяйся на бра́та своего́ без ума́, пови́нен есть суду́. И́же бо рече́т бра́ту своему́ юро́де, пови́нен есть родству́ о́гненному: его́же избы́ти мо́лимся Ми́лостивому Влады́це Христу́ Бо́гу на́шему, Ему́же сла́ва со Отце́м и со Святы́м Ду́хом, ны́не и при́сно, и во ве́ки веко́в. Ами́нь.