Суббота пятой седмицы по Пасце

И е́же возве́д очеса́ своя́ горе́ и рече́: О́тче благодарю́ Тя, я́ко услы́шал Мя еси́. Аз же ве́дях, я́ко всегда́ Мя послу́шаеши, но наро́да ра́ди предстоя́щаго рех:

Е́же мно́жицею рех сие́, и ны́не реку́: я́ко Бог не си́це к досто́инству зрит Своему́, я́коже ко спасе́нию на́шему. Ниже́ я́ко что ве́лие провеща́ет, но я́ко могу́щее нас привлещи́. Сего́ ра́ди высо́кая у́бо и вели́кая – ма́ла, и сия́ покрове́нна. Смире́нная же и худа́я мно́га облага́ет Свои́м словесе́м, поне́же бо си́ми возвожа́хуся па́че. В сих и пребыва́ет, и ниже́ сия́ отню́д веща́ет, я́кобы су́щих по сих не вреди́ти, ниже́ сия́ умолчава́ет, я́ко бы су́щим тогда́ не соблазни́тися. К соверше́нному бо изше́дши, и от еди́ного уче́ния все возмо́гут разсмотри́ти. Тогда́ же ху́ди су́щии, а́ще не мно́жицею сия́ слы́шали бы́ша, ниже́ у́бо удержа́либыся. Сего́ ра́ди ниже́ по толи́ких пребыва́ют, но и ка́мение ме́щут и го́нят, и уби́ти начина́ют, и ху́льника Его́ нарица́ют. Егда́ ра́вна Себе́ твори́т Бо́гу, и ны́не у́бо глаго́лют я́ко ху́лит, поне́же рече́ «оставля́ются тебе́ греси́ твои́». И па́ки бесну́ющася нарица́ют, егда́ глаго́лет сме́рти лу́чше бы́ти послу́шающему слове́с Его́. И егда́ глаго́лет «Аз во Отце́, и Оте́ц во Мне» - оставля́ют Его́. И соблажня́ются, егда́ глаго́лет «с небеси́ снидо́х». А́ще бо сия́ не терпя́ху ре́дкостию глаго́лема, упраждне́ние бы бы́ло, а́ще все́ми высо́ко бы было сло́во и си́це тка́шеся вня́ли бы́ша . Егда́ глаго́лет «я́коже запове́да Ми Оте́ц, си́це глаго́лю» и «Аз от Себе́ ничто́же глаго́лю» - тогда́ ве́руют. «Мно́зи ве́роваша рече́ в Него́ тогда́», и назна́менует евангели́ст, я́ко сия́ Ему́ глаго́лавшу. А́ще у́бо е́же смире́нная веща́ти ве́ру творя́ще, а е́же высо́кая отрева́ше - ка́ко не после́дняго безу́мия не созира́ти смире́нных вину́, я́ко послу́шателей де́лма рече́ся? Поне́же и и́нде ве́лие не́что рещи́ восхоте́в, умолча́, вину́ сию́ приложи́в и рек: «Да́же не соблазня́тся, ве́рзи у́дицу в мо́ре». Е́же у́бо и зде. По е́же бо рещи́ «я́ко всегда́ Мя послу́шаеши», наведе́, «я́ко наро́да ра́ди предстоя́щаго рех, да ве́руют». Еда́ на́ши глаго́лы? Еда́ уга́дка на́ша? Егда́ бо и от веще́й не повине́мся я́ко соблажня́ются о высо́ких, и Сам глаго́лет, «я́ко сего́ ра́ди смире́нная веща́ю да не соблазня́тся», - кто еще́ естества́ бы́ти худы́я вознепщу́ет глаго́лы, но не схожде́ния? И и́нде гла́су сне́сшуся свы́ше глаго́лаше: «Не Мене́ ра́ди глас сей бысть, но вас ра́ди».

И́бо высо́кому леть есть мно́га глаго́лати о себе́ смире́нна, смире́нному же пра́ведно несть ве́лие и высо́ко веща́ти. То бо схожде́ния быва́ет, и не́мощь учи́мых вину́ и́мать: и е́же возводи́ти во смиренному́дрие, и е́же пло́тию обложе́ну бы́ти, и е́же наказа́ти слы́шащых ничто́же ве́лие глаго́лати о себе́: и е́же непщева́тися богопроти́вну, и е́же неве́роватися - и приити́ от Бо́га, и е́же зазира́тися разруша́ти зако́на, - и ю́же слы́шащих зав́исть, и е́же глаго́латися ча́сте в дре́внем «Госпо́дь Бог твой, Госпо́дь еди́н есть» . Смире́нну же су́щу и высо́ко что о себе́ рещи́ - ни еди́ну же и́мать вину́, ниже́ благосло́вну, ниже́ безслове́сну, но ра́зве го́рдость у́бо то́кмо и нече́стие бу́дет, и де́рзость непроще́нна.

Что ли у́бо ра́ди смире́нна веща́ет, неизрече́ннаго и вели́каго о́ного существа́ сый? Рече́нных ра́ди, и я́ко бы не непщева́тися нерожде́н. И́бо Па́вел такова́ не́что явля́ется убоя́вся, те́мже и глаго́лаше: «Кроме́ Поко́ршаго Ему́ вся». Нечести́во бо сие́ помышля́ти. А́ще ме́ньши Роди́теля сый, и ина́го существа́ ра́вен непщева́лся бы - не бы вся твори́л я́ко не непщева́ти сие́. Ны́не же сопроти́вное твори́т глаго́ля: «А́ще не творю́ дела́ Посла́вшаго Мя, не ве́руйте Мне». И е́же глаго́лати: «Аз во Отцы́ и Оте́ц во Мне», ра́венство нам гада́тельствует. Подоба́ше же со мно́гою зе́льностию сие́ отъя́ти, а́ще у́бо недоста́точнейшь был бы, и нигде́ же отню́д рещи́: «я́ко аз во Отцы́, и Оте́ц во Мне», или «я́ко еди́но есмы́», или́ я́ко «Ви́девый Мя, ви́де Отца́». И́бо о си́ле сло́во бе, и глаго́лаше: «Аз и Оте́ц еди́но есмы́». И о о́бласти сло́во бе, и глаго́лаше: «Я́ко же Оте́ц воскреша́ет ме́ртвых и животвори́т, си́це и Сын и́хже хо́щет животвори́т» - е́же не мо́щно бе ина́го существа́ су́щу твори́ти. А́ще же и мо́щно бы́ло бы, не подоба́ше сие́ рещи́, да не вознепщу́ют еди́но и то же существо́ бы́ти. А́ще бо да не вознепщу́ют я́ко богопроти́вен есть, и я́же неприли́чна Ему́ веща́ет мно́жицею - мно́го па́че и тогда́. А е́же глаго́лати «Да почита́ют Сы́на, я́коже почита́ют Отца́», и е́же глаго́лати «дела́ я́же Он де́лает, та́коже и Аз творю́», и е́же глаго́лати Себе́ воскресе́ние бы́ти, и Живота́, и Све́та ми́ру - изравня́юща бе́ша Роди́телю, и зазре́ние поставля́щаго, е́же мня́ху они.

Ны́не же я́ко у́бо зако́на не разруша́ет, толи́ка глаго́лет и отвеща́ет. Непщева́ние же ра́вности су́щия ко Отцу́, не то́кмо не отъе́млет, но и поставля́ет. И ре́кшим я́ко «ху́лиши, зане́ твори́ши Себе́ Бо́га», от дел су́щия ра́вности сие́ поста́ви. И что глаго́лю, Сын а́ще сие́ сотвори́л есть, иде́же у́бо и Оте́ц, пло́тию не обложи́выйся? И́бо и Той терпя́ше мно́га о Нем смире́нна рещи́ся, спасе́ния ра́ди слы́шащых. Тем бо е́же «Ада́ме, где еси́?». И е́же «да разуме́ю, а́ще по вопие́нию их сконча́ются». И е́же «ны́не уве́дех, я́ко бои́шися ты Бо́га». И е́же «а́ще у́бо услы́шат». И «кто даст се́рдце лю́дем сим си́це бы́ти». И е́же глаго́латися «несть подо́бен Тебе́ в бозе́х». И мно́га такова́ в дре́внем а́ще кто избере́т, недосто́йна Бо́жия досто́йна су́ща обря́щет. И о Аха́ве же рече́ся: «Кто прельсти́т Ми Аха́ва?». И е́же при́сно е́ллинских бого́в по сосужде́нию Себе́ предлага́ти. Вся недосто́йна Бо́гу, но и́нако досто́йна быва́ют: зане́ си́це Человеколюби́в есть, я́ко на́шего ра́ди спасе́ния и досто́инству Его́ не подоба́ющых глаго́л презира́ти. И́бо и сие́ е́же челове́ку бы́ти недосто́йно, и е́же раба́ зрак прия́ти, и смире́нныя веща́ти глаго́лы, и смире́нная претерпе́ти - недосто́йно у́бо, а́ще кто к досто́инству О́ному возри́т, досто́йно же - а́ще кто неизрече́нное человеколю́бия вели́чество помы́слит.

Есть же и и́на смире́ния глаго́л вина́: зане́ Отца́ у́бо ве́дяху и чудя́хуся, Его́же не ве́дяху. Сего́ ра́ди ча́сте к Нему́ прибега́ет, я́ко испове́дуему, а́ки Сам Сый не у́ достове́рен: не от Своея́ ху́дости, но от безу́мия слы́шащих и не́мощи. Сего́ ра́ди и мо́лится и глаго́лет: «О́тче благодарю́ Тя, я́ко услы́шил Мя еси́». А́ще бо «и́хже хо́щет, живи́т», и я́коже Оте́ц, си́це жи́во твори́т, что ра́ди мо́лит? Но вре́мя про́чее в са́мое взя́ти ме́сто. «Я́ко у́бо взя́ша ка́мень. Возведе́ Иису́с очеса́ своя́ на не́бо, и рече́: О́тче благодарю́ Тя, я́ко послу́шал Мя еси́, и Аз же ве́дях, я́ко всегда́ Мя послу́шаеши. Но наро́да ра́ди предстоя́щаго рех, да ве́руют я́ко Ты Мя посла́л еси́». Да вопроси́м у́бо еретика́: от моли́твы ли по́мощь взят, и ме́ртваго воскреси́? Ка́ко у́бо ина́я кроме́ моли́твы творя́ше, глаго́ля: «Тебе́ глаго́лю бе́се, изы́ди от него́», и «хощу́, очи́стися», и «встав возми́ одр свой», и «оставля́ются тебе́ грехи́ твоя́», и мо́рю – «молчи́, обузда́йся». Что же отню́д и́мать апо́столов вя́щше, а́ще у́бо Той от моли́твы твори́т? Наипа́чеже, ниже́ они́ с моли́твою вся творя́ху, но без моли́твы мно́жицею и́мя Иису́сово нарица́юще. А́ще же и́мя Его́ толи́ку имя́ше кре́пость, ка́ко у́бо Сам моли́твы тре́бовал бы? А́ще же моли́твы тре́бовал бы, не бы и́мя Его́ возмогло́. Егда́ же отну́д творя́ше челове́ка, кото́рыя моли́твы тре́боваше? Не еди́но че́стие ли та́мо мно́го? «Сотвори́м бо рече́ челове́ка». Что же не́мощнейше, а́ще моли́твы тре́боваше? Да уви́дим же и ка́я моли́тва: «О́тче благодарю́ Тя, я́ко услы́шал Мя еси́». И кто си́це помоли́ся когда́, пре́жде не́же что рещи́? «Благодарю́ Тя» рече́, показу́я я́ко не тре́бует моли́твы. «Вся бо твори́ши ели́ка Аз хощу́» рече́: не я́ко Ему́ не могу́щу, но я́ко еди́ному су́щу изволе́нию. Что у́бо ра́ди моли́твы о́браз восприя́т? Не мене́ да услы́шиши, но Само́го глаго́лющаго, «предстоя́щаго ра́ди наро́да ,да ве́руют я́ко Ты Мя посла́л еси́». Не рече́: да ве́руют я́ко ме́ньши есмь, я́ко потре́бу име́ю по́мощи су́щия свы́ше, я́ко без моли́твы не могу́ сотвори́ти. Но: «я́ко Ты Мя посла́л еси́». Сия́ бо вся моли́тва явля́ет, а́ще про́сте сию́ восприи́мем.

Не рече́: посла́л Мя еси́ не могу́ща, рабо́ту ве́дящаго, о Себе́ ничто́же творя́щаго, - но сия́ вся оста́вль, да ничто́же сих вознепщу́еши, полага́ет и́стинную моли́твы вину́ - да не богопроти́вна Мя вознепщу́ют , да не глаго́лют «несть от Бо́га», да покажу́ по изволе́нию Твоему́ де́ло быва́емое. То́чию не глаго́ля, я́ко а́ще был бых богопроти́вен, не бы произошло́ быва́емое. А е́же «услы́шал Мя еси́», и о друзе́х глаго́лется, и о единоче́стных. «Аз же ве́дях, я́ко всегда́ Мя послу́шаеши», си́речь ко е́же бы́ти Мое́й во́ли не тре́бую моли́твы, я́ко бы увеща́ти еди́но бо хоте́ние. Что у́бо моли́тва? Не́мощных ра́ди и худе́йшых. «И сия́ рек, возва́ гла́сом вели́ким». Что ра́ди не рече́: Во и́мя Отца́ Моего́ гряди́ вон? Что ра́ди не рече́: Воскреси́ его́ О́тче? Но сия́ вся оста́вль, моля́щагося о́браз восприи́м, ве́щьми госпо́дьство показу́ет. Я́ко и сие́ Его́ прему́дрости: глаго́лы у́бо схожде́ние, де́лы же о́бласть показова́ти. Поне́же бо ничто́же и́но имя́ху порица́ти Христу́, но ра́зве я́ко несть от Бо́га, и си́це мно́гих прельща́ху - сего́ ра́ди со премно́жеством показу́ет сие́ им, и сим о́бразом, его́же не́мощь о́нех истя́зоваше . Мо́щно бо бе и и́нако показа́ти согла́сие, со Свои́м досто́инством, но не можа́ше взы́ти толи́ко наро́д. «И рече́: Ла́заре, гряди́ вон». Сие́ есть е́же глаго́лаше: «Гряде́т час, егда́ ме́ртвии услы́шат глас Сы́на Бо́жия, и услы́шавше, и оживу́т». Да́же бо не вознепщу́еши я́ко от ина́го прия́т де́йство, свы́ше тебе́ сему́ научи́ и де́лы показа́, и не рече́ воста́ни, но гряди́ вон, я́ко живо́му бесе́дуя и сконча́вшемуся. Что сея́ о́бласти бу́дет у́бо ра́вно? А́ще же не Свое́ю си́лою сие́ твори́т, что вя́щши прии́мет апо́стол глаго́лющих: «Что нам внима́ете я́ко свое́ю си́лою, или́ благоче́стием сотво́ршым его́ ходи́ти?». А́ще бо не творя́ свое́ю си́лою, е́же апо́столи о себе́ глаго́лаху - и бу́дут они́ па́че любому́дрствующе, тем е́же отража́ти сла́ву. И па́ки: «Что внима́ете нам? Я́ко свое́ю си́лою подобостра́стни есмы́ челове́цы?». Та́же апо́столи у́бо, поне́же ничто́же от себе́ де́йствоваху, вся глаго́лаху я́ко бы увеща́ти сие́. То́йже такову́ о Себе́ сла́ву име́я, не у́бо ли непщева́ние отъя́л бы, а́ще не Свои́м госпо́дьством твори́л бы? Кто у́бо сие́ рече́т? Но и спроти́вное рече́: «Предстоя́щых ра́ди наро́дов, да ве́руют, я́ко Ты Мя посла́л еси́» - я́ко а́ще ве́ровали бы́ша, не тре́ба моли́твы. А́ще бо не бе досто́йно Ему́ е́же моли́тися, что ра́ди оне́м вину́ вменя́ет? Что же ра́ди не рече́: да ве́руют я́ко несмь Тебе́ ра́вен? Подоба́ше бо от мне́ния приити́. Но егда́ у́бо зазира́шеся разоря́ти зако́на, рече́ние сие́ положи́л есть пре́жде рече́нным о́нем: «Не мни́те, я́ко приидо́х разори́ти зако́на». Зде же поставля́ет го́рдость. Отню́дуже, что тре́ба бя́ше обхоже́ния толи́каго и гада́нии? Довля́ше бо рещи́: «несмь ра́вен», и свободи́тися.

Что ли у́бо не глаго́ла рече́, «я́ко не творю́ во́лю Мою́»? И сие́ спокрове́нне, и ко оне́х не́мощи, и от тоя́же вины́ от нея́же и моли́тва бысть. Что есть «я́ко услы́шал Мя еси́»? Си́речь я́ко ничто́же сопроти́вно Мне к Тебе́. Я́коже у́бо е́же «я́ко услы́шал Мя еси́», не сие́ есть явля́ющаго, я́ко Сам не возмо́же, [а́ще бо сие́ бы́ло бы не неможе́ние то́кмо бу́дет, но и неве́дение, а́ще у́бо пре́жде е́же моли́тися не ве́дяше, я́ко хо́щет услы́шати Бог, а́ще и не ве́дяше, ка́ко глаго́лаше «я́ко поиду́ да возбужу́ его́»?] - я́коже у́бо сие́ не не́мощи, но единомышле́ния: си́це и е́же «всегда́ Мя послу́шаеши». Или́ сие́ есть рещи́, или́ я́ко и непщева́нию о́нех рече́ся. А́ще же ниже́ не ве́дяше, ниже́ не можа́ше, благоявле́нно я́ко сего́ ра́ди смире́нныя веща́ет глаго́лы, да поне́ от вели́чества уве́ришися и прину́дишися испове́дати, я́ко не недосто́инства есть, но схожде́ния. Что у́бо есть е́же «услы́шал еси́»? К не́мощи слы́шателей рече́ся. [ⷱ҇ⷱ҇Что у́бо враги́ и́стине?] Ни, рече́, но да пока́жет преиме́ние. И у́бо сие́ не бе показа́ти преиме́ние, но зело́ смири́ти Себе́ и изъяви́ти ничто́же вя́щше челове́ка име́юща. Е́же бо моли́тися - не Бо́гу, ниже́ сопресто́лну.

Зри́ши ли, я́ко ниотку́ду отъину́ду на сие́ прии́де, но безве́рия ра́ди оне́х? Зри у́бо де́ло сведе́тельствующе Его́ госпо́дьство. «Изы́де у́бо Ла́зарь свя́зан». Та́же, да не вомни́тся мечта́ние бы́ти вещь, того́ бо е́же воста́ти, е́же изы́ти свя́зану, - не ме́нше ви́дяшеся бы́ти пречу́дно, - повеле́ его́ разреши́ти, да косну́вшеся и прибли́жившеся и близ бы́вше, ви́дят я́ко вои́стинну он есть. «И рече́: Оста́вите его́ ити́». Ви́дел ли еси́ не велича́вое? Не во́дит его́, ниже́ повелева́ет с Собо́ю ходи́ти я́ко бы показова́тися.

Бы́вшу же сему́ чудеси́, о́ви у́бо чудя́хуся, о́ви же возвести́ша фарисе́ом. Что у́бо они́.?Потре́бно ужаса́тися и чуди́тися - хотя́ху Его́ уби́ти, воскреси́вшаго мертвеца́. О́ безу́мия. Во ины́х телесе́х сме́рти преодоле́вшаго, сме́рти преда́ти умы́слиша. И глаго́лют: «Что твори́м, я́ко Челове́к Сей мно́га зна́мения твори́т». Челове́ка Его́ еще́ нарица́ют, толи́ко прие́мшии указа́ния Божества́ Его́. «Что твори́м»? Ве́ровати подоба́ше, и угожда́ти, и поклони́тися. И не ктому́ непщева́ти челове́ка. «А́ще оста́вим Его́ си́це, прии́дут ри́мляне, и во́змут и язы́к наш и град». Что есть е́же хотя́т рещи́? Люде́й поколеба́ти хотя́т про́чее, я́ко име́юще бе́дствовати о зазре́нии наси́льства. А́ще бо народоводя́ща рече́ уви́дят Его́ ри́мляне, позазря́т нам о наси́льстве, и во́змут наш град. Что ра́ди, рцы ми? Еда́ бо отступле́нию уча́ше? Не повелева́ше ли дань да́ти ке́сарю? Не царя́ ли Его́ восхоте́сте сотвори́ти и бежа́? Не худо́е ли невелича́вое гоня́ше житие́? Ниже́ хра́мину име́я, ниже́ и́но что от таковы́х ничто́же.

Сия́ у́бо ре́ша, не ча́юще, но зави́дяще. Сбы́сться же и не ча́ющим им: и язы́к, и град взя́ша, егда́ у́бо уби́ша Его́. И́бо дале́че вся́каго зазре́ния быва́емая : исцеля́яй бо неду́жных, и наро́читое уча́ житие́, и нача́льником покаря́тися повелева́я: не наси́льства составля́ше, но разруша́ше.

Но от пре́жних уга́дываем рече́. Но они́ отступле́нию уча́ху, Сей же сопроти́вно. Зри́ши ли, я́ко лицеме́рие бе глаго́лемая? Что бо показова́ше таково́? Оружено́сцы ли облага́шеся и колесни́цы собира́ше? Не пусты́ни ли гоня́ше? Но да не возмня́тся страсть свою́ глаго́лати, гра́ду ре́ша бе́дствовати всему́ и е́же о́бще наве́товатися, и о после́дних им бы́ти сло́во. Не сия́ плене́ния вам вина́ бы́ша, но сопроти́вная: и сего́, и су́щаго в Вавило́н, и е́же при Антио́хе су́щаго по сих. Не е́же бы́ти у вас угожда́ющым, но е́же бы́ти в вас оби́дящым и Бо́га прогне́вающим - сие́ вас от да́нных сотвори́. Но за́висть не зрит ничто́же, но ослепля́ет ду́шу. Не кро́ткых ли научи́ Сей? На зауща́емых ли наказова́ше не сопроти́в зауща́ти? Не терпе́ти ли оби́димым? Не бо́льшее ли показова́ти усе́рдие ко е́же зле страда́ти, не́жели ко е́же ины́х зле сотвори́ти? Сия́ у́бо рцы ми наси́льство ли составля́ющаго глаго́лаше, а не наси́льство отъе́млющаго?

Нравоуче́ние шестьдеся́ть четве́ртое: О за́висти и лихоима́нии:

Но е́же рех: лю́то за́висть и лицеме́рия по́лна. Сие́ вселе́нную безчи́сленных напо́лни злых. От сего́ неду́га суди́лища испо́лнишася. От сего́ – уби́йства, и име́ний разли́чие, и любонача́льствие, и тщесла́вие. Отсю́ду пути́ обседя́тся, и мо́ре разбо́йников име́ет. Отсю́ду су́щая по вселе́нней уби́йства. Отсю́ду род наш растерза́ся. Е́же а́ще уви́диши зло - от сея́. Уже́ и в це́ркви вскочи́. И испе́рва безчи́сленая соде́ла лю́тая. Сей неду́г сребролю́бие роди́. Вся горе́ и до́лу творя́щь, и пра́ведное растлева́юще. «Мзды бо ослепля́ют очеса́ му́дрых, и я́коже брозда́ устна́м, отвраща́ет обличе́ния». Сей рабо́в вме́сто свобо́дных твори́т. О сем на всяк спира́емся день, и вя́щше ничто́же быва́ет. Звере́й быва́ем го́рши, си́рых похища́ем, вдови́ц обнажа́ем, ни́щых оби́дим, го́ре на го́ре быва́ет. «Увы́ мне, я́ко поги́бе благогове́йный от земли́». И нам есть е́же рыда́ти про́чее, и сие́ подоба́ет на всяк день глаго́лати. Ничто́же в моли́твах соверша́ем, ничто́же в совеща́ниих, ничто́же в наказа́ниих. Оста́ет про́чее е́же слези́ти. Сие́ и Христо́с сотвори́л есть, мно́га су́щых во Иерусали́мех моли́в: я́ко ничто́же приобрета́ху они́, прослези́ Сам о беде́.

Сие́ и проро́цы творя́т. Сие́ и мы да твори́м ны́не. Рыда́ния про́чее вре́мя, и слез, и мича́ния. Благовре́менно рещи́ и ны́не: «Призови́те рыда́ющия, и ко прему́дрицам посли́те, и да веща́ют». Не́гли си́це возмо́жем отврещи́ неду́га, хра́мы зи́ждущим све́тлыя, се́лы обложе́нным от хище́ния. Рыда́ти благовре́менно. Но споспеши́те мне и вы, оби́деннии. Обнаже́ннии, споспеши́те мне. Рыда́йте мне, и низведи́те мне сле́зы. Но рыда́юще не себе́, но оне́х да рыда́ем: не вас оби́деша, но са́ми себе́ погуби́ша. Вы бо и́мате Ца́рствие небе́сное, вме́сто оби́ды. Они́ же гее́нну, вме́сто приобре́тения. Сего́ ра́ди лу́чше оби́детися, а не оби́дети. Да рыда́ем их рыда́нием, не о́бщым, но от боже́ственых писа́ний, и́мже и проро́цы рыда́ша. Да рыда́им со Иса́ием си́це глаго́люще: «Го́ре, совокупля́ющии хра́мину к хра́мине и село́ к селу́ приближа́юще, да бли́жняго отъи́мут не́что: еда́ всели́стеся еди́ни на земли́? Хра́мы вели́цы и до́бры, и не бу́дут живу́щии в них». Да рыда́ем с Нау́мом, и да рече́м со оне́м.: «Го́ре зи́ждай в высоту́ хра́мину свою́». Наипа́че да возрыда́ем их, после́дующе Христу́ глаго́лющему: «Го́ре богатя́щиися, я́ко вза́лчете, я́ко отстоите́ мзды ва́шея и утеше́ния». Рыда́ем и да не преста́нем. А́ще же не безобра́зно - и да бие́мся, да рцем е́же проро́к «не пла́чите уме́ршаго, но хи́щника, лихои́мца, сребролю́бца, несы́таго». Что ра́ди ме́ртвых рыда́е, о ни́хже ничто́же есть соверши́ти про́чее? Да возрыда́ем сих, о ни́хже есть и преложе́ние. Но нам рыда́ющим, не́гли они́ смею́тся? И сие́ рыда́ний досто́йно, я́ко смею́тся, о ни́хже подоба́ет пла́кати. А́ще у́бо оша́ялися бы от рыда́ний на́шых, подоба́ше преста́ти рыда́ющым я́ко хотя́щым испра́витися. Но поне́же нечу́вствене пребыва́ют, да пребыва́ем мы пла́чуще: не бога́тых про́сте, но сребролюби́вых, лихои́мцев, хи́щников - есть бо и бога́тством в потре́бное де́йствовати, егда́ в тре́бующих изнуря́ем. Лихоима́ние же укори́зна есть и осужде́ние и оглаго́лание. Да рыда́ем у́бо. Не́гли бо не́когда бу́дет исправле́ние. А́ще и впа́дшии не свободя́тся, но ини́и не паду́т в лю́тое, но сохраня́тся. Бу́ди же и оне́х свободи́тися неду́га, и ино́му ни еди́ному же впа́сти, да о́бще вси обеща́нных получи́м благы́х благода́тию и человеколю́бием Го́спода на́шего Иису́с Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́кы веко́в. Ами́нь.

Еди́н же не́кто от них Каиа́фа, архиере́й сый ле́ту о́ному, рече́ им: Вы не ве́сте ничто́же, ниже́ размышля́сте, я́ко поле́зно есть вам да еди́н челове́к у́мрет за лю́ди, а не весь язы́к поги́бнет:

«Углебо́ша язы́цы в па́губе ю́же сотвори́ша, в се́ти сей ю́же скры́ша увязе́ нога́ их», - сие́ о иуде́ох бысть. Они́ бо глаго́лаху уби́ти Иису́са, да [не] прии́дут ри́мляне и во́змут их и язы́к и град. Но егда́ у́бо уби́ша, сия́ пострада́ша. И я́же я́ко избега́юще соде́яша, сия́ егда́ соде́яша не избежа́ша. Но убие́нный у́бо на небесе́х есть, уби́вшии же гее́нну насле́дуют: и́бо не сия́ смотря́ху, но что? «Хотя́ху рече́ уби́ти Его́ от дни о́ного», ре́ша бо «я́ко прии́дут ри́мляне и во́змут нашь язы́к и град». «Еди́н же не́кто от них Каиа́фа, архиере́й сый ле́ту о́ному, рече́», безсту́днейшь сый от мно́гих: «Вы не ве́сте ничто́же». Я́же они́ сомнева́хуся и в чи́ну сове́та предлага́ху: глаго́лаху бо «что сотвори́м?», сие́ сей безсту́дне и наго́ю главо́ю и с лю́тостию возопи́. Что бо рече́? «Вы не ве́сте ничто́же, ниже́ размышля́ете я́ко поле́зно есть вам, да еди́н челове́к у́мрет, а не весь язы́к поги́бнет». Сие́ же не рече́ о себе́, но прорече́ архиере́й сый. Зри́ши ли, ели́ка архиере́йския о́бласти си́ла? Поне́же у́бо отню́д сподо́бися свяще́нства, а́ще и недосто́ин сый ве́щи, прорече́ не ве́дый е́же глаго́лаше. И устна́ми то́кмо де́йствоваше благода́ть, скве́рнаго же се́рдца не косну́ся. Мно́зи у́бо и и́ни бу́дущая ре́ша, недосто́йни су́ще: Навуходоносо́р, фарао́н, Валаа́м - и всех вина́ я́вствена. А е́же глаго́лет, таково́ есть: Вы седи́те, и еще́ лени́вейше ве́щи внима́ете, и не ве́сте еди́ного му́жа спасе́ния о о́бщем пренебрещи́.

Зри, коли́ка Ду́ха си́ла! От мы́сли лука́вы возмо́же глаго́лы произнести́ проро́чества по́лны чу́днаго. Ча́да Бо́жия язы́чников нарица́ет евангели́ст, хотя́щых бы́ти, я́коже у́бо и Сам рече́: «И и́ны овца́ име́ю», и Сам от бу́дущаго сия́ нарица́я. Что же есть «архиере́й сый ле́та о́ного»? Со ины́м и сие́ растле́ся: не ктому́ бо вре́мя всей жи́зни свяще́нствоваху, но ле́то. От него́же бы́ша ку́пленыя нача́льства. Но оба́че и си́це, близ бе еще́ Дух. Егда́ же ру́ки воздвиго́ша на Христа́, тогда́ их оста́ви и пре́йде на апо́столов.

И сие́ катапе́зма изъяви́ла есть раздира́ема, и Христо́в глас глаго́лющий: «Се оставля́ется дом ваш пуст». И Ио́сип по ма́ле быв вре́мени рече́ не́ких а́нгелов еще́ предстоя́щых и ожида́ющих, а́ще не восхотя́т они́ преста́вити, оста́вити их. Доне́лиже бо виногра́д стоя́ше, вся бы́ша. Егда́ же Насле́дника уби́ша, не ктому́, но погибо́ша. И я́коже ри́за све́тла от о́трока непотре́бна иуде́й, Бог благода́рным рабо́м даде́ су́щым от язы́к, о́нех пусты́х оста́вль и нагы́х. Не ма́ло же сие́ бе е́же и врагу́ проро́чествовати сия́. Сие́ и ины́х прито́ргнути можа́ше по его́ у́бо произволе́нию, сопроти́вне случи́ся. Поне́же бо у́мре, сего́ ра́ди бу́дущия му́ки свободи́шася ве́рнии.

Что есть «да соберу́т»? Су́щых дале́че и су́щых близ еди́но те́ло сотвори́л есть: в Ри́ме седя́й, инде́яном уд непщу́ет себе́ бы́ти. Что сего́ собра́ния ра́вно? И всем глава́ Христо́с. «От о́ного дни совеща́ша иуде́и, да убию́т». И у́бо пе́рвие иска́ху, глаго́лет бо: «Сего́ ра́ди иска́ху Его́ иуде́и уби́ти». «Что Мя и́щете уби́ти?». Но тогда́ у́бо иска́ху уби́ти, ны́не же утверди́ша изволе́ние. И я́ко де́лом, ве́щию де́йствоваху. «Иису́с же не ктому́ со дерзнове́нием хожда́ше во Иуде́и». Па́ки челове́чески Себе́ соблюда́ет, и ча́сте сия́ твори́т. Вину́ же рех, ея́же ра́ди мно́жицею отъи́де, и отлучи́ся, и ны́не близ пусты́ни пребыва́ет во Евфра́фе, и та́мо живя́ше со ученики́ Свои́ми. Ка́ко непщева́ше мути́ти ученико́в, зря́щи Его́ челове́чне спаса́ема? Никто́же про́че после́дова, пра́знику бо су́щу близ. Си́и же егда́ вси ра́довахуся и торжествова́ху, тогда́ кры́ются, тогда́ в беда́х суть, но оба́че ожида́ху . И́бо в Галиле́и, па́сце су́щи, и ски́нии потче́ния кры́яхуся. И па́ки по сих пра́зднику су́щу. Тем е́же бе́гати и е́же кры́тися, еди́ни от ины́х со Учи́телем любо́вь показу́юще. Отсю́ду рече́ Лука́ Ему́ рещи́: «Аз пребы́х с ва́ми во искуше́ниих». Сия́ же глаго́лаше, показу́я я́ко от Его́ по́мощи укрепля́ются. «Мно́зи же от страны́ взыдо́ша очи́стити себе́. И да́ша за́поведь архиере́и и фарисе́и, да и́мут Его». Чу́дно очище́ние со скверноуби́йственым произволе́нием, с мужеуби́йственою мы́слию, со окровавле́ными рука́ми. «И глаго́лаху: Мни́те ли, я́ко не прии́дет в пра́здник?». Па́схою наве́товаху, и вре́мя пра́зника творя́ху вре́мя закла́ния, си́речь зде Ему́ впа́сти подоба́ет, вре́мени зову́щу. О́ нече́стия! Егда́ мно́жайшаго тре́ба бя́ше благогове́ния, и и́же от после́дних я́ты отпуща́ти, тогда́ ничи́м же оби́девшаго улови́ти начина́ют. И́бо и уже́ сие́ сотво́рше. Не то́кмо ничто́же по́льзоваше, но и подсмея́телни бы́ша. Сего́ ра́ди ча́сте впа́дая избега́ет, и хотя́щим Его́ уби́ти сопроти́витися, и недоуме́ятися твори́т си́лы, указа́нием умили́ти хотя́. И да егда́ и́мут Его́, навы́кнут, я́ко не их кре́пости бе, но О́ного попуще́ния быва́емое. Ниже́ бо тогда́ возмого́ша Его́ я́ти, и наипа́че близ су́щи Вифа́нии. И егда́ у́бо я́ша, пове́рже их в зн́ак. «Пре́жде шести́ дней Па́схи, прии́де в Вифа́нию иде́же Ла́зарь», ядя́ше у них, и Ма́рфа служи́т и Ла́зарь ядя́ше. Сие́ же све́тлаго воскресе́ния зна́мение бе, е́же по днех мно́гих и жи́ти, и я́сти. Отню́дуже я́вствено, я́ко в хра́мине ея́ обе́д бе: а́ки бо дру́зи и люби́ми прие́млют Иису́са. Не́цыи же ре́ша, я́ко в чу́ждей хра́мине сие́ бысть.

Мари́я же не служа́ше, учени́ца бо бе. Па́ки зде духо́внейше. Не служа́ше бо я́ко зва́вши, ниже́ о́бще твори́т служе́ние, но в Него́ то́кмо обставля́ет честь, и не я́ко челове́ку приступа́ет, но я́ко Бо́гу. Ми́ро бо сего́ ра́ди излия́, и власы́ главны́ми отре́: я́же не бе́ша непщева́ние име́ющия о Нем таково́, яково́ мно́зи. Но запрети́ Иу́да о́бразом не́гли благогове́ния.

Что у́бо Христо́с? «Де́ло до́бро сотвори́ла есть в погребе́ние Мое́». Что у́бо не обличи́ ученика́ о жене́, ниже́ рече́ сие́ е́же евангели́ст рече́, своея́ ра́ди татбы́ запреща́ше жене́? Свои́м долготерпе́нием обрати́ти его́ хотя́ше. Зане́же бо ве́дяше я́ко преда́тель есть, свы́ше его́ обличи́ мно́жицею рек: «Не вси ве́руют», и «еди́н от вас диа́вол есть». Изъяви́л есть у́бо я́ко ве́дяше его́ преда́теля: не обличи́же я́вствене, но попусти́, возва́ти его́ хотя́.

Ка́ко у́бо ин рече́, я́ко вси ученицы́ сие́ проповеща́ша? И вси, и он: но про́чии не те́мже произволе́нием. А́ще кто истя́жет, что у́бо та́тю су́щу меше́ц вручи́ нищих и устроя́ти сотвори́ сребролю́бца су́ща? О́но у́бо рече́м: я́ко неизрече́нное сло́во Бог весть. А́ще же что подоба́ет и нам расмотря́ющим рече́: да вся́ко отсече́т непщева́ние, я́ко име́ний раче́нием сие́ сотвори́: и́бо дово́льно имя́ше мешца́ вожделе́ния утеше́ние - но лука́вства ра́ди мно́гаго е́же хотя́ше держа́ти, Христо́с мно́гим схожде́нием к не́му де́йствуя. Те́мже ничто́же порица́ше ему́ кра́дущу, а́ще и ве́дый загражда́я лука́вое вожделе́ние и вся́ко отъе́мля отвеща́ние. «Оста́вите ю́ рече́, в день бо погребе́ния Моего́ сие́ сотвори́ла есть». Па́ки преда́телю воспомяну́ погребе́ние рек, но не каса́ется ему́ обличе́ние, ниже́ умягча́ет глаго́л, и́бо дово́льно его́ в ми́лость вложи́ти. А́ки бы глаго́лал: тя́жек есмь и бре́менен? Но пожди́ ма́ло и отъиду́. И́бо сие́ состроя́ше, внегда́ глаго́лати «Мене́ же не всегда́ име́ете». Но ничто́же от сих зве́рствующаго и беся́щагося преклони́: и́бо и сих мно́го вя́щша и рече́, и сотвори́: и но́ги ему́ омы́ в нощи́, и трапе́зы его́ приобщи́ и соле́й, - е́же и разбо́йническия весть держа́ти душа́, - и глаго́лы и́ны веща́ти, дово́льный ка́мень умягчи́ти. И наипа́че не пре́жде мно́га вре́мени, но в са́мый той день, да ниже́ вре́мя в забы́т вложи́т, но ко всем ста.

Нравоуче́ние шестьдеся́ть пя́тое: О сребролю́бии:

Лю́то сребролю́бие, лю́то: и очеса́, и ушеса́ ослепля́ет, и зве́ря люте́йших твори́т, ни со́весть, ни дру́жбу, ни обще́ние, ни своея́ души́ спасе́ние помышля́ти попуща́юще - но еди́ною от всех оста́вивши, рабо́в свои́х твори́т я́тых, я́коже не́кое томи́тельство лю́то. И зло́е си́це го́ркия рабо́ты, я́ко и благода́ть им име́ти увещава́ет. И ели́ко у́бо а́ще ему́ па́че рабо́тают, толи́ко возраста́ют сла́достная. И си́це наипа́че неду́г неисцеле́н быва́ет. Си́це неудо́бь е́млем зверь сей. Гиези́ю прокаже́нна вме́сто ученика́ и проро́ка сотвори́. Сей су́щих о Ана́нии погуби́. Сей Иу́ду преда́теля соде́ла. Сей иуде́йских нача́льников растли́, прие́млющих мзды и обе́щников та́тем быва́ющих. Сей безчи́сленныя ра́ти введе́, кро́ве у́бо пути́, рыда́нии же и мича́нии гра́ды испо́лнивши. Сей ве́чери сотвори́ бы́ти нечи́сты, и трапе́зы сту́дны, и бра́шна законопреступле́ния напо́лни. Сего́ ра́ди идолослуже́ние нарече́ Па́вел, но ниже́ си́це устраши́. Что же ли ра́ди идолослуже́ние рече́? Име́ют мно́зи име́ния, и де́йствовати и́ми не сме́ют, но возлага́ют вну́ком и су́щым от ро́да, препосыла́юще неприкоснове́нна я́коже не́ких возложе́ний, не сме́юще косну́тися. А́ще когда́ прину́дится, я́коже непра́ведно не́что соде́лавше си́це пребыва́ют. И и́накоже, я́коже истука́на ка́менна, си́це и зла́то две́рем вверя́ет и закле́пом, вме́сто хра́ма ковче́г состроя́я и возлага́ет сосу́ды сре́бреными. Но не покланя́ешилися я́коже он истука́нному? Но вся́ко показу́еши о нем слугова́ние. Па́ки он сла́дце у́бо очеса́ и ду́шу пре́дал бы, не́жели истука́ннаго сего́: и зла́то лю́бящии. Но не поклоня́юся зла́ту, рече́. Ниже́ они́, и́долу рече́ поклоня́ются, но живу́щему в нем бе́су. Си́це и ты, а́ще и не зла́ту поклоня́ешися, но от зре́ния зла́та и вожделе́ния наска́чущему души́ твое́й - бе́су. Бе́са бо люте́йше, сребролю́бия вожделе́ние. И сему́ мно́зи наипа́че покаря́ются, не́жели и́долом ини́и. Они́ бо мно́га преслу́шают, зде́же во всех покаря́ются, и е́же а́ще рече́т сотвори́ти - покаря́ются. Что глаго́лет? Ра́тник бу́ди, рече́ враг, всем, не ве́дай естество́, пренебрези́ Бо́га, пожри́ ми себе́ - и вся покаря́ются. И истука́нным волы́ и овца́ пожира́ют. Сребролю́бие же глаго́лет: пожри́ ми свою́ ду́шу - и покаря́ешися. Зри́ши ли, якова́ и́мать ка́пища, якова́ прие́млет жре́ния? «Ца́рствия Бо́жия не насле́дят лихои́мцы», - и ниже́ си́це боя́тся. А́ще и всех вожделе́ние сие́ не́мощнейше, не бо всажде́нно, ниже́ есте́ствено: вои́стинну бо в нача́ле вложи́л бы. Ны́не же зла́то не бе испе́рва, ниже́ жела́ше кто зла́та. Но а́ще хо́щете, глаго́лю, отку́ду вни́де зло́е. Ко́ждо су́щаго пре́жде себе́ ревну́юще, простро́ша неду́г, и не хотя́щаго, предвари́вый раздража́ше. Егда́ бо уви́дят хра́мы све́тлы, и мно́жество сел, и пле́нников стада́, и сре́брены сосу́ды, и мно́го риз собра́ние - вся де́йствуют я́ко бы преодоле́ти, я́коже пе́рвии вторы́м вино́вни быва́ют, и они́ - су́щим по них. А́ще же хоте́ли бы целому́дрити, не бы́ ины́м бы́ли судия́ и учи́тели. Па́чеже ниже́ сим есть отве́т, суть бо ини́и име́ний пренебрегу́ще. И кто рече́ пренебреже́т? Е́же бо лю́то, я́ко от мно́гия зло́бы невозмо́жное ви́дится обстоя́ти, и ниже́ ве́руется кто исправля́я. Реку́ ли у́бо мно́гих во граде́х, су́щых ли в гора́х, и что приобре́тение? Ниже́ бо от сих бу́дете лу́чши. И́накоже, нам не о сем сло́во ны́не, я́кобы истощи́ти су́щая. Хоте́х бо, но оба́че поне́же бо́льше ва́ше бре́мя, не принужа́ю: но я́ко чу́жих не жела́ти наказу́ю, я́кобы от су́щых подая́ти. Мно́гих же таковы́х обря́щем, дово́льными о свои́х пеку́щихся и от пра́ведных живу́щых трудо́в. Что ра́ди не тем ревну́ем и подража́ем? Да помышля́им су́щых пре́жде нас. Не стяжа́ния ли их ста́ша, то́кмо имена́ их соблюда́юща? О́нсицы ба́ня, и о́нсицы предгра́дие и обита́ние. Не а́бие ли ви́девше поздыха́ем, помышля́юще коли́к труд претерпе́, коли́ка хище́ния похи́ти, и нигде́же ли явля́ется, но наслажа́ются ини́и о́ноговыми и́мже ниже́ ча́яше, не́гли же и враго́м, о́ному после́днюю стра́ждущу казнь? Сия́ и нас ожида́ют: вся́чески бо у́мрем, вся́чески той же коне́ц постра́ждем. Коли́к гнев, рцы ми, коли́ко изнуре́ние, коли́ки вражды́ пострада́ша? И что ли приобре́тение? Му́ка безсме́ртная, и́же ни еди́наго же получи́ти утеше́ния, и е́же не живу́щым то́кмо, но и отше́дшым осужда́тися от всех. Что же мно́гих о́бразы егда́ уви́дим возложе́нны во хра́мех, не па́че ли рыда́ем? Вои́стинну до́бре рече́ проро́к: «Оба́че всу́е мяте́тся всяк челове́к жи́вый». Смуще́ние бо вои́стинну е́же о таковы́х тща́ние, смуще́ние и молва́ изли́шняя. Но во оби́телех ве́чных сие́ несть, ниже́ во кро́вех оне́х. Зде бо ин зло стражда́, а ин наслажда́ется. Та́мо же свои́х трудо́в ко́ждо бу́дет госпо́дь, и мно́го сугу́бно прии́мет воздарова́ние. Ко о́ному у́бо да тщи́мся стяжа́нию, та́мо да строя́ем себе́ хра́мы, да почи́ем о Христе́ Иису́се о Го́споде на́шем, Ему́же сла́ва и держа́ва ны́не и при́сно и во ве́ки веко́в. Ами́нь.

Савл же еще́ дыха́я преще́нием и уби́йством, на ученики́ Госпо́дни, присту́пль ко архиере́ю, испроси́ от него́ посла́ния в Дама́ск к собо́рищем, я́ко да а́ще не́кия обря́щет Христо́вым путе́м ходя́ща му́жа и жены́, свя́заны приведе́т во Иерусали́м.

Толкова́ние Диди́мово о небе́снем и боже́ственем зва́нии Па́вловом: Досто́йно о ре́вности Па́влове рекл есть, и показу́ет, я́ко не зло́бою, но ре́вностию привлачи́тся, не насы́тився уби́йством Стефа́новым, не испо́лнися гоне́нием Це́ркви и разсе́янием, сей и сие́ исполня́юще, Христо́м глаго́лемое: «Я́ко убива́юще вас мнят слу́жбу приноси́ти Бо́гови». Се́й же та́ко творя́ше, а не я́ко иуде́и. Я́ко бо ре́вностию творя́ше, я́ве я́ко и во вне́шняя гра́ды вхожда́ше – они́ же ни о Иерусали́мех попече́ние имя́ху: еди́но им то́чию бя́ше е́же че́сти наслажда́тися. Почто́ в Дама́ск идя́ше? Вели́к у́бо и ца́рский град бе, и боя́шеся, да не и той бу́дет испо́лнен про́поведи. И зри любо́вь его́ и прилежа́ние: не прихо́дит к кня́зю, но ко архиере́ю. Прие́м же Па́вел от архиере́й посла́ния, к Дама́ску устреми́ся, я́коже не́кий пото́к борз, удави́ти непщу́я су́щая в Дама́сце учени́к и в па́губную про́пасть тех низпосла́ти. Ви́дев же Госпо́дь непра́здную вражду́ пра́ведным, я́коже бы рещи́ прилежа́ние име́яше, посреде́ пути́ яви́ся, и у́ лиши́ его́ виде́ния велича́нием све́та. И в толи́це прилежа́нии своего́ гони́теля сотвори́, я́ко а́бие возлю́блен и ве́рен вмени́ся, и бли́жний внеза́пу Иису́сов ра́тник быва́ет. И а́бие со́бранныя вражды́ отве́ргся, в смире́ние вмеща́ется, и е́же ко Христу́ благоче́стие испове́дует.

Су́щее: Внегда́ же иду́щу, бысть ему́ прибли́житися к Дама́ску. И внеза́пу облиста́ его́ свет от небесе́, и пад на зе́млю. Слы́ша глас глаго́лющь ему́: «Са́вле, Са́вле, что Мя го́ниши?». Рече́ же: «Кто еси́ Го́споди?». Госпо́дь же рече́: «Аз есмь Иису́с, Его́же ты го́ниши. Же́стоко ти есть проти́ву рожну́ пра́ти». Трепе́ща же и ужаса́емь глаго́ля: «Го́споди, что ми хо́щеши твори́ти?». И Госпо́дь рече́ к нему́: «Воста́ни и вни́ди во град, и речет́ся ти что ти подоба́ет твори́ти». Му́жие же иду́щии с ним, стоя́ху чудя́щеся, слы́шаще у́бо глас, никого́же ви́дяще.

Толкова́ние Аммо́ниево: Почто́ не яви́ся ему́ во Иерусали́ме? Почто́ не в Дама́сце? Я́ко не подоба́ше ине́м, и ни ко о́нем пове́дати, но сам достове́рен бя́ше пове́дуя. Ви́де бо Иису́са и не терпя́ мно́жества све́та, окамени́ся зри́тельное души́ и живи́тельное: те́мже и мня о́чи име́ти, не ви́дяше, усты́ име́я, не ядя́ше, до́ндеже ве́рова. Ана́нии глаго́лавшу ему́ сло́во «исцели́ся», по ве́ре у́бо нача́т ви́дети и крести́ся, и та́ко пи́щу па́че духо́вную прия́т. Те́мже подоба́ет пре́жде креща́ти и пото́м пи́щу подава́ти . О человеколю́бию Влады́чню! Бог челове́ку бесе́дует: «Что Мя го́ниши?» рече́, Отцу́ Своему́ подо́бится: Он у́бо наро́ду евре́йскому глаго́лет: «Лю́дие Мои́, что сотвори́х вам, или́ чим оскорби́х, или́ чим озло́бих? Отвеща́йте Ми». Си́це Сын Его́ Са́влу глаго́лет: «Са́вле, что Мя го́ниши?». Что же он отвеща́? «Кто еси́ Го́споди?». А́бие Влады́ку испове́дует. Ви́диши ли ду́шу благоразу́мну? «Кто еси́ Го́споди?». «Аз есмь Иису́с рече́ Его́же ты го́ниши». О прему́дрости Влады́чни! Почто́ не рече́ ему́: «Аз есмь Сын Бо́жий: Аз есмь И́же изнача́ла Сло́во: Аз есмь седя́й одесну́ю Отца́, И́же зра́ком Бо́жиим сый, И́же не́бо пропны́й, И́же зе́млю основа́вый, И́же мо́ре простре́вый, рече́, И́же а́нгелы сотвори́вый, И́же везде́ сы́й вся исполня́я, И́же пре́жде сый роди́вся». Почто́ ра́ди не рече́ честна́я, вели́ка и высо́ка, но «Аз есмь Иису́с назаряни́н, Его́же ты го́ниши» от до́лняго гра́да, от до́льней ве́си и ме́ста? Зане́же не ве́дяше гоня́й Его́. А́ще бо бы ве́дал Его́, не бы у́бо гони́л. Я́ко бо от Назаре́та бе ве́дяше, не ве́дяше же, я́ко от Отца́ рожде́н бысть и Сын Бо́жий есть. А́ще убо рекл бы ему́: «Аз есмь Сын Бо́жий, И́же изнача́ла Сло́во», рекл бы у́бо, ин есть Он, и Ино́го аз гоню́: несть сый распны́йся. Но да уве́сть, я́ко о́ного го́нит вопло́щшагося и зрак ра́бий прие́мшаго, и с ни́ми пожи́вшаго, и уме́ршаго, и погребе́ннаго, и от до́льнего су́ще гра́да - глаго́лет: «Аз есмь Иису́с назаряни́н, Его́же ты го́ниши», Его́же ви́дел еси́, Его́же познава́еши с тобо́ю пожи́вшаго. Сего́ ра́ди Влады́чню испове́да си́лу, сни́де толи́ко Влады́ка, ели́ко раб взы́ти можа́ше.

Су́щее: Воста́в же Савл от земли́, отве́рзстыма очи́ма его́, ни еди́ного ви́дяше. Водя́ше же его́ за ру́ку введо́ша в Дама́ск. И бе дни три не ви́дя, и ни яст ни пит.

Толкова́ние Златоу́стаго: Пре́дан бысть слепоте́ я́ко во́ину на стреже́ние: еда́ ка́ко мно́гою све́тлостию глаго́лати бы на́чнет, я́ко мечта́ние не́кое бысть, и глас недослы́шах, и «ка́ко свы́ше возва́, Его́же до́ле аз ви́дех»? Да не у́бо такова́ помышля́ет, слепоте́ пре́дан бысть. Проти́в Стефа́нове ско́рби, Па́влово провиде́ние утеше́ние быва́ет. Почто́же изнача́ла се не бысть, но пото́м? Да не яви́тся, я́ко вои́стинну воскре́се Христо́с. Гоня́й у́бо Его́ не ве́рует погребе́нию, и воскресе́нию, отку́ду у́бо бы ве́ровал, а́ще не бы была́ мно́га воскресе́нию си́ла? И́же бо си́це бесу́яся, я́ко кро́ви излия́ти в темни́цах полага́ти - внеза́пу веру́ет. И́же ко архиере́ом прише́дый писа́ние прие́мый, свя́занныя ученики́ Христо́вы приводи́ти - сей ны́не Влады́ку испове́дует. Почто́же не внутрь гра́да просия́ся све́том, но вне гра́да? Зане́же не бы́ша ве́ровали мно́зи, но и поруга́лися бы́ша, я́коже и на Христа́ бы́вшаго «глас с небеси́, глаго́лаху, гром бысть». Сей же достове́рен бе возвещева́я па́че я́же о себе́, и свя́зан ведя́шеся не возло́жным нань у́зам, и влача́ху его́, и́же той непщева́ше влача́ти. «Ни яст ни пит», рече́: осужда́ше бо себе́ о бы́вших ему́, испове́довашеся моля́щеся. А́ще ли кто рече́т, я́ко по ну́жди бысть вещь - и Ели́ма та́жде пострада́в, ка́ко у́бо не преложи́ся? Что же ну́жнейшее тру́су бы́вшему на воскресе́нии, и во́ином возвести́вшим зна́мения мно́га я́ко воскре́се? Но не суть сия́ ну́жна, но учи́тельна. Почто́ иуде́е неве́роваша сия́ слы́шаще, я́же и вся ве́ровати подоба́ше? О́нем у́бо и воскресе́нию пропове́данну, сей же не приобщи́ся ни еди́ного ве́рных, но в Дама́сце преложи́ся. Та́же вне гра́да се пострада́л есть.

Су́щее: Бе же не́кто учени́к пе́рвый в Дама́сце и́менем Ана́ния, и рече́ к нему́ Госпо́дь в виде́нии: «Ана́ние». Он же рече́: «Се аз, Го́споди». Госпо́дь же к нему́ рече́: «Воста́в, пойди́ на стогну́ нарица́емую пра́ву и взыщи́ в дому́ иу́дове, Са́вла и́менем тарсяни́на, се бо, моли́тву де́ет. И ви́де в виде́нии му́жа и́менем Ана́нию, вше́дша и возло́жша нань ру́ку, я́ко да прозри́т».

Толкова́ние Златоу́стаго: Почто́же ни еди́наго достове́рных вели́ких ниже́ приведе́, ниже́ предста́ви на креще́ние Па́влово? Я́ко не хотя́ше челове́ки извести́тися, но саме́м Христо́м. Поне́же и Ана́ния не поучи́ его́ ничесо́же, то́чию крести́л есть. Егда́ у́бо крести́, а́бие прия́т мно́гую благода́ть Ду́ха Свята́го. И от ре́вности усе́рдия мно́га не рече́ «бесе́дуй к нему́ и учи́ его́», но «я́ко мо́лится и ви́де во сне му́жа возложи́ша нань ру́це». Ана́ния же дия́кон бе, я́коже сам Па́вел свиде́тельствует в пра́вилех. Се же бысть, поне́же оскуде́ние бе презви́тер в Самари́и гоне́ния ра́ди бы́вшаго.

Су́щее: Отвеща́в же Ана́ния: «Го́споди, слы́шах от мног о му́жи сем, коли́ка зла сотвори́ святы́м Твои́м во Иерусали́ме. И зде и́мать власть от архиере́й связа́ти вся нарица́ющая и́мя Твое́».

Толкова́ние Аммо́ниево: Что глаго́леши Ана́ние? Бог глаго́лет, и ты не ве́руеши. Не бя́ху бо еще́ до́бре разуме́ли си́лу Христо́ву. И зри, ка́ко его́ страх отъе́млет: «слеп есть и мо́лится, рече́, и ты бои́шися». Си́це и Моисе́й в купине́ убоя́ся: я́ко глаго́лы стра́ху бя́ху, а не неве́рующаго. Подо́бне бе в стра́се су́ща испы́товати: не я́ко не ве́дящу Христу́ сия́ Ана́ния глаго́лет, но си́м та́ко бы́вшим, ка́ко мо́жет рече́ бы́ти? Что́же Госпо́дь? «Мо́лится рече́, не бо́йся, ви́де во сне му́жа Ана́нию и́менем». Сего́ ра́ди во сне ви́де, поне́же слеп бе, и ниже́ чудесы́ преиме́ние преклони́ ученика́. «Зри рече́, кого́ мя предае́ши. Бою́ся, егда́ ка́ко во Иерусали́м мя поведе́т, что мя во уста́ льво́вы влага́еши?». И сия́ глаго́ля, да навы́кнем всю́ду доброде́тель му́жа, я́ко в толи́це стра́се су́ща послуша́ние показу́ет, и вели́ко зна́мение си́ла Бо́жия явля́ет.

[Толкова́ние ина́го: Иу́да испове́дание сказу́ется, Ана́ния же - благода́ть, Тарс - посеще́ние. Все о́браз бысть. Ка́ко Савл испове́дуется: «благода́ть по́слана бе», «посеще́ние свы́ше бысть». Не то́чию же Са́вла, но и всех нас боля́щих посети́ Госпо́дь, я́коже есть пи́сано: «Посети́л ны восто́к свы́ше». Савл же трема́ о́бразы поболе́: паде́нием, ослепле́нием, неяде́нием. Трема́ же врачева́ его́: очи́та сотвори́, крести́, пи́щу пода́.]

Су́щее: Рече́ же к нему́ Госпо́дь: «Иди́, я́ко сосу́д избра́н Ми есть сей, пронести́ и́мя Мое́ пред язы́ки и царьми́, и сы́нми Изра́илевыми: Аз бо скажу́ ему́ ели́ка подоба́ше ему́ о и́мени Мое́м пострада́ти».

Толкова́ние Аммо́ниево: Иди́, рече́, не то́кмо ве́рен бу́дет, но и учи́тель, и дерзнове́ние мно́го прии́мь. О чудесе́! Гони́тель и ху́льник и досади́тель избра́н сосу́д и пропове́датель всей вселе́нней показу́ется. Глаго́летбося и се: я́ко ве́ровав Па́вел рече́нным к нему́, от своего́ произволе́ния прии́де е́же бесе́довати Ана́нии. Те́мже и подо́бно есть толи́ко показа́вшаго покая́ние внеза́пу и свиде́тельство прие́м, е́же сосу́д избра́н бы́ти. К сему́ же ни яст, ни пие́т вся три дни: показа́ние бе зе́льного покая́ния поще́ние. Мо́щно же рещи́, я́ко Бог ве́дый бу́дущая опа́сно, бы́вшая свиде́тельствова, бу́дущаго ра́ди ему́ служе́ния, «я́коже сосу́д избра́н бе». И и́нако па́ки, я́ко благочести́в сый боже́ственною ре́вностию, ве́рующая Спа́су Христу́, я́ко отме́тники Бо́жия и Зако́ну, неве́дением гоня́ше, и на боже́ственное прилежа́ние я́коже рещи́ се творя́ше, а́ще и преле́стно. Бог же смотре́в таково́е преле́стное прилежа́ние, рече́: «Что Мя го́ниши?» - а́бие послу́ша глаго́лемое, и подо́бное зва́нию творя́ше.

Су́щее: По́йде же Ана́ния и вни́де в хра́мину, и возло́жь нань ру́це, рече́: «Са́вле, бра́те, Госпо́дь посла́ мя Иису́с явле́йтися на пути́, и́мже идя́ше, я́ко да прозри́ши и испо́лнишися Ду́ха Свя́та». И а́бие отпадо́ша от о́чию его́ я́ко чешую́. Прозре́ же а́бие, и встав крести́ся. И прие́м пи́щу, укрепи́ся.

Толкова́ние Диди́мово: А́бие присвоя́ет его́ и́менем Иису́с, «явле́йтися на пути́» рече́, и́бо се не рече́ ему́ Христо́с, но Ду́хом Святы́м навы́кну. И сия́ глаго́ля ру́це возлага́ше, и а́бие прозре́. Исцеле́нии возложе́нием рук быва́ют , я́ко сводя́щим боже́ственную си́лу цели́тельную. Не рече́ «ослепи́вый тя», но явле́йтися. Рука́ма возложе́нныма сия́ глаго́лаше, и сугу́бо ослепе́ние разреша́шеся. И а́бие приво́дит, хотя́ покры́ти осужде́ние, «я́ко да прозри́ши и испо́лнишися Ду́ха Свя́та». Не обличи́ти приидо́х бы́вшее, но дар пода́ти. «И прии́м пи́щу, укрепи́ся» рече́. Изнемо́гл бе у́бо ше́ствуя, от стра́ха, и гла́да, и малоду́шия. Хотя́ у́бо Госпо́дь продо́лжити ему́ печа́ль, ослепи́ его́. И да не мнит, я́ко мечта́ние бе ослепле́ние, сего́ ра́ди чешуя́ падо́ша, и ино́го поуче́ния не тре́боваша, но приключи́вшеся бысть ему́ уче́ние. Ви́девже и́стине испыта́тель Бог целому́дрена су́ща му́жа, и от злых на бо́льшее хо́щет бы́ти, не и́нако, но си́це я́же о нем стро́ит.

Коне́ц толкова́нию.

Го́споду и Бо́гу и Спа́су нашему Иисусу Христу́ глаго́лющу иуде́ом, и Cебе́ ра́вна Богу и Отцу́ показу́ющу, и «пре́жде Авраа́ма бы́вшу, Аз есмь» глаго́лющу, и со дерзнове́нием фарисе́и облича́ющу и кни́жники ку́пно. Они́ же я́ростию и гне́вом исполня́хуся, и же́стоцы явля́хуся Нань, и смуща́хуся. И взя́ша ка́мение мета́ти Нань, Христо́с же уклони́ся отту́ду, и посреди́ их неви́димо изы́де из хра́ма. И ми́мо хожда́ше тако про́сто, ни еди́ну напа́сть име́я от гоня́щих Его иуде́й, на исцеле́ние слепа́го прихо́дит, уверя́я глаголе́мая от Него́, фарисе́ом и кни́жником глаго́лемая, и умякча́я же́стоту их и неве́рствие зна́мением сим. Ужа́сни же бы́вше ученицы́, и не ве́дяще о ви́дении слепа́го, вопроша́ют:

Ева́нгелие: Го́споди, кто согреши́, сей ли, или́ роди́теля его́, да слеп роди́ся?

Толкова́ние: Слы́шаша бо пре́жде Христа́ к разсла́бленному глаго́люща: «Се здрав еси́, ктому́ не согреша́й». Ви́девше же слепа́го, и уве́девше я́ко та́ко роди́ся, удивля́ются, и вину́ и́щут разуме́ти. Госпо́дь же разреша́я им неве́дение, отвеща́ и рече́:

Ева́нгелие: Ниже́ сей согреши́.

Толкова́ние: От рожде́ния бо бя́ше слеп. И ка́ко есть возмо́жно согреши́ти, еще́ не рожде́ну?

Ева́нгелие: Ниже́ роди́теля его́ согреши́ста, да сего́ ра́ди слеп роди́ся.

Толкова́ние: Ча́до бо роди́телей ра́ди не прие́млет суда́. Непра́ведно бо есть ины́м согреша́ющим, ины́м же приима́ти осужде́ние. К ча́дом, ничто́ же согреша́ющим, налага́ти прегреше́ния о́тча - непра́ведно есть. Глаго́лет бо проро́к Иезеки́иль: «Не бу́дет ктому́ при́тча сия́ глаголе́мая: я́ко отцы́ ядо́ша те́рпкая, и зу́бы ча́дом отерпо́ша». Но жив Госпо́дь, и жива́ душа́ моя́, я́ко отсе́ле не и́мать бы́ти, ины́м согреша́ющим, ины́м же му́чимым быва́ти, но согреши́вый - он му́чимь бу́дет. И Моисе́ом же зако́н полага́ет Бог глаго́ля: «Не умре́ти и́мать оте́ц чад ра́ди, но душа́ согреши́вшия, она́ и умре́ти и́мать».

Ева́нгелие: Но да явя́тся дела́ Бо́жия на нем.

Толкова́ние: Сей глаго́л Ева́нгелия: не по вине́ сей глаго́лется та́ко, но прилу́чением. Ниже́ бо сего́ ра́ди слеп роди́ся челове́к он, да́же явя́тся дела́ Бо́жия на нем, но сотворе́нием де́ла та́ко случи́ся. Исцеле́вшу бо слепо́му, просла́вися Бог, и яви́шася дела́ Его́. О Себе́ у́бо рече́ се Христо́с, а не о Отце́ и Бо́зе: О́ного бо сла́ва явле́на бя́ше. Сего́ ра́ди и глаго́лет:

Ева́нгелие: Мне подоба́ет де́лати дела́ посла́вшаго Мя.

Толкова́ние: Несть у́бо ма́ла сла́ва, е́же Зижди́телю позна́ну бы́ти, Единоро́днаго Сы́на и Сло́ва Бо́жия, и дела́ де́лати Посла́вшаго И́, Единосу́щнаго и Неви́димаго Отца́.

Ева́нгелие: До́ндеже день есть. Гряде́т бо нощь, егда́ никто́же мо́жет де́лати.

Толкова́ние: До́ндеже у́бо житие́ се стои́т, де́лает нас ра́ди Влады́ка. Зна́мения бо и чудеса́ - дела́ Его́ суть, да́же и мы ве́руем Вонь, и живо́т и́мамы о И́мени Его́. Прихо́дит же нощь, дело́м преста́ние, си́речь, коне́ц живота́ ко́ждаго нас. Гряде́т бу́дущий век он, егда́ ни ве́ра де́йствует, ни дела́. Зде у́бо есть дея́ние вся́кое зна́мением и ве́ре, и промышле́ние и потща́ние на́шего спасе́ния. Та́може - еди́но то́кмо отвеща́ние Пра́веднаго Cудии́ глаго́люща: «Прииди́те благослове́ннии Отца́ Моего́, насле́дуйте угото́ванное вам Ца́рствие, и ве́чное наслажде́ние» и «Иди́те прокля́тии во огнь ве́чный, и в безконе́чныя му́ки и томле́ния».

Ева́нгелие: Егда́ в ми́ре есмь, Свет есмь ми́ру.

Толкова́ние: Све́та Себе́ глаго́лет бы́ти Христо́с, поне́же просвеща́ет мы́сленно ве́рных сердца́, и свет оче́с челове́ком да́рует.

Ева́нгелие: Сия́ рек, плю́ну на зе́млю, и сотвори́ бре́ние от плюнове́ния и пома́за о́чи бре́нием слепо́му. И рече́ ему́: «Иди́ умы́йся в купе́ли Силоа́мстей», е́же сказа́ется по́слан. И́де же и умы́ся, и прии́де ви́дя.

Толкова́ние: Персть прие́м от земля́ Христо́с, созида́ет не су́щая очеса́ слепа́го, показу́я и явля́я, я́ко душе́вным си́лам Той есть подая́й де́йство, и Той есть искони́ созда́вый челове́ка от пе́рсти. Не размеси́ же водо́ю, но сли́ною, да́же позна́емо бу́дет, я́ко благода́ть вся от плюнове́ния пречи́стых и боже́ственных уст бя́ше. Посыла́ет же и в Силоа́млю купе́ль, да́же пока́жет простоту́ и благоу́мие слепа́го, ктому́ же и изволе́ния его́ несомне́ние и да́же мно́гия и́мать на свиде́тельство исцеле́ния: мно́гия бы сусре́л слепы́й, идя́ше на Силоа́м, очеса́ иму́ща пома́зане бре́нием. Купе́ль же сия́ Силоа́мля, вне Иерусали́ма гра́да бя́ше, и е́же о сей сказа́ние, си́це пове́дает: Иногда́ проро́к Иса́ия малоду́шествовав, помоли́ся воду испи́ти: и а́бие по́слана бысть ему́ вода́ от Бо́га. Бысть же се при царе́ Иезеки́и. Обсе́дшим у́бо Иерусали́м град иноплеме́нником, и лю́дем иуде́йским погиба́ющим оскуде́нием воды́, проро́к помоли́ся, и вода́ изы́де. И егда́ убо прихожда́ху жи́дове проро́ком посыла́еми, исхожда́ше вода́. Егда́ же иноплеме́нницы прихожда́ху, не обрета́шеся вода́ нима́ло. И уме́ршу Иса́иеви, та́мо погребо́ша его́ иуде́и, да́же моли́твы ра́ди его́ вода́ не оскуде́ет.

Ева́нгелие: Сосе́ди же его́ и и́же бя́ху ви́дели его́ пре́жде, я́ко слеп бе, глаго́лаху: «Не сей ли есть седя́ и прося́?». О́вии глаго́лаху, я́ко сей есть. Ини́и же глаго́лаху, я́ко подо́бен ему́ есть. Он же глаго́лаше, я́ко аз есмь.

Толкова́ние: Ви́дяще и сле́паго, и о́браза его́ начерта́ние, каково́ бя́ше пре́жде воспомина́юще, очеса́ его́ ны́не ви́дяще отве́рсте - не ве́роваху, я́ко он есть: пресла́вное бо чу́до се, на безве́рие ведя́ше их, сусе́дом у́бо та́ко сумня́ющимся. Иногда́ слеп сый, благи́й дар не кры́яше, но с дерзнове́нием глаго́лаше, «я́ко аз есмь», и исцеле́ние я́ве пропове́даше.

Ева́нгелие: Вопроша́ху же его́ глаго́люще: «Ка́ко ти ся отверзо́сте о́чи?». Отвеща́ он и рече́: «Челове́к нарица́емый Иису́с, бре́ние сотвори́, и пома́за о́чи мои́, и рече́ ми́: Иди́ в купе́ль Силоа́млю, и умы́йся. Шед же, и умы́вся, прозре́х».

Толкова́ние: Дивля́ху же ся иуде́и, и ужаса́хуся слыша́ще слепа́го. И опа́сно вопроша́ху: «Что глаго́леши, челове́к такова́я де́лает?». Он же и́стинное свиде́тельствоваше с дерзнове́нием: «Ей, рече, челове́к по гла́су и по пе́рсту пома́завшу, мня́ше ми ся бы́ти. И я́коже повеле́ ми сотвори́х, и се ви́жу».

Ева́нгелие: Ре́ша же ему́: «Кто Той есть?». Глаго́ла: «Не вем». Ведо́ша же его́ к фарисе́ом, и́же бе ино́гда слеп. Бе же суббо́та, егда́ сотвори́ бре́ние Иисус и отве́рзе ему́ о́чи.

Толкова́ние: Зави́дяще Христу́ иуде́и, и ревну́юще о благо́м да́ре слепа́го, и о чудеси́ е́же на нем, иска́ху Его обрести́ и ко иере́ом привести́. Но поне́же не обрето́ша, - зане́ Христо́с не хотя́ше близ исцеле́нных обрета́тися: не бя́ше бо славолю́бец, ниже́ по́честь любя́ше, но везде́ и во всех смиренному́дрствуя явля́шеся, -приво́дят су́щаго иногда́ сле́па к фарисе́ом.

Ева́нгелие: И вопроша́ху его́ фарисе́и, ка́ко прозре́. Он же я́ко к пре́жде слы́шащим, скоре́йше па́ки глаго́лет: Бре́ние положи́ на о́чи мои́, и умы́хся, и ви́жу».

Толкова́ние: Фарисе́и же ре́ша: «Виждь Иису́са, что де́лает в суббо́ту, бре́нием помазу́ет». Я́ко слепа́го исцели́, не смышля́ют фарисе́и, но зане́же бре́ние сотвори́ - су́дят и осужда́ют, безу́мно и непра́ведно ненави́дяще.

Ева́нгелие: Глаго́лаху же от фарисе́й не́цыи: «Сей челове́к несть от Бо́га, поне́же суббо́ту не соблюда́ет». Ини́и же глаго́лаху: «Ка́ко мо́жет челове́к гре́шен, такова́я чудеса́ твори́ти?». И ра́спря бе в них.

Толкова́ние: От распре́ния бо е́же ме́жду собо́ю име́яху, и поне́же никто́же сме́яше я́ве рещи́ е́же хотя́ше, на слепа́го па́ки прилага́ются. И вопроша́ют и́, ели́цы благосла́вие о Христе́ име́яху.

Ева́нгелие: Ты что глаго́леши рече́ о Нем, я́ко отве́рзе о́чи твои́? Он же рече́: «Я́ко проро́к есть».

Толкова́ние: Сие́ бо и́мя, во иуде́ох честне́йше бя́ше.

Ева́нгелие: Не веро́ваша же иуде́и о нем, я́ко слеп бе и прозре́, до́ндеже возгласи́ша роди́теля того́ прозре́вшаго, и вопроси́ша их глаго́люще: «Сей ли есть сын ваш, его́же вы глаго́лете, я́ко слеп роди́ся? Ка́ко у́бо ны́не ви́ди?».

Толкова́ние: Па́ки не ве́руют фарисе́и, я́ко сле́пу су́щу исцеле́ние Христо́с дарова́, и роди́теля его́ вопроша́ют, не веру́юще сосе́дом. Па́че же и прикры́ти хотя́ще чу́до, мно́жае явля́ют ѐ, роди́телем я́ве вся пове́дающим. Не ре́ша же фарисе́и к роди́телем его́, «я́ко сей ли есть сын ваш, и́же иногда́ слеп», но «его́же вы глаго́лете», си́речь, его́же вы сотвори́сте сле́па. И везде́ провозвеща́ста сло́во се: «И ка́ко ны́не ви́дит?». Я́ко лжу́щим роди́телем слепа́го оболга́ют, и понужда́ют их отврещи́ся сы́на, глаголю́ще: «Зане́ ви́дит ны́не сын ваш, лжа у́бо я́ве, я́ко слеп бы́ше перви́е».

Ева́нгелие: Отвеща́ста же и́ма роди́теля его́ и ре́ста: «Ве́мы я́ко сей есть сын на́ю, и я́ко слеп роди́ся. Ка́ко же ны́не ви́дит, не ве́мы. Или́ кто отве́рзе ему́ о́чи, мы не ве́мы. Сам во́зраст и́мать, самого́ вопроси́те, сам о себе да глаго́лет». Сия́ реко́ста роди́теля его́, я́ко боя́стася жидо́в. Уже́ бо ся бя́ху сложи́ли жи́дове, да а́ще кто его́ испове́сть Христа́, от со́нма изве́ржен да бу́дет. Сего́ ра́ди роди́теля его́ реко́ста, я́ко воз́раст и́мать, самого́ вопроси́те.

Толкова́ние: Три вопроше́ния вопроша́ют иуде́и роди́теля слепа́го: А́ще сын их бя́ше, и а́ще слеп роди́ся, и ка́ко прозре́. Роди́теля же двоя́ вопроше́ния испове́дают: Я́ко сын их есть, и я́ко слеп роди́ся. Ка́ко же прозре́, не ве́дяще, не глаго́лют, но сы́на предла́гают, досто́йно ве́рна свиде́теля рещи́, ка́ко прозре́. «Еда́ младе́нец есть, или́ несверше́н?» рече́, я́ко неразуме́ти, ка́ко исцеле́.

Ева́нгелие: Возгласи́ша же второ́е челове́ка, и́же бе слеп, и ре́ша ему́: «Даждь сла́ву Бо́гу. Мы ве́мы, я́ко Челове́к сей гре́шен есть».

Толкова́ние: Я́ве и безсту́дно: не глаго́лют слепо́му отврещи́ся, я́ко Христо́с его́ исцели́. Покро́вне же се сотворя́ют, благоче́стия вся́ко о́браз предлага́юще: «Даждь славу Бо́гу» глаго́люще, си́речь испове́ждь, я́ко ничто́же сотвори́л есть Христо́с на мне. Слепы́й же иногда́, со дерзнове́нием отвеща́ и рече́: «А́ще гре́шен есть не вем, ниже́ ны́не истяза́ю се, ниже́ отвеща́ю о сем. Еди́но же вем, я́ко слеп сый, и ны́не ви́жу. И я́ко чу́до на мне соде́я, яково́ же никто́ же от ве́ка не сотвори́. Та са́мая вещь в себе́ да смотря́ется, и да учи́т вас и́стинное». Многоразли́чными о́бразы начина́ют прикрыва́ти чудо. Но са́мое то естество́ и́стины, от него́ же мни́тся ины́ми наве́товатися - от сих же па́че крепча́йше быва́ет, и ясне́йше сия́ет.

Ева́нгелие: Ре́ша же ему́ па́ки: «Что сотвори́ тебе́? Ка́ко отве́рзе о́чи твои́?». Отвеща́ им: «Реко́х вам у́же и не слы́шасте. Что па́ки хо́щете слы́шати? Еда́ и вы хо́щете ученицы́ Его́ бы́ти?». Они́ же укори́ша его́ и ре́ша ему́: «Ты учени́к еси́ Того́. Мы же моисе́ови есмы́ ученицы́. Мы ве́мы, я́ко Моисе́ови глаго́ла Бог. Сего́ же не ве́мы, отку́ду есть».

Толкова́ние: И о сем лжут иуде́и: Моисе́ова бо не ви́деша, но от пра́дед свои́х слы́шаша. Христа́ же не слы́шаша, но ви́деша. Очеса́ бо ве́де, па́че слух верне́йша суть. И а́ще Моисе́овы бы́ша ученицы́, и Христо́вы бы́ша бы́ли, я́коже и Сам глаго́лаше им: «А́ще ве́ровали бы́сте Моисе́ови, ве́ровали бы́сте и Мне».

Ева́нгелие: Отвеща́ челове́к, и рече́ им: «О сем бо ди́вно есть, я́ко вы не ве́сте отку́ду есть, и отве́рзе о́чи мо́и. Вем же, я́ко гре́шники Бог не послу́шает. Но а́ще кто богочте́ц есть, и во́лю Его́ твори́т - того́ послу́шает. От ве́ка несть слы́шано, я́ко кто отве́рзе о́чи сле́пу рожде́ну. А́ще не бы был сей от Бо́га, не могл бы твори́ти ничесо́же». Отвеща́ша и ре́ша ему́: «Во гресе́х ты роди́лся еси́ весь, и ты ли учи́ши нас?». И изгна́ша его вон.

Толкова́ние: Мня́ще, я́ко отврещи́ся и́мать, вопроша́ху его. Зане́же не отве́ржеся, но па́че и́стину пропове́даше, и облича́ше их - тогда́ осужда́ют и́, и слепото́ю поноша́ют ему́, изгоня́ют и́ вон. «Возненави́деша бо облича́ющаго во врате́х, и сло́во пра́ведное омерзе́ им». Не можа́ху бо терпе́ти ни́щаго и убо́гаго обличе́ние, явля́ющася дерзнове́нна о и́стине, но постыжа́хуся ло́жно глаго́люще. Та́ко бо ве́лия и́стины си́ла, я́коже и лжи мно́го спря́тание и недерзнове́ние.

Ева́нгелие: Услы́ша Иису́с, я́ко изгна́ша его́ вон, и обре́те его́, рече́ е́му: «Ты ве́руеши ли в Сы́на Бо́жия?». Отвеща́ он и рече́: «И Кто есть Го́споди, да ве́рую в Него́?». Рече́ же ему́ Иису́с: «И ви́дел еси́ Его́, и глаго́ляй с тобою, Той есть». Он же рече́: «Ве́рую Го́споди, и поклони́ся Ему́».

Толкова́ние: Та́ко вопроша́ет Христо́с слепа́го, я́коже и су́щу с ним, и прие́млет глаго́лемая от него́ иуде́ом. Поне́же бо ре́ша ему иуде́и: «Даждь сла́ву Бо́гу». И та́ко о сем умо́лкну. Похвали́ же его́ Христо́с, и прия́т. Сего́ ра́ди ниже́ рече́ ему́: «Ка́ко не воздаде́ сла́ву Бо́гу?», но глаго́лет: «Ты ве́руеши ли в Сы́на Бо́жия?». Да́же научи́мся вси, я́коже ве́ровати в Сы́на Бо́жия - се есть е́же дава́ти сла́ву Бо́гу равноче́стием. Почита́яй бо Сы́на, той есть почита́яй и Отца́.

Ве́рующе же и мы бра́тие, в Зижди́теля и Соде́теля и Го́спода, и покланя́ющеся Ему́, я́ко от тмы и заблужде́ния и от кля́твы нас свобо́ждша, и просве́щша душ на́ших и телеса́. Свет бо той в мир прише́л есть. Дела́ же Све́та до́ндеже день есть де́лаем, тмы дела́ возненави́девше, восприи́мем во уме́ суда́ бу́дущаго. Прихо́дит бо нощь сме́рти, егда́ никто́же де́лати мо́жет. Несть бо во а́де испове́дания, несть та́мо покая́ния. Несть ктому́ спасе́ние, и́мже отсю́ду нестяжа́вшим се.

Ны́не вре́мя де́лания, и се́мене, и ку́пли настои́т. Ны́не мно́гим по́двигом, и трудо́м, и по́том, се́ем усе́рдно, да́же по сем поко́ем и весе́лием жнем. Собра́ния есть вре́мя о́но, а не де́лания. И е́же а́ще кто се́ет зде, се и жа́ти и́мать в бу́дущем ве́це. Се́ем на ду́се се́мя духо́вное. Се́ем утро́бы ще́дры: кро́тость, умиле́ние, любо́вь, долготерпе́ние, человеколю́бие, благосты́ню, ми́лостыню, поми́лование, мир, ра́дование и освяще́ние, его́же кроме́ никто́же ви́дети и́мать Го́спода.

Не лени́мся учи́ти всех, и све́том наставля́ти сле́пствующих на до́брая дела́, и на и́стину и благоче́стие. И па́че же и́же на сию́ слу́жбу духо́вную учене́ни, и сло́во до́лжни су́ще возда́ти Бо́гу. Е́же при́сно де́лати дела́ Бо́жия: се есть, е́же тре́бующим дава́ти, и промышля́ти о недоста́точных, и ми́ловати их, и вся́ко де́ло уго́дно Бо́гу твори́ти. Мно́гим у́бо злым, пра́зднование хода́тай быва́ет. Всегда́ у́бо поуча́емся о до́брых, да́же злым не поучи́мся. Ум у́бо почива́ти не хо́щет, при́сно дви́жимь у́бо есть, и блага́я до́лжен есть де́лати. Пра́здному же вели́кий Па́вел, ни я́сти повелева́ет. И а́ще обря́щет нас Госпо́дь, при́сно блага́я де́лающих, и дерза́ющих о и́стине, прия́ти веде́ и́мать и заступи́ти нас, и изба́вити нас от напа́сти и молвы́, борю́щих и ненави́дящих нас, ви́димых и неви́димых враг: и натрижне́ния даст кра́сна и нетле́нна, и в боже́ственный черто́г введе́т, и Своего́ Ца́рствия наслажде́ния да́рует, е́же сподо́битися всем нам бы́ти, благода́тию и человеколю́бием Го́спода на́шего Иису́са Христа́, с Нимже Отцу́, ку́пно же и Свято́му Ду́ху, Сла́ва и Держа́ва и поклоне́ние, ны́не и при́сно и во ве́ки веко́в. Ами́нь.

Ми́лость Бо́жию, и человеколю́бие Го́спода на́шего Иису́с Христа́, и благода́ть Свята́го Ду́ха, дарова́нную оби́льно челове́ческому ро́ду, сказу́ю к вам, бра́тие, до́брии христолюби́вии послу́шницы, ча́да церко́вная, сы́нове све́та и прича́стницы Ца́рствия небе́снаго. Но не от своего́ се́рдца сия́ изношу́ словеса́: в души́ бо гре́шней не ражда́ется ни де́ло до́бро, ни сло́во поле́зно. Но твори́м по́весть, взе́млюще от свята́го Ева́нгелия, почте́наго нам ны́не от Иоа́нна Богосло́ва, самови́дца Христо́вых чуде́с.

Глаго́лет бо: «Во вре́мя о́но, мимоиды́й Иису́с, обре́те челове́ка сле́па от рожде́ния». И не пре́жде помоли́ся Ему́ слепе́ц, ни воследу́я про́сит прозре́ния, но по вопро́се Свои́х Си учени́к ди́вно чудотвори́т, изве́сто указа́я Себе́ благи́ми де́лы, я́ко Той есть Бог, [И́же] прии́де ны́не во Иерусали́м.

«И обре́те челове́ка сле́па та́ко рожде́нна». Сего́ ра́ди и рече́ апо́стол: «Мимоиды́й». Минова́ше бо у́же Ве́тхий зако́н со тре́бами ко́злих жертв и со преда́ньми ста́рческих за́поведей, не моги́й исцеля́ти человеческих неду́г: ничто́же бо зако́н Моисе́ов соверши́, но всех пре́дал есть под грех. Сам же Творе́ц тва́ри и Зако́ну Да́вец прии́де обнови́ти тварь и спасти́ челове́ка, я́коже проро́к о нем глаго́лет: «Не хода́тай, ни а́нгел, но Сам Госпо́дь спасе́ ны». Тем и к вопро́су апо́стольскому глаго́лет о слепце́: «Ни сей согреши́, ни роди́теля его́, но [да] явя́тся дела Бо́жия на нем. И сия́ рек, плю́ну на зе́млю, и смяте́ прах от плюнове́ния». Виждь, ка́ко показу́ет своего́ Божества́ иско́ннаго де́ла о́браз. Та́ко бо и в нача́ло сотвори́, взем персть от земли́ и сотвори́ челове́ка си́це. И ны́не, пома́зав ка́лом слепцу́ о́чи, посла́ его́ к купе́ли Силоа́мстей, да умы́вся прозри́т. И не то́кмо прозри́т, но и скве́рну пра́дедняго очи́стит греха́. Креще́нием же породи́вся, сын све́та бу́дет. О́ле му́дрость Бо́жия и неизрече́нное человеколю́бие! Ка́я душа́ не весели́тся о ми́лости Его́, е́юже нас возлюби́ и, дале́че су́щих, близ приведе́ к Себе́? Всего́ челове́ка здра́ва сотвори́в, разсла́блена воста́ви, хромы́я убы́стри, прокаже́ныя очи́сти, сля́ченыя испра́ви, глухи́я и немы́я до́бре слы́шаща и глаго́ливы сотвори́, сухору́кия укрепи́, бе́сы от челове́к отгна́ и слепы́я просвети́. Но жи́дове ся на Благоде́теля гне́вают, иуде́и ро́пщут на Чудотво́рца и изра́ильтяне сове́т творя́т на Спа́са своего́. Сы́нове Иа́ковли погуби́ти мы́слят прише́дшаго спасти́ ми́ра, саддуке́и прозре́вшаго на суди́ще влеку́т, иродия́не собо́рище совокупля́ют: не ве́руют бо челове́ку, я́ко той есть бы́вый пре́жде слеп. Кни́жницы изуми́вшеся, пыта́ют роди́теля прозре́вшаго: «Той ли есть, глаго́люще, ва́ю сын?» Леви́ти дивя́тся, ви́дяще я́ко зря́щую зе́ницу без о́чию роди́вшагося. Ста́рцы укаря́ют в суббо́ту отве́рзшаго о́чи слепцу́. Наро́ди же хва́ляще Бо́га, пресла́вному дивя́тся чудеси́. И весь Иерусали́м ра́дуется, Иису́са Христа́ велича́юще. Но фарисе́и льстят наро́ды, ху́лят Чудотво́рца. Жрецы́ изго́нят от собо́рища поми́лованнаго Бо́гом. Архиере́и претя́т прозре́вшему, да поху́лит просвети́вшаго и́, глаго́люще: «Сий челове́к несть от Бо́га, поне́же суббо́ты не храни́т». И са́ми между́ собо́ю злохи́трием пря́тся, а не ра́дуются о пресла́вных Бо́жиих чудесе́х: и́же не во ино́м язы́це содева́хуся, ни иноплеме́нником в мечте́ твори́ма бе́яху, но в пле́мени Авраа́мли, в сыно́х Изра́илевех, во гра́де Дави́дове, своего́ язы́ка Челове́ком, Его́же вси нарица́ху сы́ном Ио́сифовом, о Не́мже мно́зи послу́шествоваху, прокаже́нии очища́хуся, и бесни́и от злых изба́влени духо́в, и от ме́ртвых Тем воскресе́ни, и всея́ Палести́ны лю́дие, мно́жае пяти́ ты́сящь муже́й, и́же пятию́ хлеб до избы́тка насы́тишася от Христа́ в пусты́ни. И вся сия́ све́дяху жидо́вския старе́йшины, но за́висть не дадя́ше им позна́ти Бо́жия благода́ти, да бы́ша глаго́лали та́ко: «Ве́лий еси́ Го́споди и чу́дна дела́ твоя́, я́ко посети́л еси́ нас ми́лостию и сотвори́ избавле́ние лю́дем Свои́м».

Но изгна́вше от собо́ра прозре́вшаго, к себе́ са́ми прю соста́вльше, глаго́лаху: «Что сотвори́м галиле́янину сему́ Иису́су? Я́ко у́же отврещи́ хо́щет богода́нный Моисе́ов закон, и ста́рческая преда́ния в по́смех положи́л есть, а ры́бари Тивериа́дскаго е́зера, неве́гласы су́ща, и́хже по Себе́ ны́не во́дит честне́йши, архиере́и и фарисе́и сотвори́л есть. Из це́ркве продаю́щих о́вцы и го́луби изго́нит, а мытари́ и гре́шники приима́я вво́дит в же́ртовник , и с ни́ми яст и пие́т без сумне́ния. На архиере́и и кни́жники госпо́дьски грози́тся, и фарисе́ом со леви́ты, аки Вла́стель прети́т глаго́ля: «Го́ре вам кн́ижницы и фарисе́и, лицеме́ри», а блудни́цы от любоде́ец отводя́, свя́ты нарица́ет глаголя: «О́ же́но, ве́ра твоя́ спасла́ тя есть. Поиди́ ми́рна». Це́рковь же Бо́жию разори́ти вели́т, и треми́ де́ньми па́кы воста́вити ю́ хва́лится. Се же я́ве есть, я́ко руга́ется чудне́й сей це́ркви, и́бо в Сихи́ме блудни́цы рекл есть: «Наста́нет вре́мя, егда́ ни в горе́ сей, ни во Иерусали́ме покло́нитеся Бо́гови ду́хом». И еще́ же и все зла́то ке́саревино уча́ет ны отда́ти, и всем по Своему́ сле́ду ходи́ти вели́т в нищете́. А Моисе́й у еги́птян при исхо́де повеле́ отце́м на́шим с ле́стию златы́я тех сосу́ды поима́вше усво́ити. И се же, несть ли его́ сме́ртная вина́, я́ко и Сы́ном Бо́жиим нарица́ется, а Писа́ние глаго́лет: «Слы́ши Изра́илю, я́ко Госпо́дь Бог твой Еди́н есть»?».

Друзи́и же глаго́лаху: «Ни, бра́те, не ху́лит Бо́га. Ни твори́м су́рово сове́та. А́ще не бы от Бо́га был, не могл бы сих зна́мений твори́ти. Но еда́ есть Сей, о Не́мже пис́а Моисе́й глаго́ля: «Проро́ка вам воздви́гнет Бог от бра́тии ва́шея, я́ко и мене́, та́ко и Того́ послу́шайте». Исаия же: «Ра́дуйся земле́ Иу́дова, я́ко в тебе́ яви́тся Изба́витель твой, и тогда́ отв́ерзутся очес́а слепы́х, и ушеса́ глухи́х услы́шат». И па́ки Иереми́я: «Се Бог наш на земли́ яви́ся, и с челове́кы поживе́, и вси держа́щиися Понь живу́т, а оста́вльшии Его́ умру́т». Но испыта́им реко́ша до́бре, взове́м и еще́ втори́цею прозре́вшаго, приведе́м и роди́теля его́ в собо́р, позна́ета ли, а́ще той есть тою́ сын, его́же сле́па роди́ста. Еда́ не той бу́дет тою́ сын, и обличи́м галиле́йскую лесть, и осужде́на бу́дета о́ба на смерть».

И па́ки возва́вше челове́ка бы́вшаго сле́па глаго́лашя: «Даждь сла́ву Бо́гу. Мы ве́мы, я́ко Сей Челове́к гре́шник есть». Но прозре́вый не обину́яся и́стинну им глаго́лет: «О́ ро́де неве́рный, полн непра́вды и вся́кого безако́ния! Ко́ему Бо́гу сла́ву поуща́ете мя возда́ти, поне́же да́вшаго мне о́чи поху́лити ну́дите, и льсти́те мя а́ки безу́мна, [в] ва́шем причаститися гресе́, томи́те мя па́че мучи́телей, и ну́дите, отве́ргше и́стинну, глаго́лати лжу? Несть ли слы́шано, я́ко отве́рзе коли́ кто о́чи сле́пу рожде́ну, я́ко же се мне ны́не Бог Авраа́мов, и Исаа́ков, и Иа́ковль сотвори́? И кто есть ин Бог, [И́же] бо́льша сего́ показа́л во Изра́или чудеса́? Еда́ те́льчии главе́ сла́ву вели́те ми возда́ти, е́йже в пусты́ни покло́ньшеся отцы́ ва́ши погибо́ша? «Бо́га бо рече́ роди́вшаго я́ оста́виша, и забы́ша Бо́га Спа́са своего́». Еда́ ли Вефи́льскима пожру́ тельце́ма, и́маже вы со Ерова́мом поже́рше, в ру́це ору́жия пре́дани бы́сте Бо́гом? «Раздра́жиша бо Мя рече́ в чужди́х, и в ме́рзостех свои́х прогне́ваша Мя». Или́ на высо́кия хо́лми хо́щете мя повести́, иде́же вы своя́ де́ти бесо́м закла́сте? «Пожро́ша бо рече́ де́моном, а не Бо́гу бого́м, и́же не ви́деша отцы́ их». Что же еще́ хо́щете от мене́ слы́шати? Поне́же реко́х вам, и не ве́руете. Еда́ и вы ученицы́ Его́ со мно́ю хо́щете бы́ти?».

Фарисе́и же укори́ша и глаго́люще: «Ты учени́к еси́ Того́, а мы Моисе́овы есмы́ ученицы́». Отвеща́в и рече́ им бы́вый прежде слеп: «А́ще бы́сте бы́ли Моисе́овы ученицы́, не бы́сте избива́ли по́сланных к вам от Бо́га проро́к, язы́ческим покланя́ющеся рукотво́рным бого́м. А Моисе́й та́ко запове́да: «Да ся не поклони́ши бо́гу чужде́му, ниже́ послужи́ши дело́м рук челове́ческих». Не вы ли Иереми́ю ка́мением поби́сте, еги́петскому козлу́ тре́бы с кади́лом полага́юще, и́хже ра́ди возъяри́ся на вы глаго́лет Госпо́дь: «Соберу́ на ня зла́я, и стре́лы моя́ сконча́ю на них»? И па́ки Иса́ию древя́ною претро́сте пило́ю, с Манаси́ею безду́шным служа́ще куми́ром, о нихже рече́но бысть: «Бо́зи и́же не сотвори́ша небесе́ и земля́, ти́и да поги́бнут с рабо́тающими им». И еще́ же и Оси́ю порази́сте в Самари́и, со Аха́вом не су́щему бо́гу моля́щеся Ваа́лу: «И се ви́дев зело́ разгне́вася на лю́ди своя́ Госпо́дь, и омерзе́ ему́ достоя́ние свое́, и расточи́ де́сять ски́петр Изра́иля во страны́ язы́к, и на про́чая посла́ зубы́ звери́ны с я́ростию пресмыка́ющихся по земли́». Та́коже и вели́каго Иезеки́я пролия́сте кровь, браня́щим вам вавило́нским кла́нятися ка́пищем, и́хже Дании́л на срамоту́ вам сокруши́. Но мол́ю вы, не глаго́лите на Бо́га непра́вды, но смотри́те проро́ческих писа́ний, еда́ се есть Христо́с прише́дый от Бо́га на спасе́ние Изра́илю. А́ще бо сий не бы от Бо́га был, не бы могл твори́ти ничто́же».

И отвеща́ша жрецы́ с фарисе́и: «Во гресе́х ты роди́лся еси́ весь, и ты ли нас учи́ши?». И изгна́ша его́ от собо́рища своего́ вон. Изгна́ша его́ от ненави́димаго Бо́гом собо́рища жидо́вскаго, но свята́я Христо́ва отве́рзеся ему́ Це́ркви . Изри́нуша и́ от фарисе́йскаго лжеслове́снаго уче́ния, но от апо́стол Свята́го Ду́ха душеполе́зных уче́ний наслади́ся. И не окропи́ша его́ жерцы́ за́вистию пе́пелом ю́нчим с кро́вию ко́злию к пло́тьстей чистоте́, но а́нгельский святы́й ефилие́л на того́ верх креще́нием излия́ся. И не уте́шиша его́ богоху́льнии ста́рцы Изра́илевы, но архиепи́скопи Но́ваго Зако́на с ним весел́ящеся Христа́ сла́вят. Отверго́шася его́ пло́тныя сро́дницы, но духо́вная о Христе́ бра́тия прия́ша его́, и́хже водо́ю и Ду́хом язы́ческая породи́ Це́ркви . Чу́жда его́ сотвори́ша себе́ дру́зи и зна́емии , но святи́и а́нгели на небесех друголю́бно с ним ра́дуются. Не да́ша ему́ жерцы́ в Соломо́ню вни́ти це́рковь, но го́рняго Иерусали́ма свята́я святы́х с богоуго́дными патриа́рхи а́ки пе́рвенцы прия́т его́. Не огласи́ша его́ богом́ерзстии жидо́встии архиере́и, но Сам Иису́с Христо́с Сын Бо́жий па́ки по изгна́нии обре́те и́: и не то́кмо огласи́, но и освяти́ его́, рече́ ему́: «Ты ве́руеши ли в Сы́на Бо́жия?».

Отвеща́в он рече́ и рече́: «Да кто есть Го́споди, да ве́рую Вонь?». Рече́ же Иису́с: «И ви́дел еси́ Его́, и глаго́ляй с тобо́ю: Той есть». Он же припадя́ на зе́млю, си́це вопия́ше: «Ве́рую Го́споди, и покланя́ютися». Ве́рую в Тя, Сы́не Бо́жий, и прославля́ю Тя. Ве́рую, Влады́ко, и пропове́даю Тя Спа́са ми́ру Христа́. Ве́рую, Ми́лостиве, Твоему́ на земли́ прише́ствию и Тобо́ю на небеса́ челове́ком возше́ствию. Ты бо еси́, о Не́мже писа́ша проро́цы, дозря́ще ду́хом Твоего́ вочелове́чения. Ты бо еси́ его́же прообрази́ша патриа́рси, «А́гнца Бо́жия всего́ ми́ра грехи́ взя́ти» хотя́ща. Ты Го́споди Сам еси́, о не́мже учи́ша законода́вцы: «Егда́ прии́де Меси́я упраздни́т Зако́н и пода́ст благодать». Тебе́ бо да́сться вся́ка власть и си́ла, на небеси́ и на земли́. Тебе́ вся тварь и безду́шная раболе́пно слу́шает, и вся́ко дых́ание ви́димое и неви́димое зна́ет Тя своего́ Творца́ и Влады́ку. Но изра́ильстии лю́дие окамене́ша на Тя за́вистию, и свои́ о́чи от Твои́х отврати́ша чуде́с. Ви́деша бо ди́вна и пресла́вна твори́ма Тобо́ю Христе́ зна́мения, но не позна́ша за́вистию Бо́жия си́лы в Тебе явля́емыя. Взави́диша бо пе́рвее Твоему́ рождеству́, е́же небеса пове́даху звездо́ю. А они о уби́йстве ти клевета́ху к И́роду, зави́деша твори́мым Тобо́ю чудесе́м. И глаго́лаху: «О Веельзаву́ле кня́зе бесо́вьстем изго́нит бе́сы». И не почива́ют, а́ки пси ла́юще на своего́ благода́теля.

Но мы ны́не оста́вльше иуде́йское зло бесова́ние, похва́лим Бо́гом поми́лованнаго челове́ка. Сий бо не то́кмо теле́сныма очим́а прозре́, но и душе́вныма просвети́ся зра́кома. На земли́ пропове́дник бысть Сы́ну Бо́жию, и на небесе́х апо́стольскаго сподо́бися венца́. О кре́пкий Христо́в во́ине! До́блий нельсти́вный ору́жниче и де́рзый лжи обличи́телю! Непобеди́мый страстоте́рпче, иску́сный Сы́на Бо́жия побори́телю и фарисе́й безако́нных посрами́телю! И пропове́дниче И́стинне, до́брый преждеприи́мниче но́вому зако́ну! Пе́рвый покло́нниче Го́спода и Бо́га и Спа́са на́шего Иису́с Христа́, Ему́же сла́ва со Отце́м и со Святы́м Ду́хом, ны́не и при́сно и во ве́ки веко́в. Ами́нь.

Лю́бящим Бо́га, пра́зднованию го́д не убыва́ет. Уже́ бо и днесь нам пра́зднующим, а́нгели веселу́ются, арха́нгели ра́дуются, и вся небе́сныя си́лы с на́ми пра́зднуют. Пра́зднуим же не я́коже еги́петския рабо́ты изба́вихомся, а́ки жидо́вскыи де́ти, но духо́вныя ра́дости испо́лнихомся. А́ки Сио́нь скача́ да пра́зднуем: не а́ки рабо́ты избы́вше, но а́ки благослове́ния наслажда́емся. Пра́зднуем, не я́коже фарао́н погрязи́ся, но я́ко диа́вол поги́бе. Пра́зднуем, да препро́сто реку́, не я́коже Моисе́й мо́ре предели́, но я́ко Влады́ка Христо́с, сре́днюю сте́ну вражбе́ разори́. Я́коже есть слы́шати благослове́наго Па́вла глаго́люща: «Той бо есть мир и́же сотвори́ обое́ еди́но, и сре́днюю сте́ну прегра́де разори́в». Да ко́ей прегра́де сре́днюю сте́ну разори́ Влады́ка Христо́с? Ку́ю? Ю́же Ада́м возгради́, ослуша́нием де́льника вражбе́, землея́даго зми́я [наи́м] . Сего́ бо ра́ди пра́зднуим днесь, я́ко творе́ц Христо́с, прегра́ду вражбы́ разори́.

Сре́днее бо доше́дшее пра́зднование днесь. Ко́его сре́днее? Влады́чню воскресе́нию и Cвята́го Ду́ха прише́ствию: Сего́ наменяе́т, а о́ного ся не отлуча́ет. Сего́ пропове́дает, о́ного целу́ет. Сего́ благослови́т, а о́ного Госпо́дь нарица́ет: «Госпо́дь бо Дух есть, пои́стине лю́бящиим Го́спода».

Не убыва́ет год пра́зднованию. Покаря́ем бо ся Па́влу апо́столу глаго́лющу: «Я́коже пра́зднуем, не ква́сом ве́тхим, ни ква́сом зло́бным, ни лука́вым»: квас же лука́выя и зло́бный, не и́же от ту́ка и пшени́цы, ни от му́ки смеше́н быва́юще, апо́стол глаго́лет, но и́же от зло́бы и от лукова́ния жидо́вска прилага́ется, и́же вы́ну откыса́ет в нече́стии, нерастворе́но и без успе́ха, я́ко со́ли разума не има́ющу. Ко́е бо пра́зднование жидо́вско запове́дно не бысть порече́но? Ка́я ли их па́сха не ископа́ на правди́вых про́пасти?

Слы́ши бо ны́не обою́ евангели́сту, Иоа́нна и Луку́, [и́стинныма сподви́жникома], обою́ ученику́ Бо́гом совокупле́ныма, бра́тома единове́рныма, друго́ма, до́бре раздели́вшима Бо́жия словеса́. Лука́ бо не то́чию Ева́нгелие, но и дея́ния апо́стольска списа́. Чесо́ ради? Да мы же освети́мся, а иуде́и осрамя́тся.

А́ще бо и верхо́внаго апо́столом Петра́, я́коже ны́не слы́ша, в темни́цы заключи́ша, двема́ вери́гама увяза́вшу и четы́рижды четы́рьми блюду́ще, да по па́сце сего́ а́ки тельца́ расторгнут - но оба́че и́же ся воскреси́ от ме́ртвых Христо́с, И́же а́ки некни́жник от них днесь хуля́ся, и Петра́ от темни́цы пресла́вно свободи́: да уве́дят ры́си и зве́рие я́ко всу́е трудя́щеся, тщи обрето́шася наде́жды.

Они́ бо Влады́ку Христа́ в гро́бе затвори́вше, [и во́ины близ поста́вивше,] и вели́к ка́мык ко гро́бу привали́вше, и печа́ть хи́тру изыма́вше , [не] возмого́ша Его́ держа́ти: но ели́ко Сам помы́слив пусти́ я́. Ни раба́ Его́ Петра́ в темни́це затвори́вше, и всю́ду вяза́вше, и шестина́десятем блюсти́ наре́кше, а́ки иноязы́чныя ры́бари боя́ще возмого́ша удержа́ти востоща́нием, при́сно студ проти́ву славе прии́мше. И́хже и коря́ проро́к Иса́ия глаго́лаше: «Го́споди крепка́ твоя́ мы́шца, и не уве́девше же, постыдя́тся». По и́стинне бо студа́ по́лно. И́рода же царя́ со у́зами и ключи́ и стражми́, и нача́льнии иере́и, и книгочи́и, и фарисе́и, и весь собо́р жидо́веск, еди́ного ученика́ Госпо́дня не возмого́ша ублюсти́: неве́гласна, бездо́мка, ры́бам споку́пника.

Что реку́т к сим жидо́вски де́ти: и́же и ны́не оброде́нем лице́м и усты́ дерзну́вше рещи́ ко Го́споду: «Бе́са ли имаши? Кто Тя и́щет уби́ти?». «Бе́са ли и́маши?», глаго́лете жи́дове, Его́же ни ви́дети стерпи́ оте́ц ваш диа́вол, от Кого́ неви́димый бие́н легио́н, и терпе́ти еще́ не моги́й я́ве, возопи́ и́стину глаго́ля: «Что нам и тебе́ Иису́се? Прии́де пре́жде го́да му́чить нас. Ве́де Тя, Кто еси́, Сын Бо́жий». Бес прижиза́ем отвещава́ет, а вы благоде́еми беся́щеся Го́спода Иису́са Христа́ призыва́ете. Кому́ веща́ легео́н бе́сеск: «А́ще ны изго́ниши, повели́ ны в ста́до свино́е вле́зти». Соломо́ну ли и́же Иерусали́м возгради́, ли Влады́це Христу́ И́же вся в руце́ но́сит?

Но реку́т ту а́бие бесолю́бцы жи́дове: «Что у́бо? Соломо́н не влады́чествова [ли] бесо́м? Не всех [ли аки́] еди́н заключи́? [Не совязе́ ли я́ жидо́вскими зна́ки?] Не до дне́шняго ли дне того́ ся возбоя́ша?». Но жи́дове, [и́же прилага́ете ли́стия а́ки еди́но и оброздова́ете бе́сы] , всу́е та словеса́ прилага́ета: Еди́н [бо] Влады́ка Христо́с, кре́пей си́льнаго связа́ и сосу́ды его́ расхи́ти. Соломо́н бо не то́чию не влады́чествова, ца́рски бесо́м, но и от них совладо́мь бысть. На коне́ц смя́тся, возлюби́в многожене́ния хоте́нием диа́вольским, солюбле́нием прельще́ся, и в ста́до же́нско иноязы́чно а́ки блудни́к конь воздерза́в, оскверни́ неве́стник , [си́речь] Бо́жию ра́зуму . Оста́вив бо Бо́га оте́ц его, Емуже и церкве возгради́. Куми́ром пеще́ры устро́и. Ка́ко у́бо бесо́м влады́ка, и́же бесо́м раб?

О́ жидо́встей зло́бе! О́ влады́це Христу́ претерпе́нию! Хули́мь, утеша́ет. Оклеве́щемь, прие́млет. Зауша́емь, свобожда́ет. Распина́емь, о распина́ющих мо́лится. И́же от ро́да сле́па врача́ет и а́ки гре́шник облыга́ется . А́ще у́бо не ве́сте, некра́дены па́мяти нося́ще, я́коже жидо́вски де́ти, [духо́вне] ослепа́юще , к пло́тски прозре́вшу уму́, вопияху: «Даждь славу Богу. Мы вем, я́ко челове́к сей гре́шник есть»?

О́ жидо́вским бездве́рным устна́м! Гре́шник ли Христо́с? То ка́ко гре́шник, И́же грехи́ отъе́мляй, когда́ раб раба́ свобожда́ет, когда́ пови́нный пови́ннаго избавля́ет, когда́ до́лжный до́лжнаго писа́ние растерза́ет. Свобо́ден, раба своего́ свобожда́ет, а не раб раба́. Непови́нный, осужде́наго избавля́ет, а не осужде́нный осужде́ннаго име́яй. И до́лжному писа́ние растерза́ет, а не свя́занный свя́заннаго раздреши́т. Что же и уве́сте Влады́ки Христа́, грех творя́й ука́з, воде́ в вино́ приложе́ние? Се Божеству́ повеле́ние, а не греху́ за́поведь. Но от ме́ртвых Ла́заря возва́нию? И се а́ки животворя́й Влады́чества, а не а́ки гре́шник собляде́ словесы́. Нам же премолча́вшим, о́ жи́дове! Поиме́те ва́шея льсти поводника́ самого́ сле́пца, не стыди́теся слепце́м повожде́ни бы́ти: не бо в про́пасть вас вве́ржет, но на ве́рнем ка́мыце поста́вит, и́мать бо светя́щее негаси́мо свети́ло ве́ры.

Что у́бо слепе́ц к жидо́м? «Не слы́шася, рече́, от ве́ка я́ко отве́рзе кто о́чи от ро́да сле́пу». О́ пресла́вному! Некни́жник зако́нником учи́тель быва́ет, глаго́ля к ним упова́нным язы́ком: «Всу́е Зако́ну воскла́няетеся, и глаго́лете Авраа́ма пра́ведника, и всех проро́к пра́ведник, а Христа́ гре́шника. Кто от ва́ших пра́ведник от ро́да сле́пу дасть о́чи? А́ще тех ни еди́н возмо́же сотвори́ти, просла́вленый же гре́шник всех пре́йде - ре́вностию е́же о мне чу́до покры́ти мы́слите».

Жи́дове же к слепцу́: «Во гресе́х ты бысть весь, да ты ли нас учи́ши?». Проро́ки кори́ши, отве́рженый сле́пче? И Илия́ проро́к, мертвеца́ не воскреси́ ли? Елисе́й же подо́бная тем не соде́ла ли? Превели́кий Моисе́й проро́к, разла́тое мо́ре су́хо не сотвори́ ли? С небеси́ не спусти́ ли ма́нны? От неражда́юща ка́мени во́ды не изведе́ ли? Мо́рю блева́ти кра́стельми не устро́и ли? Преста́ни у́бо сле́пче, преста́ни. Не бо́ле ли та твоему́ прозре́нию?

Слепе́ц же к жидо́м: «Проти́вят вы ся ветиле́ния ва́ша, всу́е велича́етеся. [Не́сте у́нее, не́же и́же] не и́мать [что] к Зако́ну : его́же взор отлиши́, слух сконча́. Моисе́й и Илия́ и Елисе́й, с ни́[ми же] воскла́няетеся [и ели́цыми велича́етеся]: вели́ко бо ка́ко чу́до соде́лаша. Ве́де и аз. Но оба́че помоли́вшеся, прослези́вшеся, постена́вше до́лго проси́вше, взя́ша да́ру благода́ть. Прише́д же Иису́с, И́же от вас мне́ный гре́шник, от мене́ же Бог позна́ся , вку́пе име́я к хоте́нию си́лу, мы́слию то́чию недоста́ток напо́лни».

Что у́бо фарисе́и к слепцу́? «Мно́гое же бысть в той год распре́ние», ему́же не имам си́лы в ны́нешним приложи́ти го́ду , те́сности ра́ди, и лежа́щим хоте́нию. Те́мже до́лжник вам в [ны́]нешнем сам ся вписа́в , к предлежа́щим и́дем.

[…]

Слы́ша бо ны́не евангели́ста Иоа́нна вопию́ща: «Преполовя́ще пра́здник, взы́де Иису́с в це́рковь и уча́ше, и чудя́хуся вси жи́дове глаго́люще: Ка́ко свесть кни́гам не учи́вся?». О́ чудо жидо́вско, по ра́зуму напо́лнено! «Ка́ко весть кни́гам, не навы́к?», рече́. Сих ли про́сити, И́же кни́гам Творе́ц? Ко учи́телю ли приходи́ти, И́же язы́ку Строи́тель? Сказа́нию ли хо́щет, И́же му́дрость пуща́ет? Книг ли тре́бует, И́же небеса́ распростре́? Писа́ло ли хо́щет держа́ти, И́же досце́ персто́м написа́вша?

«Ка́ко сей книг весть не учи́вся?». Бо́льша оста́вивше, к ме́ньшим иди́те. А́ще хо́щете иска́ти [не]изыска́ная, рцы́те пре́жде: ка́ко от ро́да сле́па воо́чи? [Или́ точи́ло обнажи́] , или́ коллу́рий растопи́, или́ ми́лин показа́, или́ гу́бу намочи́, или́ главу слепцу́ обросну́, да сото́к воспя́тится ? Или́ алчбо́ю уста́ви? Или́ проти́вно ему́ бы́лие дасть, да кручи́ну протреби́т? Или́ бельмо́ сострога́? Или́ поволо́кою ся прострече́? Не ди́вно ли: ни на па́кость и проти́вен обхо́д, ели́ко к челове́ком, сего́ воочи́. Ка́лом бо то́чию слепцу́ о́чи ма́за. Кал же и ви́дящая ослепи́, а не е́же неви́дящая воочи́.

Я́коже у́бо, жи́дове, И́же от ро́да сле́па без хи́трости враче́вския цели́в, Бо́жескую Его́ си́лу оба́ви самовла́стие. Та́коже и зде: без кощу́нския ре́чи вети́йския соплете́но му́дростския, и бля́ди звездоче́тския уча́ше приходя́щая - да и по слепцы́ уве́дят прише́дшии, я́ко Той есть И́же персть взем от земли́ и Ада́ма ка́лом созда́в, и зде уве́дят по таце́м каза́нии , я́ко Той есть ре́кшим проро́ком: «Отве́рзи уста́ своя́ и напо́лню ти я́».

Что у́бо Госпо́дь отвеща́в? К жидо́м рече́, я́коже ны́не слы́ша: «Что Мене и́щете уби́ти? Не Моисе́й ли вам дасть Зако́н? И ни́ктоже от вас не сотвори́т Зако́на». [И жи́дове ко Го́споду: «Не сотвори́м ли Зако́на?] Но того́ ра́ди мы́слим Тя уби́ти, я́ко разоря́еши суббо́ту, осла́бленыя стяза́я и слепы́я о́ныя. И глаго́лаши «не твори́м зако́на»». Госпо́дь же к ним: «Се несть Зако́на. А́ще бо человеќ, рече́, в суббо́ту обреза́ется, да ся не разори́т зако́н Моисе́ов, на Мя [ли] ся гне́ваете, я́ко всего́ челове́ка це́ла створи́х в суббо́ту, и слепо́му слепы́я прозо́рцы отверзо́х?

Что бедне́е в суббо́ту, жи́дове, пло́ти ли обре́зати или́ осла́бленаго стязова́ти? Окрове́ние [ли] обрез́ати, или́ ду́шу от грех изба́вити? Ору́жие обостри́ти или́ сле́па воочи́ти? Суди́лище безако́нно совокупи́ти или́ благоде́ть вселе́нныя умно́жити? А́ще челове́ка обре́зовасте в суббо́ту, да ся не разори́т Зако́н: на Мя ли ся гне́ваете, я́ко всего́ челове́ка це́ла створи́х в суботу? Не суди́те на лица́, но пра́ведный суд суди́те».

О́ пресла́вным дея́нием! Бог челове́ком глаго́лет о Себе: «Пра́ведный Ми суд суди́те, Свои́х Ми чу́до деле́с». Своя́ враги́ судия́ прие́млет, глаго́ля к ним: «Не суди́те на лица́, но пра́ведный суд суди́те», не а́ки Суса́не. «Неви́ннаго не осужда́йте, Аз бо и ту Дании́ла воста́вих, да ви́нныя му́чит, неви́нныя же изба́вит».

«Не суди́те на лица́, но пра́ведный суд суди́те». Не а́ки при Науфе́и чрез зако́н на мя ка́мением ме́щете, да не мзды чреззако́нныя, а́ки Аха́в, кро́вно измове́ния блу́дско претерпи́те.

«Не суди́те на лица́, но пра́ведный суд суди́те». При́сно бо пресу́дите , поне́ ны́не пра́ведный суд суди́те. Не вас ли ху́ля проро́ком же глаго́лаше: «Слы́шите же се старе́йшины до́му Иа́ковлю, и оста́нцы до́му Изра́илеву, гнуша́ющиися суда́, и всю пра́вду соверша́ющии»?

«Не суди́те на лица́, но пра́ведный суд суди́те»: ко́сти бо человекоуго́дником погиба́ют.

«Не суди́те на лица́, но пра́ведный суд суди́те». Что устны́ на вадьбу́ понука́ете? Что язы́к на клевету́ остри́те? Что уста́ на ви́ннаго кове́те? Не рех ли вам, я́ко и о пра́здне сло́ве, си есть вам прю отда́ти? Что диа́вола ображаете, а са́ми ся осужда́ете?

«Не суди́те на лица́, но пра́ведный суд суди́те». Иде́же хвалословле́ние, ту и плотояде́ние. Что возопи́ Дави́д глаго́ля? «Уста́ моя возглаго́лют прему́дрость». Еда́ у́бо уста́ моя́ возглаго́лют оклевета́ние? «И поуче́ние се́рдца моего́ ра́зум». Еда́ бо вадьбу́? Что честне́е слы́шати па́че [от] Свята́го Ду́ха: «Уста́ прему́драго взы́щутся в це́ркви» или́ «И́мже уста́ умно́жиша я́ непра́вды»? Что у́бо слы́шати: «Уста́ правди́ваго ка́плют прему́дростию» или́ «И́мже уста́ кля́твы и го́рести полна́»? Что успе́шнее слы́шати: «И́стинна уста́ наполня́ются сме́ха» или́ «Уста́ облыга́ющия погубя́т ду́шу»? Что честне́е вам глаго́лати к Бо́гу: «Устны́ моя́ восхва́лят тя» или́ «А́ще устны́ на́ша в нас суть, кто нам Госпо́дь есть»?

Ве́ру и́мете у́бо, ре́кшу уму́ : «Сохрани́те поропта́ние неуспе́шно, и от оклевета́ния востя́гнете язы́цы: я́ко глаго́л таи́бн то́щь не изы́дет, уста же оболга́вшая погубя́т ду́шу».

«Не суди́те на лица́, но пра́ведный суд суди́те». Между́ Мно́ю и Моисе́ом. Моисе́й бо обре́зание ра́ди Закона не утвержда́ет: Зако́на разоря́я, да ся обре́жет младе́нище. Аз же и Зако́н испо́лню, и благоде́ть чту: не бо ору́жие хитро́вно обострю́ , ни мзды проти́ву дея́нию прошу́.

«Не суди́те на лица́, но пра́ведный суд суди́те». «Что Мене́ и́щете уби́ти?». Мяте́теся всуе. Не еще́ мы́шлю стра́сти прия́ти. Егда́ хощу́ – стражду́, не егда́ вы гво́здия кове́те. Строе́нию прихожду́. Не ну́ждею бо прихожду́, не ну́ждею бо терплю́: Сам ся смири́х , никто́же Мене́ пре́дана поя́. Слы́ша же евангели́ста Иоа́нна, та́же ми бесе́дующа. Что бо приложи́ глаго́ля? «Иска́ху Его́ я́ти, и никто́же возложи́ Нань ру́цы, я́ко еди́наче не прии́де Ему́ час».

Что мы́слете глаго́лати: «Я́ко не прии́де Ему́ час»? Зане́же не бе́яше еще́ сконча́, глаго́ланнаго ра́ди. Да никто́ у́бо мнит, слы́ша вопию́ща евангели́ста «я́ко еди́наче не прии́де Ему́ час», я́коже час вина́: я́коже е́ллинския де́ти тще глаго́лют, я́ко урече́но кому́ждо челове́ку - и вина́ сме́ртная, и день, и час, и ка́ко есть умре́ти кому́, [и ника́ко есть умре́ти,] до́ндеже прии́де ро́ду отве́т .

Отъиди́ от тебе́, от зако́нныя ста́рическия по́вести и зело́ бля́дныя, и́стине супе́рника ! А́ще бо урече́ся комуждо челове́ку вина́ смертна, и день, и час, и ка́ко есть умре́ти, и немо́щно есть убежати - чесо ра́ди боля́ще, вра́ческия по́мощи прие́млем? Да смерть [от]ста́вим отъину́д. Чего́ же ради и плавающе, заве́трия и́щем и зве́зды ся блюде́м? Чесо́ ра́ди же и пути́ де́юще, разбойнических мест укланя́емся? Чесо́ ра́ди же и на брань стро́имся к враго́м, и броня́ соплета́ем, и ору́жия остри́м, и гра́ды возгражда́ем? А́ще не мо́щно есть убежа́ти кому́. И́накоже, чесо́ ра́ди Ка́ина гнуша́емся, а́ще урече́ся А́велю та́ко ви́нна смерть? Чесо́ ра́ди уби́теля убивае́м, а́ще суть бы́ли до́лжни та́ко умре́ти? Чесо́ ра́ди же и мо́лимся, мно́га ле́та прия́ти, не впа́сти в напа́сть? Несть ли же и́стинник Влады́ка Христо́с, И́же о верне́м рече́: «До́лгими де́ньми насыщу́ его́ и покажу́ ему́ спасе́ние свое́». И па́ки: «Призови́ Мя в ско́рбный свой день, изба́влю тя, и просла́виши Мя».

Не ве́м[ы] бо я́ве от ны́нешних нам почита́ных в дея́ниих апо́стольских, я́ко верхо́вный апо́столом Петр в ско́рби Го́спода воззва́ в темни́цы, и́же от Него́ по́мощи дойде? То́чию бо в ско́рби возопи́, о́ блаже́нный Петр, ту а́бие с высоты́ Госпо́дь а́нгела пу́щше, И́же вели́ка сове́та А́нгел Оте́чь, Петро́ви темни́цу освети́, я́ко и трем де́тем пещь оброси́. Еди́н бо и Той же Госпо́дь, И́же и ту у́гли горю́щии цве́том показа́, и зде соу́зы расто́ргнув, И́же та́мо ка́пестр, и зде нече́стия погуби́в, И́же та́мо Навуходоносо́ра осрами́, и зде И́рода порази́, И́же та́мо Вавило́няны, зде же и жиды́ ослепи́.

Что же и нача́ток чте́нию [бысть]? Ну́жно есть, о́ва же предположи́ти , друга́я же во ин год пренабде́ти . Слы́ша бо ны́не писа́теля Луку́ глаго́люща: «В той год возложи́ И́род царь озло́бити други́х и́же от Це́ркве: погуби́ же Иа́кова Иоа́ннова бра́та мече́м. Ви́дев же я́ко го́де есть жидо́м, приложи́ я́ти Петра́, его́же им всади́ в темни́цу, преда́в четы́рьма во́ином блюсти́ и́, мы́сля по па́сце возвести́ его к наро́ду».

По и́стине пра́зднуем днесь, не то́чию Влады́ческу, но и му́ченически стра́сти ви́дим. Иа́ков закала́ется, и Петр затворя́ется, и Це́ркви мо́лится, и соу́зы растерза́ют[ся], и диа́вол обнажа́ется . Жидо́вска па́сха сконча́ся, Иско́мь же не обрета́ется, И́род стра́жи осужда́ет, а Петр чу́до пове́дает. Желе́зная врата́ отверзо́шася, и жидо́вско се́рдце не покаря́шеся.

«В той год возложи́ И́род царь ру́це». Кий год? Когда́ ца́рско Спаси́теля и́мя хромы́м тещи́ дая́ше, убру́сы неду́ги отгоня́ше, сте́ньми неду́ги отубрысова́ше , [му́ченически венцы́ соплета́ше, когда́] му́ченическим венце́м [Иа́кова] утвори́, [Иоа́нна Богосло́ва показа́,] Петра́, борца́ доб́ра, сохрани́.

«В той год возложи́ И́род царь ру́це» Кий год? Егда́ ка́пища отпа́даху утвержде́нию, и куми́ры прельсти́ти не можа́хуся, [святи́лища ископава́хуся], и жрецы́ поража́хуся , егда́ во чре́ве кощу́ны прославля́хуся, и осяза́ющим лукова́ния отверза́хуся.

«В той год возложи́ И́род царь ру́це». Кий год? Егда́ собо́р раздра́шеся , а Це́ркви совокупля́шеся. Егда́ закон́ницы не можа́ху, апо́столи можа́ху . Егда́ обре́зание пло́ти исхуде́яше, и печа́ть серде́чная умножа́шеся. Егда́ неква́сно скончава́шеся, а небе́сный хлеб процвета́ше. Егда́ седмосве́щник угаса́ше, и [крест] двоенадесятеза́рен возжига́шеся .

«В той год возложи́ И́род царь ру́це, озло́бити ки́их же от Це́ркве». О́ царесмышле́ние, па́чеже па́костнику де́рзость! Кий царь [бысть], не сый в руку́ Бо́жию, но в сове́те диа́волу? Петра́ тщи́ши ся уби́ти, о́ И́роде? Чесо́ ра́ди? Мяте́жно ли поучи́ся или́ вене́ц ца́рский устро́и ? [Или́ порфи́рою возоблада́?] Или́ име́нию сокро́вища умно́жи ? Или́ ору́жники ясть ? Или́ гра́ды тве́рды уста́ви? Наг и не име́я есть Петр в пло́тных, оста́вль и о́тчи се́ти, и лове́ческую ло́дию, и ры́бную лови́тву приоби́де, покори́ся нас ра́ди обнища́вшему Христу́ глаго́лющу: «Не имейте ме́ди, ни вре́тища, ни мо́щны, ни сугу́бы ри́зы».

О́ И́роде! Что ра́тныя оста́вив, со апо́столы ся бо́реши? Что, сте́ны тве́рды уста́вив, Це́ркве воскопава́еши? Что ру́це простира́еши, не [поне́ се́лище] па́костнику восприя́ти, но царя́ Христа́ тре́бище разврещи́?

«В той год возложи́ ру́це И́род царь, озло́бити ки́их от Це́ркве». О́ ру́це И́родове, на моли́тву не простира́ющиися, но на уби́тие правди́ваго гото́вящиися! Те бо ру́це ви́де Петр, возопи́ и моля́шеся в темни́цы Давид́овы ре́чи глагол́я: «Не погуби́ с нечести́выми душы́ моея́, и с му́жи крове́й живота́ моего́, в ни́хже руку́ безако́ния и суд, и десни́ца их испо́лнися мзды». А́ще бо бы мзды не взима́л И́род, не бы бо беззако́нию ору́жия остри́л, и мечем уби́л Иа́кова, и Петра́ двои́ми вери́гами связа́л, хотя его́ возвести́ наро́ду по па́сце. О́ па́сха жидо́вска, при́сно между́ кровьми́, чи́стым смеша́ющися! Влады́ку Христа́ пре́жде па́схы распя́ша, ученика́ ему́ Петра́ по пас́це мышля́ху уби́ти. О́ па́сха нечи́стая! О собо́р кровипролия́нию люб! До́бре Соломо́н от мног време́н жидо́веск собо́р «ме́рзок» прорече́. Чесо́ ра́ди? Я́ко чужди́х крове́й приходя́щу.

«Хотя́ его́, рече́, по па́сце возвести́ наро́ду». Чесо́ ра́ди не в па́сху? Чтут бо си́речь пра́здничество па́схе. О́ честь, укори́зны напо́лнена! А́ще не досто́ит в па́сху уби́ти, ниже́ возбои́теся в па́сху. Пра́здника бо мните́ чту́ще, избира́юще уби́тия держа́ти . [В темни́цы же́ртву держите́, не и́мате ли ю́ приноси́ти?] О́ сумне́ние, осужде́ния напо́лнено! Па́чеже: о́ беззако́ние, [е́же] до ны́нешняго от не́ких же снабди́тся , [оба́че] откуде́ нача́ток взем и коне́ц обре́те , не ища́.

Несть ли нам ве́димо , я́ко мно́гажды друзи́и и́же си́лу испыта́ющии , негре́шнаго в темни́цы ве́доме заклю́чь, то́чию приступи́т [честву́ема Па́сха]: не су́ще Па́сце , ту а́бие, си́речь ве́домыя темни́цы, изба́вят - ину темни́цу го́ршу поразумева́юще, или́ у себе́ блюду́ще и алчбу му́чаще, или́ в дому́ испы́тне затваря́юще, «несы́та зе́юща»: не зря, я́коже се несть пра́здника чи́ста , но Влады́ку Христа́ досажда́юще.

Но хо́щеши пра́здновати? Обаже́ния прости́ по́друга своего́. Тогда́ бо кто известу́ет пра́зднуя? Не егда́ вселе́ную оде́жду обнови́т, но егда́ ско́рбную ду́шу свободит.

Бо́гу на́шему сла́ва со Отце́м и со Святы́м и Животворя́щим Ду́хом, ны́не и при́сно и ве́ки веко́в. Ами́нь.